মৰাণ/শিলচৰ : দীপাৱলীৰ আনন্দ-উছাহৰ মাজতে নিশা ৰাজ্যৰ কেইবাটাও স্থানত ভয়ংকৰ অগ্নিকাণ্ড সংঘটিত হয় । ডিব্ৰুগড়ৰ জিলাৰ দুটাকৈ স্থানত ভয়ংকৰ অগ্নিকাণ্ড সংঘটিত হোৱাৰ খবৰ পোৱা গৈছে । নিশা মৰাণ নগৰৰ মাজমজিয়াত সংঘটিত হয় এক ভয়াৱহ অগ্নিকাণ্ড । ৩৭ নং ৰাষ্ট্ৰীয় ঘাইপথৰ কাষতে থকা দ্বাৰিকা এনক্লেভ নামৰ এটা এপাৰ্টমেণ্টৰ দ্বিতীয় মহলাত থকা 'চিল্কালেণ্ড' নামৰ কাপোৰৰ ব্যৱসায়িক প্ৰতিষ্ঠানৰ এটা গুদামত সংঘটিত হয় এই অগ্নিকাণ্ড ৷ নিশা প্ৰায় ১০.১৫ বজাত গুদামটোৰ পৰা ধোঁৱা নিৰ্গত হোৱা লক্ষ্য কৰি একাংশ স্থানীয় লোকে অগ্নিনিৰ্বাপক বাহিনীক খবৰ দিয়ে ৷
অভিশেষ মৌৰৰ মালিকাধীন দ্বাৰিকা এনক্লেভৰ দ্বিতীয় মহলাত থকা কাপোৰৰ গুদামটোত টিনৰ বেৰ আছিল ৷ আতচবাজীৰ ফিৰিঙতি আহি গুদামত পৰাৰ ফলতে অগ্নিকাণ্ডৰ সূত্ৰপাত হোৱাৰ সন্দেহ কৰিছে স্থানীয় লোকে ৷ ঘটনাস্থলীত কেইবাখনো অগ্নিনিৰ্বাপক বাহিনীৰ বাহন উপস্থিত হৈ নেৰানেপেৰা প্ৰচেষ্টাৰ অন্তত জুই নিৰ্বাপণ কৰিবলৈ সক্ষম হয় যদিও কেইবালাখ টকাৰ মূল্যৰ কাপোৰ জুইত নষ্ট হয় । মৰাণ আৰক্ষী ঘটনাস্থলীত উপস্থিত হৈ অগ্নিকাণ্ড সন্দৰ্ভত প্ৰাথমিক তদন্ত আৰম্ভ কৰিছে ৷
আনহাতে দীপাৱলীৰ দিনটোতে নিশা ডিব্ৰুগড়ৰ লালমাটিতো এক ভয়ংকৰ অগ্নিকাণ্ড সংঘটিত হয় । অগ্নিকাণ্ডত ভস্মীভূত হয় বাৰ্বী ষ্ট'ৰ নামৰ এটা শ্ব'ৰুম । শ্ব'ৰুমটোৰ স্বতাধিকাৰী পাপু দাস বুলি জানিব পৰা গৈছে । ১০ লক্ষাধিক টকাৰ সম্পত্তি নষ্ট হোৱা বুলি দাবী কৰিছে শ্ব'ৰুমটোৰ কৰ্তৃপক্ষই । অগ্নিনিৰ্বাপক বাহিনী সময়মতে উপস্থিত হৈ জুই নিৰ্বাপণ কৰিবলৈ সক্ষম হয় । অগ্নিকাণ্ড ফটকাৰ ফিৰিঙতিৰ পৰা সংঘটিত হোৱাৰ সন্দেহ কৰা হৈছে । ইফালে ঘটনাক কেন্দ্ৰ কৰি অঞ্চলজুৰি তীব্ৰ চাঞ্চল্যৰ সৃষ্টি হৈছে । আনহাতে অগ্নিকাণ্ডত আঘাতপ্ৰাপ্ত দুজন লোকক এএমচিএইছলৈ প্ৰেৰণ কৰা হৈছে ।
শিলচৰত অগ্নিকাণ্ড
দীপাৱলীৰ আনন্দ-উল্লাহৰ মাজতে কাছাৰৰ শিলচৰত আন এক অগ্নিকাণ্ড সংঘটিত হয় । শিলচৰৰ ছেকেণ্ড লিং ৰোডত সংঘটিত হয় এই অগ্নিকাণ্ড ৷ ৯ নং লেনৰ প্ৰতিমা নাথ নামৰ এগৰাকী মহিলাৰ বাসগৃহত সংঘটিত হয় এই অগ্নিকাণ্ডত । স্থানীয় লোকে হঠাৎ জুই প্ৰত্যক্ষ কৰি জুই নিয়ন্ত্ৰণৰ বাবে তৎপৰ হয় । খবৰ পোৱাৰ লগে লগে অগ্নিনিৰ্বাপক বাহিনীও ঘটনাস্থলীত উপস্থিত হয় । স্থানীয় ৰাইজ আৰু অগ্নিনিৰ্বাপক বাহিনীৰ প্ৰচেষ্টাত অৱশেষত জুই নিয়ন্ত্ৰণলৈ আহে ৷ জানিব পৰা মতে বাসগৃহটোত সেই সময়ত কোনো লোক নাছিল । জুইৰ প্ৰকৃত কাৰণ জানিব পৰা হোৱা নাই যদিও একাংশৰ সন্দেহ দীপাৱলীৰ আতচবাজীৰ পৰা জুইৰ সূত্ৰপাত হৈছে ।
লগতে পঢ়ক :অযোধ্যাত একেলগে জ্বলিল দীপাৱলীৰ ২৫ লাখ বন্তি; গঢ়িলে দুটাকৈ বিশ্ব অভিলেখ
