তেজপুৰ, ১৭ ছেপ্টেম্বৰ: বিশ্বকৰ্মা পূজাৰ উৎসৱমুখৰ পৰিৱেশৰ মাজতে তেজপুৰত মঙলবাৰে সংঘটিত হয় এক শোকাৱহ ঘটনা । বনকৰা মহিলাৰ চোকা অস্ত্ৰৰ আক্ৰমণত এগৰাকী মহিলা গুৰুতৰভাৱে আহত হোৱাৰ অভিযোগ উঠিছে । তেজপুৰৰ ধনোৱা নগৰৰ খেজুৰী পথৰ নিবাসী নিপ বৰাৰ ঘৰত সংঘটিত হৈছে এই ঘটনা ।
অভিযোগ অনুসৰি, আচমা খাতুন নামৰ এগৰাকী বনকৰা মহিলাই মাজে সময়ে নিপ বৰাৰ ঘৰত কাম কৰিবলৈ আহে ৷ আনদিনাৰ দৰে আজি পুৱাও ৮ বজাত আচমা নিপ বৰাৰ ঘৰত উপস্থিত হয় ৷ বিশ্বকৰ্মা পূজাৰ আয়োজন কৰা হৈছিল ঘৰখনত ৷ বৰাৰ ভাই বোৱাৰীৰ লগতে কাষৰীয়া ভাৰাঘৰৰ নিবাসী ত্ৰিদিশা ওৰফে টিনা কাশ্যপো (৩২) প্ৰসাদ গ্ৰহণৰ উদ্দেশ্যে নিপ বৰাৰ ঘৰত উপস্থিত হয় ৷ বিয়লি প্ৰায় ১-৪৫ বজাত বৰাৰ ঘৰৰ বাৰাণ্ডাত বহি ত্ৰিদিশাই প্ৰসাদ গ্ৰহণৰ কৰা পাছত খোৱাপানীৰো যোগান ধৰে আচমাই ৷
ইয়াৰ মাজতে আচমাই বৰাৰ ভাই বোৱাৰীয়েকক কৌশলেৰে ঘৰৰ ভিতৰলৈ প্ৰেৰণ কৰে ৷ কিন্তু তেওঁ ঘৰৰ ভিতৰলৈ যোৱাৰ পাছতে বাৰাণ্ডাত হুলস্থূলৰ সৃষ্টি হয় ৷ লগে লগে বৰাৰ পৰিয়ালৰ লোক ভিতৰৰ পৰা ওলাই আহি ত্ৰিদিশা কাশ্যপক ৰক্তাক্ত অৱস্থাত প্ৰত্যক্ষ কৰে ৷ তেতিয়া আচমা উক্ত স্থান নাছিল ৷ টিনাক আক্ৰমণ কৰি আচমাই পলায়ন কৰা বুলি অভিযোগ কৰে চুবুৰীয়াই ৷ ইফালে মূৰত গুৰুতৰভাৱে আঘাতপ্ৰাপ্ত ত্ৰিদিশাক লৰালৰিকৈ চুবুৰীয়া ৰাইজৰ সহযোগত সমীপৰ এখন ব্যক্তিগত খণ্ডৰ হাস্পতালত ভৰ্তি কৰোৱা হয় ৷
ইফালে ঘটনাস্থলীৰ সমীপত এখন দা পৰি থকা প্ৰত্যক্ষ কৰে গৃহস্থৰ লগতে স্থানীয় লোকে ৷ আচমাই পলায়ন কৰা হেতু সেই দাৰে আচমাই ত্ৰিদিশাক আক্ৰমণ কৰা বুলি অভিযোগ উত্থাপিত হৈছে ৷ এই ঘটনাৰ পাছতে স্থানীয় মহাভৈৰৱ আৰক্ষীয়ে তৎপৰতাৰে অভিযান চলাই আচমাক কৰায়ত্ত কৰিবলৈ সক্ষম হয় ৷ উল্লেখ্য যে, অঞ্চলটোত ভাৰাতীয়া হিচাপে থকা ত্ৰিদিশা কাশ্যপৰ স্বামী কৰ্মসূত্ৰে বৰপেটাত থাকে ৷
লগতে পঢ়ক: অস্ত্ৰধাৰী দুৰ্বৃত্তৰ আক্ৰমণত একেটা পৰিয়ালৰে শিশুসহ ৪ জন গুৰুতৰভাৱে আহত - 4 Family Members injured উদণ্ড যুৱকৰ প্ৰহাৰত প্ৰাণ গ’ল গীটাৰিষ্ট জিয়াউৰ ৰহমানৰ - Veteran guitarist Jiyaur Rahman |
ত্ৰিদিশা ওৰফে টিনাৰ সৈতে আচমাৰ পূৰ্বৰে পৰা কিবা কথাক লৈ সংঘাত বা মনোমালিন্য আছিল নেকি ? কি কাৰণত আচমাই মহিলাগৰাকীক চোকা অস্ত্ৰৰে অতৰ্কিতে আক্ৰমণ কৰিলে ? সেইয়া এই বাতৰি যুগুতোৱা পৰলৈকে জানিব পৰা হোৱা নাই ৷ আৰক্ষী তদন্ততে সমগ্ৰ ঘটনাৰ ৰহস্য পোহৰলৈ আহিব বুলি আশা কৰা হৈছে ৷
