গুৱাহাটী, 27 জুন: 2023 চনৰ 14 ডিচেম্বৰৰ সন্ধিয়া যোৰহাটৰ লিচুবাৰীৰ সেনা ছাউনীত সংঘটিত হৈছিল গ্ৰেণেড বিস্ফোৰণৰ ঘটনা ৷ এই ঘটনাৰ সৈতে জড়িত থকা বুলি অনুমান কৰা হৈছিল আলফা(স্বা) ক ৷ ঘটনা সন্দৰ্ভত মঙলবাৰে নিয়াই আদালতত দাখিল কৰে চাৰ্জশ্বীট ৷
সেইসময়ত যোৰহাট আৰক্ষীয়ে বিস্ফোৰণৰ সৈতে জড়িত থকাৰ সন্দেহত আটক কৰিছিল তিতাবৰৰ বিৰিণাশায়েক গাড়িকুৰি গাঁৱৰ 22 বছৰীয়া যুৱক দীপাংকৰ গগৈক ৷ 21 ডিচেম্বৰৰ পৰা 24 ডিচেম্বৰৰ মাজনিশালৈকে আৰক্ষীয়ে দীপাংকৰ গগৈক নিৰ্যাতন চলোৱাৰ বিৰুদ্ধে উত্থাপিত হৈছিল ভয়ংকৰ অভিযোগ ৷ তাৰপাছতে 25 ডিচেম্বৰৰ পুৱতি নিশা ৰহস্যজনকভাৱে বাসগৃহৰ পিছফালে উদ্ধাৰ হৈছিল দীপাংকৰৰ মৃতদেহ ৷
ইয়াৰ পাছতেই দীপাংকৰৰ মৃত্যুক কেন্দ্ৰ কৰি তিতাবৰত সাব্যস্ত কৰা হৈছিল ব্যাপক প্ৰতিবাদ ৷ পৰৱৰ্তী সময়ত অসম চৰকাৰে অতিৰিক্ত মুখ্য সচিব কে চি ছামাৰিয়াক এই কাণ্ডৰ তদন্তৰ দায়িত্ব দিছিল যদিও আজিপৰ্যন্ত প্ৰকাশ নাপালে প্ৰতিবেদন ৷
ৰহস্যজনক বিষয় এয়ে যে, শেহতীয়াকৈ নিয়াই আদালতত দাখিল কৰা চাৰ্জশ্বীটত নাই দীপাংকৰ গগৈৰ নাম ৷ এই কথাক কেন্দ্ৰ কৰি পুনৰ প্ৰতিবাদ সাব্যস্ত কৰে কৃষক মুক্তি সংগ্ৰাম সমিতিয়ে ৷ এই চাৰ্জশ্বীট যে আঁসোৱাহপূৰ্ণ সেই দাবী উত্থাপন কৰিছে সংগঠনটোৱে ৷
তদুপৰি যোৰহাট আৰক্ষীয়ে নিজৰ মুখ ঢাকিবলৈকে দীপাংকৰ গগৈক নিৰ্যাতন চলাই হত্যা কৰিলে বুলি অভিযোগ উত্থাপন কৰি তদানীন্তন যোৰহাট জিলাৰ আৰক্ষী অধীক্ষক মোহনলাল মীনাক গ্ৰেপ্তাৰৰ দাবী জনাইছে কৃষক মুক্তি সংগ্ৰাম সমিতিয়ে ৷ সমান্তৰালকৈ তিতাবৰৰ মহকুমা আৰক্ষী বিষয়া কাকলি পাটগিৰি আৰু তিতাবৰ থানাৰ ভাৰপ্ৰাপ্ত আৰক্ষী বিষয়া লক্ষ্মণ কুমাৰ দাসক তৎকালীনভাৱে গ্ৰেপ্তাৰৰ দাবী জনাইছে সংগঠনটোৱে ।
