ডিব্ৰুগড়,২৫ ফেব্ৰুৱাৰী : বান আৰু খহনীয়াৰ সমস্যাই প্ৰতিবছৰে ডিব্ৰুগড় জিলাক প্ৰভাৱিত কৰি আহিছে । খৰালিৰ সময়তো ডিব্ৰুগড়ত ব্ৰহ্মপুত্ৰৰ খহনীয়াই ভয়ংকৰ ৰূপ লৈ আহিছে । যাক লৈ ডিব্ৰুগড়বাসীও শংকিত হৈ পৰিছে । বিশেষকৈ নৈপৰীয়া লোকসকল বিভিন্ন সমস্যাত পৰিছে । সমান্তৰালকৈ ব্ৰহ্মপুত্ৰৰ খহনীয়াই ঐতিহাসিক ডিব্ৰুগড় চহৰলৈও বিপদ মাতিছে ।
ডিব্ৰুগড়ৰ মোহনাঘাটত হোৱা খহনীয়াই চকুৰ সন্মুখতে লৈ গৈছে বহু পৰিয়ালৰ ঘৰ, কৃষি ভূমি । মোহনাঘাটত বিগত কেইবাটাও বছৰৰ পৰা অব্যাহত থকা খহনীয়াত বহু পৰিয়লে ঘৰৰ ভেঁটি হেৰুৱাবলগীয়া হোৱাৰ লগতে বহু পৰিয়ালে অন্য স্থানলৈ স্থানান্তৰিত হৈছে । ৰাইজে এই মোহনাঘাটত অব্যাহত থকা খহনীয়া প্ৰতিৰোধৰ দাবীত ৩৭ নং ৰাষ্ট্ৰীয় ঘাইপথ অৱৰোধ কৰি উত্তাল প্ৰতিবাদো সাব্যস্ত কৰিছিল ।
লক্ষণীয়ভাৱে মোহনাঘাটৰ খহনীয়াৰ প্ৰকোপ অতি ভয়ংকৰ হোৱাৰ পাচতো প্ৰশাসনে বিশেষ পদক্ষেপ গ্ৰহণ নকৰাৰ অভিযোগ উঠিছিল । খহনীয়া নিয়ন্ত্ৰণ কৰিব নোৱাৰিলে ডিব্ৰুগড় চহৰৰ মূল প্ৰতিৰক্ষা বান্ধ খহনীয়াত নিচিহ্ন হোৱাটো নিশ্চিত হৈ পৰিছিল ।
এনে পৰিস্থিতিত ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাৰ তৎপৰতাত ডিব্ৰুগড়ৰ মোহনাঘাটত ব্ৰহ্মপুত্ৰৰ খহনীয়া প্ৰতিৰোধৰ বাবে ৰূপায়ণ কৰা হৈছে বৃহৎ প্ৰকল্পৰ । দেওবাৰে ডিব্ৰুগড়ৰ বিধায়ক প্ৰশান্ত ফুকনে জলসম্পদ বিভাগৰ বিষয়াসকলৰ উপস্থিতিত প্ৰায় ৭৫ কোটি টকাৰ প্ৰকল্পৰ কামৰ শুভাৰম্ভ কৰে ।
এই বৃহৎ পুঁজিৰে মোহনাঘাটত উন্নতমানৰ জিঅ' বেগ আৰু পাৰ্কুপাইনৰ ব্যৱস্থা কৰা হ'ব বুলি জানিবলৈ দিয়ে বিধায়ক প্ৰশান্ত ফুকনে । অৱশ্যে এই খহনীয়া প্ৰতিৰোধৰ প্ৰকল্পই আগন্তুক বাৰিষাত কি ধৰণে কাম কৰিব সেয়াহে লক্ষণীয় হ'ব ।
