মৰাণ, ১১ আগষ্ট: সমাগত স্বাধীনতা দিৱসক লৈ দেশজুৰি ব্যাপক প্ৰস্তুতি । প্ৰতি বছৰৰ দৰে এইবাৰো বিভিন্ন কাৰ্যসূচীৰে ৰাজধানী দিল্লীত অনুষ্ঠিত হ'ব স্বাধীনতা দিৱস । স্বাধীনতা দিৱসক লৈ আৰক্ষীৰ সেনা বাহিনীৰ পৰা আৰম্ভ কৰি চৰকাৰৰ বিভিন্ন বিভাগসমূহে আৰম্ভ কৰিছে প্ৰস্তুতি ।
এইবাৰ ৭৮ সংখ্যক স্বাধীনতা দিৱস উপলক্ষে ৰাজধানী দিল্লীত আয়োজিত অনুষ্ঠানত দেশৰ বিভিন্ন ৰাজ্যৰ ছাত্ৰ-ছাত্ৰীৰ লগতে অসমৰ আগশাৰী বিশ্ববিদ্যালয়-মহাবিদ্যালয়ৰ এন এছ এছ গোটৰ ৮ গৰাকী ছাত্ৰ-ছাত্ৰীয়ে বিশেষ অতিথি হিচাপে অংশগ্ৰহণ কৰিবলৈ সুবিধা লাভ কৰিছে ।
ইয়াৰ মাজতে অসমক প্ৰতিনিধিত্ব কৰা এই দলটোত মৰাণ মহাবিদ্যালয়ৰ ৰাজনীতি বিজ্ঞান বিভাগৰ পঞ্চম ষান্মাষিকৰ ছাত্ৰী তথা টিংখাং সমষ্টিৰ অন্তৰ্গত লেঙেৰীৰ ২ নং বৰপথাৰ গাঁৱৰ নিবাসী হেমচন্দ্ৰ গগৈ আৰু দিপ্তী গগৈৰ কন্যা গংগা গগৈক বাচনি কৰা হৈছে । যাৰ বাবে উৎফুল্লিত হৈ পৰিছে মৰাণবাসী । গংগা গগৈ মৰাণ মহাবিদ্যালয়ৰ ৰাষ্ট্ৰীয় সেৱা আঁচনিৰ এগৰাকী কৰ্মী ।
দিল্লীত অনুষ্ঠিত স্বাধীনতা দিৱসত বিশেষ অতিথি হিচাপে অংশগ্ৰহণ কৰিবলৈ পোৱাতো সৌভাগ্য বুলি মন্তব্য প্ৰকাশ কৰিছে ছাত্ৰীগৰাকীয়ে সংবাদ মাধ্যমৰ আগত । উল্লেখযোগ্য যে ডিব্ৰুগড় বিশ্ববিদ্যালয়ৰ অন্তৰ্গত মৰাণ মহাবিদ্যালয়ৰ NSS গোট তথা ৰাষ্ট্ৰীয় সেৱা আঁচনি অতি শক্তিশালী ।
মৰাণ মহাবিদ্যালয়ৰ NSS গোটে বিভিন্ন ধৰণৰ কাৰ্যসূচীত অংশগ্ৰহণ কৰি ৰাইজৰ পৰা প্ৰশংসা লাভ কৰিবলৈ সক্ষম হৈছে আৰু মৰাণ মহাবিদ্যালয়ত নামভৰ্তি কৰা পাচতেই NSS গোটত নিজক অন্তৰ্ভুক্ত কৰি অধ্যয়নৰ মাজতে মেধাৱী ছাত্ৰীগৰাকীয়ে NSS গোটত সেৱা আগবঢ়াই আহিছিল ।
