বঙাইগাঁও, ১০ অক্টোবৰ : বৰ্তমান নামনি অসমৰ বিভিন্ন প্ৰান্তত চলিছে শ্ৰমিকবিৰোধী অভিযান । কিছুদিন পূৰ্বে উজনি অসমৰ বিভিন্ন ঠাইত মিঞা হাটাও অভিযান চলিছিল । ধিংকাণ্ডৰ আলম লৈ উজনি অসমৰ বিভিন্ন ঠাইত মিঞা শ্ৰমিকসকলক অমানুষিক অত্যাচাৰ-উৎপীড়ন চলাই খেদি পঠিওৱাৰ অভিযোগ উঠিছিল ।
আনহাতে, সন্দেহযুক্ত বাংলাদেশী নাগৰিক বুলি কৈ সমগ্ৰ অসমজুৰি এক আলোড়নৰ সৃষ্টি কৰাৰ সময়তে চৰকাৰে চকুমুদা কুলিৰ ভাৱত থকাৰ অভিযোগ উঠিছিল । কিন্তু বৰ্তমান উজনি অসমত ইটাভাতাকে আদি কৰি বিভিন্ন বিভাগত শ্ৰমিকৰ অভাৱত সকলো কাম স্থৱিৰ হৈ পৰিছে । যাৰ ফলত মালিকসকলে দালালৰ জৰিয়তে নামনি অসমৰ পৰা শ্ৰমিক উজনিলৈ নিবলৈ নানা কৌশল অৱলম্বন কৰিছে ।
কিন্তু এইক্ষেত্ৰত নামনি অসমৰ একাংশ দল-সংগঠনৰ লগতে ৰাইজ জাঙুৰ খাই উঠিছে । তাৰেই প্ৰতিফলন ঘটিছে বঙাইগাঁও জিলাত । জিলাখনৰ কোকিলা আৰক্ষী নিৰীক্ষণ চকীৰ অন্তৰ্গত গোলাপাৰা পঞ্চায়ত বজাৰৰ পৰা ইটাভাতা শ্ৰমিকক বাধা প্ৰদান কৰিছে ৰাইজে ।
"নামনি অসমৰ পৰা কোনোপধ্যেই উজনি অসমলৈ যাবলৈ দিয়া নহ'ব মিঞা শ্ৰমিকক ।" এই মন্তব্য সাধাৰণ ৰাইজৰ । উল্লেখ্য যে নিশাৰ সুযোগ লৈ ই-ৰিক্সাৰে একাংশ ইটাভাতাৰ ঠিকাদাৰ তথা চৰ্দাৰে শ্ৰমিকসকলক সৰবৰাহ কৰিবলৈ ওলাইছিল । জপেয়া, মাত্ৰাঘোলা, হৰিৰচৰ, গোলাপাৰা, বাংলাপাৰা, গনবিন্না আদি অঞ্চলৰ প্ৰায় ৪০ জন শ্ৰমিক, মহিলা, শিশুক লৈ উজনি অসমলৈ যোৱাৰ সময়তে ৰাইজে আবদ্ধ কৰে ।
ৰাইজৰ দাবী, "মুখ্যমন্ত্ৰীয়ে যেতিয়ালৈকে মিঞা শ্ৰমিকৰ নিৰাপত্তা সুনিশ্চিত নকৰে, তেতিয়ালৈকে উজনি অসমলৈ মিঞা শ্ৰমিকক যাব নিদিয়ে ।" ইফালে আমছুকো ক্ষুৰধাৰ সমালোচনা কৰে ৰাইজে ।
উল্লেখ্য যে যোৱা ৮ অক্টোবৰতো বঙাইগাওঁ জিলাৰ মেৰেৰচৰ আৰক্ষী থানাৰ অন্তৰ্গত ঘোঁৰামাৰাত সংঘটিত হৈছিল অনুৰূপ ঘটনা । শিশুসহ শ্ৰমিক উজনি অসমলৈ সৰবৰাহক লৈ ঘোঁৰামাৰাত দালাল, শ্ৰমিক আৰু ৰাইজৰ মাজত উত্তেজনাৰ সৃষ্টি হয় । উজনি অসমলৈ ইটাভাতাত শ্ৰমিক নিয়াত বাধা দিয়ে সহস্ৰাধিক ৰাইজে ।
দুখনকৈ শ্ৰমিকভৰ্তি বাছ আবদ্ধ কৰি ৰাইজে শিশু শ্ৰমিকক লৈ যাবলৈ বাধা প্ৰদান কৰে । তেওঁলোকৰ অভিযোগ, ইয়াৰ দ্বাৰা শিশুসকল শিক্ষাৰ পৰা বঞ্চিত হ'ব । শিশুসকলক শ্ৰমিক হিচাপে নিয়োগ কৰাৰ বাবেই অসমত নিৰক্ষৰতাৰ হাৰ বৃদ্ধি পোৱা বুলিও ৰাইজৰ অভিযোগ ।
