যোৰহাট,২৬ মাৰ্চ: মঙলবাৰে ৰাজ্যৰ কেইবাটাও সমষ্টিত মনোনয়ন পত্ৰ দাখিল কৰে কেইবাগৰাকীও প্ৰাৰ্থীয়ে । সমান্তৰালভাৱে যোৰহাট লোকসভা সমষ্টিৰ কংগ্ৰেছ প্ৰাৰ্থী গৌৰৱ গগৈয়ে দাখিল কৰে মনোনয়ন পত্ৰ । প্ৰায় দুই সহস্ৰাধিক কৰ্মী তথা শুভাকাংক্ষীক লগত লৈ বৰ্তমানৰ কলিয়াবৰ লোকসভা সমষ্টিৰ সাংসদগৰাকীয়ে দাখিল কৰে মনোনয়ন পত্ৰ । সাংসদ প্ৰাৰ্থীগৰাকীয়ে মনোনয়ন দাখিল কৰিবলৈ যোৱাৰ পথত বিৰাজ কৰে এক মনোৰম পৰিৱেশ ।
মনোনয়ন পত্ৰ দাখিল কৰি গৌৰৱ গগৈয়ে সমবেত হোৱা ৰাইজক উদ্দেশ্যি ভাষণ প্ৰদান কৰাৰ পূৰ্বে জনপ্ৰিয় কণ্ঠশিল্পী নীল আকাশৰ গীতৰ তালে তালে নাচি বাগি আত্মহাৰা হৈ পৰা পৰিলক্ষিত হয় । প্ৰাৰ্থীগৰাকীৰ সমানে সমানে এপাক নাচিলে উপস্থিত থকা কংগ্ৰেছ কৰ্মী-সমৰ্থকসকলেও । আনহাতে গৌৰৱ গগৈয়ে আজি মনোনয়ন পত্ৰ দাখিল কৰাৰ সময়ত তেওঁক সংগ দিবলৈ যোৰহাট লোকসভা সমষ্টিৰ বিভিন্ন প্ৰান্তৰ পৰা গাঁঠিৰ ধন ভাঙি ওলাই আহিল সাধাৰণ ৰাইজ ।
গৌৰৱ গগৈয়ে পূৰ্বে সদনত অসমৰ সমস্যাসমূহক লৈ বলিষ্ঠভাৱে দাঙি ধৰা বক্তব্যক উচ্চ প্ৰশংসা কৰে ৰাইজে । তাৎপযপূৰ্ণ যে গৌৰৱ গগৈয়ে আজি মনোনয়ন দাখিল কৰাৰ সময়ত যোৰহাটত দেখিবলৈ পোৱা গ'ল ব্যাপক জনসমুদ্ৰ । আনহাতে গৌৰৱ গগৈয়ে মনোনয়ন পত্ৰ দাখিল কৰা ক্ষণৰ সাক্ষী হ'বলৈ যোৰহাটবাসী ৰাইজ স্বতস্ফুতভাৱে ওলাই অহা দেখা গ'ল । ইফালে বুধবাৰে মুখ্যমন্ত্ৰী ড৹ হিমন্ত বিশ্ব শৰ্মাৰ উপস্থিতিত যোৰহাট লোকসভা সমষ্টিৰ বিজেপি প্ৰাৰ্থী তপন গগৈয়ে মনোনয়ন পত্ৰ দাখিল কৰিব আৰু কাইলৈৰ দিনটোতো যোৰহাটত ব্যাপক জনসমুদ্ৰ দেখিবলৈ পোৱা যাব বুলি ব্যাপক চৰ্চা লাভ কৰিছে ।
লগতে পঢ়ক: মুখ্যমন্ত্ৰী-দলীয় সভাপতিক কাষত লৈ মনোনয়ন দাখিল সৰ্বানন্দ সোণোৱালৰ - LOK SABHA ELECTION 2024
