তেজপুৰ, 15 ফেব্ৰুৱাৰী : টাৱাঙত 74 সংখ্যক মেজৰ বব খাটিং দিৱস পালন ৷ ভাৰতীয় সশস্ত্ৰ বাহিনী, টাৱাং জিলা প্ৰশাসন আৰু টাৱাঙৰ স্থানীয় ৰাইজে অৰুণাচল প্ৰদেশৰ সীমান্তৱৰ্তী চহৰৰ টাৱাং স্মৃতিসৌধত 74 সংখ্যক মেজৰ বব খাটিং দিৱস পালন কৰে ৷ টাৱাং ব্ৰিগেডৰ সামৰিক বিষয়া, জিলা প্ৰশাসনৰ জ্যেষ্ঠ বিষয়া, ছাত্ৰ-ছাত্ৰী, নেতা, সেনাৰ প্ৰবীণ বিষয়ববীয়াই এই দিৱসত অংশগ্ৰহণ কৰে ৷ প্ৰথাগত মাল্যাৰ্পণৰ দ্বাৰা আৰম্ভ হোৱা এই কাৰ্যসূচীত ত্ৰিৰংগ উন্মোচন কৰি মেজৰ বব খাটিঙলৈ শ্ৰদ্ধা নিবেদন কৰা হয় ৷
উল্লেখ্য যে, ভাৰতীয় সেনাৰ এগৰাকী অখ্যাত সেনানী মেজৰ বব খাটিং ৷ ভাৰতৰ স্বাধীনতাৰ পাছত মেজৰ বব খাটিঙক সুদূৰ টাৱাং অঞ্চলত ভাৰতীয় প্ৰশাসন প্ৰতিষ্ঠা কৰাৰ দায়িত্ব অৰ্পণ কৰা হৈছিল ৷ 1951 চনৰ 14 ফেব্ৰুৱাৰীত প্ৰথমবাৰৰ বাবে টাৱাঙত ত্ৰিৰংগা পতাকা উত্তোলন কৰিছিল নিযুক্তিপ্ৰাপ্ত সহকাৰী ৰাজনৈতিক বিষয়া মেজৰ বব খাটিঙে ৷ তেওঁ টাৱাঙত ভাৰতীয় প্ৰশাসন স্থাপনৰ আৰম্ভণি কৰিছিল ৷ 200 জন অসম ৰাইফলছৰ সৈন্য আৰু 600 পৰ্টাৰৰ দল এটাক কঠিন অভিযানৰ নেতৃত্ব দি, ভাৰত-চীন সীমান্তৰ টাৱাঙত ভাৰতীয় অসামৰিক প্ৰশাসন আনুষ্ঠানিক প্ৰতিষ্ঠা বাস্তৱায়িত কৰিছিল তেওঁ ৷
অটল সংকল্প আৰু কূটনৈতিক সূক্ষ্মতাৰে সজ্জিত হৈ তেওঁ হিমালয়ৰ ভূখণ্ডত খোজ কাঢ়িছিল, স্থানীয় লোকৰ মাজত বিভাজন দূৰ কৰিছিল আৰু স্থানীয় জনসাধাৰণৰ মাজত আস্থা গঢ়ি তুলিছিল ৷ অক্লান্ত পৰিশ্ৰম আৰু প্ৰকৃত সহানুভূতিৰ জৰিয়তে মেজৰ খাটিঙে টাৱাঙক ভাৰতীয় ভূখণ্ডৰ সৈতে নিৰৱচ্ছিন্নভাৱে একত্ৰিত কৰি শাসন আৰু উন্নয়নৰ ভেটি স্থাপন কৰিছিল৷ তেওঁৰ কৌশলগত নেতৃত্ব আৰু ঐক্যৰ প্ৰতি দায়বদ্ধতাই মসৃণ পৰিৱৰ্তন নিশ্চিত কৰিছিল, যাৰ ফলত তেওঁ সকলোৰে সন্মান আৰু প্ৰশংসা লাভ কৰিছিল ৷
আজিও টাৱাঙে মেজৰ বব খাটিঙৰ অদম্য মনোভাৱ আৰু দূৰদৰ্শী নেতৃত্বৰ এক উজ্জ্বল দৃষ্টান্ত হিচাবে থিয় দিছে ৷ তেতিয়াৰ পৰাই ভাৰতীয় সশস্ত্ৰ বাহিনী, টাৱাং প্ৰশাসন আৰু স্থানীয় ৰাইজে প্ৰতি বছৰে এই দিৱস অতি উদ্যম আৰু উৎসাহেৰে পালন কৰি আহিছে ৷ মেজৰ বব খাটিঙক কেৱল তেওঁৰ উল্লেখযোগ্য কৃতিত্বৰ বাবেই নহয়, শান্তি, ঐক্য আৰু জাতি গঠনৰ চিৰস্থায়ী উত্তৰাধিকাৰৰ বাবেও শ্ৰদ্ধা কৰা হয় ৷
লগতে পঢ়ক : পুলৱামা আক্ৰমণৰ পঞ্চম বাৰ্ষিকী; এতিয়াও দেশবাসীৰ মনত সজীৱ দুৰ্বিষহ স্মৃতি
