গুৱাহাটী, 19 জুন: পত্নীপ্ৰেমৰ বাবেই চৰম পন্থা গ্ৰহণ কৰে 2009 বৰ্ষৰ আই পি এছ বিষয়া শিলাদিত্য চেতিয়াই ৷ দীৰ্ঘদিন ধৰি জটিল ৰোগত আক্ৰান্ত হৈ থকা বিষয়াগৰাকীৰ পত্নী আগমনী বৰবৰুৱাৰ 18 জুনৰ দিনা মৃত্যু হোৱাৰ ক্ষন্তেক সময় পাচতে ছাৰ্ভিচ ৰিভলভাৰৰে মূৰত গুলীয়াই আত্মহত্যা কৰে শীৰ্ষ আৰক্ষী বিষয়াগৰাকীয়ে ৷
অৱশ্যে দম্পতীটোৰ শেষকৃত্য কেতিয়া সম্পন্ন কৰা হ'ব, সেয়া এতিয়াও চূড়ান্ত হোৱা নাই ৷ বুধবাৰে সংবাদ মাধ্যমৰ আগত এই কথা সদৰী কৰে নেমকেয়াৰ হাস্পতালৰ স্বত্বাধিকাৰী ডাঃ হিতেশ বৰুৱাই ৷
বিশিষ্ট চিকিৎসকগৰাকীয়ে জনোৱা অনুসৰি, মৃত শীৰ্ষ আৰক্ষী বিষয়াগৰাকীৰ ভগ্নী আয়াৰলেণ্ডৰ বাসিন্দা ৷ শুকুৰবাৰে চেতিয়াৰ ভগ্নী আহি গুৱাহাটীত উপস্থিত হোৱাৰ কথা । ভগ্নী উপস্থিত নোহোৱা সন্দৰ্ভত পৰ্যন্ত শেষকৃত্যৰ দিনৰ ক্ষেত্ৰত সিদ্ধান্ত গ্ৰহণ কৰা নহ’ব বুলি জনায় বৰুৱাই ।
বিশিষ্ট চিকিৎসকগৰাকীয়ে পুনৰ কয়, "আৰু দুই ঘণ্টাৰ ভিতৰত পৰিয়ালৰ লোকে মেডিকেল কৰ্তৃপক্ষক জনাব, কেতিয়া কি কৰা হ’ব । আজিয়েই কৰা হ’ব নে শুকুৰবাৰলৈ ৰ’ব, দুঘণ্টাৰ ভিতৰত প্ৰকাশ পোৱাৰ সম্ভাৱনা আছে । যদি শুকুৰবাৰলৈ পৰিয়ালৰ লোকে অপেক্ষা কৰিবলৈ অনুৰোধ জনায়, তেন্তে নেমকেয়াৰ হাস্পতালৰ মৰ্গতে ৰখা হ’ব চেতিয়া দম্পতীৰ নশ্বৰদেহ ।
শেষকৃত্য একেলগেই সম্পন্ন কৰা হ’ব দুয়োগৰাকীৰ । শীৰ্ষ আৰক্ষী বিষয়াগৰাকীৰ পত্নী আগমণি বৰবৰুৱা চিকিৎসাধীন হৈ থকা সময়ত তেওঁৰ পৰিয়ালৰ লোকো উপস্থিত আছিল নেমকেয়াৰ হাস্পতালত । দুয়ো স্বামী-স্ত্ৰীৰ সম্পৰ্ক আছিল অতি আত্মিক ।
উল্লেখ্য যে, মঙলবাৰে সংঘটিত হৈছিল ৰাজ্যজুৰি জোকাৰণিৰ সৃষ্টি কৰা এই শোকাৱহ ঘটনাটো । পত্নীৰ মৃত্যুৰ কিছুসময়ৰ পিছতেই নিজৰ চাৰ্ভিছ পিষ্টলেৰে মূৰত গুলীয়াই হাস্পতালতেই আত্মহত্যা কৰিছিল ৰাজ্যৰ গৃহ বিভাগৰ সচিব শিলাদিত্য চেতিয়াই ।
জানিব পৰা মতে, কৰ্কট ৰোগত আক্ৰান্ত হৈ শিলাদিত্য চেতিয়াৰ পত্নী আগমণি বৰবৰুৱা বিগত দুমাহ ধৰি চিকিৎসাধীন হৈ আছিল । বিগত তিনিদিন ধৰি পত্নীৰ অৱস্থা সংকটজনক হৈ আছিল । মঙলবাৰে 4.30 বজাত চেতিয়াৰ পত্নীৰ মৃত্যু ঘটে । তেওঁ তাৰপাছতে আই চি ইউৰ ভিতৰত থকা চিকিৎসক-নাৰ্চক পত্নীৰ হকে প্ৰাৰ্থনা কৰিব বুলি জনাই উপস্থিত আটাইকে বাহিৰলৈ ওলাই যাবলৈ কৈছিল ।
ইয়াৰ পাচতেই নিজৰ চাৰ্ভিছ পিষ্টলেৰে আত্মহননৰ পথ গ্ৰহণ কৰে ৰাজ্যৰ গৃহ বিভাগৰ সচিবগৰাকীয়ে ৷ হঠাতে হোৱা প্ৰচণ্ড শব্দত চিকিৎসক-নাৰ্চে ভিতৰলৈ সোমাই গৈ চেতিয়াক মজিয়াত পৰি থকা দেখে আৰু বচাবলৈ চেষ্টা কৰে যদিও চিকিৎসকে তেওঁক মৃত ঘোষণা কৰে ৷
বিশেষ টোকা: যদি আপোনাৰ মনলৈ আত্মহত্যাৰ চিন্তা আহিছে বা আপুনি কোনো বন্ধুৰ বাবে চিন্তিত বা আপোনাক আৱেগিক সমৰ্থনৰ প্ৰয়োজন হৈছে, তেন্তে স্নেহা ফাউণ্ডেশ্যনলৈ ফোন কৰক – ০৪৪২৪৬৪০০৫০ (২৪x৭ উপলব্ধ) বা আইকল, টাটা ইনষ্টিটিউট অৱ ছ’চিয়েল চায়েন্স হেল্পলাইন – ৯১৫২৯৮৭৮২১ (সোমবাৰৰ পৰা শনিবাৰলৈ পুৱা ৮ বজাৰ পৰা নিশা ১০ বজালৈ উপলব্ধ) ।
