শিলচৰ, ১৬ আগষ্ট : স্বাধীনতা দিৱসৰ দিনাই ৰাজ্যত সংঘটিত হয় মৰেল পুলিচিঙৰ এক ভয়ংকৰ ঘটনা । এইবাৰ স্থান কাছাৰ । কাছাৰ জিলাৰ সোনাই নৰসিংপুৰত লাভ জেহাদৰ অভিযোগ উত্থাপন কৰি খুটাত বান্ধি এজন যুৱকক নিৰ্মমভাৱে প্ৰহাৰ কৰিলে মৰেল পুলিচে । কেৱল যুৱককেই নহয়, এগৰাকী যুৱতীকো মৰেল পুলিচে ৰাজপথত চলালে আক্ৰমণ । এই ঘটনাটো সামাজিক মাধ্য়মত ভাইৰেল হোৱাৰ পিছতেই সৃষ্টি হৈছে প্ৰতিক্ৰিয়াৰ ।
ঘটনাটো কেনেকৈ সংঘটিত হ'ল ?
জিলাখনৰ সোনাই কাজিডহৰ আলী আহমেদ চৌধুৰী নামৰ যুৱকজনৰ সোনাই শিলডুবি অঞ্চলৰ এগৰাকী আন ধৰ্মৰ যুৱতীৰ লগত প্ৰেমৰ সম্পৰ্ক আছিল । বৃহস্পতিবাৰে অৰ্থাৎ স্বাধীনতা দিৱসৰ দিনা যুৱকজনে প্ৰেমিকাক নৰসিংপুৰত থকা যুবতীগৰাকীৰ কলেজৰ সম্মুখত লগ ধৰিবলৈ গৈছিল । কলেজৰ সম্মুখত দুই প্ৰেমিক-প্ৰেমিকাই কথাপাতি থকাৰ সময়তে হঠাতে এটা যুৱকৰ দল উপস্থিত হৈ যুৱকজনক আটক কৰে ।
সোণাই থানাৰ আৰক্ষীয়ে উদ্ধাৰ কৰিলে আহত যুৱকক :
এই দলটোৱে লাভ জেহাদৰ অভিযোগ উত্থাপিত কৰি যুৱকজনক ৰাজপথত দলবদ্ধ প্ৰহাৰ কৰি ৰচিৰে খুটাত বান্ধে । কেৱল প্ৰেমিক যুৱকজনকেই নহয়, মৰেল পুলিচৰ হাতৰ পৰা ৰক্ষা নপৰিল যুৱতীগৰাকীও । ৰাজপথতেই মৰেল পুলিচে গুৰুলা-গুৰুলকৈ প্ৰহাৰ কৰে যুৱতীগৰাকীক । এই ভয়ংকৰ মৰেল পুলিচিঙৰ দৃশ্যটো মোবাইল ফোনত বন্দী কৰিলে নীৰৱ দৰ্শক হিচাপে উপস্থিত একাংশ লোকে । ইপিনে, এই ঘটনাটোৰ খবৰ লাভ কৰাৰ পিছতেই ঘটনাস্থলীত সোণাই থানাৰ আৰক্ষী উপস্থিত হৈ মৰেল পুলিচৰ কবলৰ পৰা যুৱকজনক ৰক্তাক্ত অৱস্থাত উদ্ধাৰ কৰিবলৈ সক্ষম হয় ।
