হোজাই,৭ অক্টোবৰ : দুৰ্গা পূজালৈ মাজত মাত্ৰ এটা দিন বাকী আছে । ৰাজ্যৰ চৌদিশে দুৰ্গা পূজাৰ ব্যাপক প্ৰস্তুতিও চলিছে । শিল্পীসকলে প্ৰতিমাত অন্তিম পৰশ দিছে । ইফালে পূজা মণ্ডপসমূহো প্ৰায় সম্পূৰ্ণ হৈ উঠিছে । প্ৰতিবছৰৰ দৰে এইবাৰো ৰাজ্যত বহু ব্যতিক্ৰমী পূজা মণ্ডপ দেখিবলৈ পোৱা গৈছে । বহিঃৰাজ্যৰ শিল্পীসকলক মাতি আনি লাখ লাখ টকা খৰচ কৰি আকৰ্ষণীয় পূজা মণ্ডপ নিৰ্মাণ কৰা হৈছে ।
ৰাইজৰ শ্ৰমদানেৰে নিৰ্মাণ পূজা মণ্ডপ
অৱশ্যে তাৰ মাজতে ব্যতিক্ৰম হোজাইৰ লংকাৰ এটা পূজা মণ্ডপ । বহিঃৰাজ্যৰ শিল্পী নহয়, লংকা শ্যামবাৰী গাঁৱৰ ৰাইজৰ শ্ৰমদানেৰে নিৰ্মাণ কৰা হৈছে দুৰ্গা পূজাৰ মণ্ডপ । নিশাৰ ভাগত পূজাৰ মণ্ডপ নিৰ্মাণত ব্যস্ত গাঁওখনৰ যুৱক আৰু একাংশ লোক । কিয়নো দিনত তেওঁলোকে পূজা মণ্ডপৰ কাম কৰিব নোৱাৰে । কোনোবাজন যদি ব্যৱসায়ৰ লগত জড়িত, কোনোৱে আকৌ দিনত কৰ্মস্থলীলৈ যায় । দিনৰ কৰ্মব্যস্ততাৰ বাবে যুৱকসকলে সময় দিব নোৱাৰে । সেয়ে নিশা আহি সকলো পূজা মণ্ডপ নিৰ্মাণত জড়িত হৈ পৰে ।
উল্লেখ্য যে ৫০ বছৰ অতিক্ৰম কৰা ১ নং শ্যামবাৰী দুৰ্গা পূজা কমিটীয়ে প্ৰতি বছৰে ৰাইজৰ বাবে নতুন আৰ্হিত নিৰ্মাণ কৰে পূজা মণ্ডপ । এইবাৰ বিহাৰৰ এটি বিখ্যাত কালী মন্দিৰৰ আৰ্হিত নিৰ্মাণ কৰা হৈছে পূজা মণ্ডপ । লগতে ভগৱান শ্ৰীকৃষ্ণৰ জীৱনৰ আধাৰত এক প্ৰদৰ্শনীৰো ব্যৱস্থা কৰা হৈছে । এই পূজা মণ্ডপে বিগত বছৰসমূহত জিলাখনৰ ৰাইজক আকৰ্ষণ কৰা লগতে জিলা তথা লংকা পৌৰসভাৰ ফালৰ পৰা বহুবাৰ শ্ৰেষ্ঠ পূজা মণ্ডপ হিচাপে সন্মান লাভ কৰিবলৈও সক্ষম হৈছে ।
লগতে পঢ়ক :দুৰ্গা প্ৰতিমা দান কৰি মজিব আলীয়ে দেখুৱাইছে সম্প্ৰীতিৰ নিদৰ্শন - Communal harmony in Durga Puja
