কলিয়াবৰ, 10 জুন : কলিয়াবৰত বানত ক্ষতিগ্ৰস্ত লোকৰ প্ৰতিবাদ ৷ ক্ষতিপূৰণৰ পৰা বঞ্চিত হোৱাৰ অভিযোগত এই প্ৰতিবাদ বানত ক্ষতিগ্ৰস্তসকলৰ ৷ বঞ্চিতসকলক ক্ষতিপূৰণ দিয়াৰ ব্যৱস্থা কৰাৰ লগতে বৈষম্যমূলক বিতৰণৰ বিপৰীতে সমদৃষ্টিৰে, সমভাৱে প্ৰকৃত ক্ষতিগ্ৰস্তক ক্ষতিপূৰণ দিবলৈ ৰাইজে পুনৰ দাবী জনাইছে ৷
ৰাইজৰ অভিযোগ অনুসৰি কলিয়াবৰত বানত ক্ষতিগ্ৰস্ত ৰাইজৰ মাজত সাত বছৰৰ পাচত সাহায্য হিচাবে বিতৰণ কৰা হৈছিল 19 কোটি 50 লাখ টকাৰ ধন ৷ কিন্তু চৰম বিসংগতিৰে প্ৰকৃত ক্ষতিগ্ৰস্তক বঞ্চিত কৰি বান সাহাষ্য বিতৰণ হোৱাৰ অভিযোগ উত্থাপন কৰি আজি কেবাখনো গাঁৱৰ ক্ষোভিত ৰাইজে কলিয়াবৰ চক্ৰ বিষয়াৰ কাৰ্যালয়ত প্ৰতিবাদ সাব্যস্ত কৰে ৷ কলিয়াবৰ চক্ৰ বিষয়াৰ কাৰ্যালয়ত শতাধিক লোকে প্ৰতিবাদ সাব্যস্ত কৰে ৷ বানৰ ক্ষতিপূৰণ বিচাৰি বঞ্চিত ক্ষতিগ্ৰস্ত লোকে ভিৰ কৰেহি চক্ৰ বিষয়াৰ কাৰ্যালয়ত ৷
2017 চনৰ আগষ্ট মাহত হাতীমূৰাৰ মথাউৰি ভাঙি সৃষ্টি হোৱা প্ৰলয়কাৰী বানত ক্ষতিগ্ৰস্ত হৈছিল কলিয়াবৰৰ বহু পৰিয়াল ৷ কিন্ত সেই বানৰ ক্ষতিপূৰণ প্ৰদান কৰোঁতে চৰকাৰ-প্ৰশাসনক লাগিল 7 বছৰ সময় ৷ তাৰ পাচতো বানৰ ক্ষতিপূৰণ প্ৰদানত বহু বিসংগতি হোৱাৰ অভিযোগ একাংশ ক্ষতিগ্ৰস্ত লোকৰ ৷ প্ৰকৃত ক্ষতিগ্ৰস্তক বঞ্চিত কৰাৰ অভিযোগ ভুক্তভোগী ৰাইজৰ ৷
শেহতীয়াকৈ মাৰ্চ মাহত একাংশ বান ক্ষতিগ্ৰস্তই বেংক একাউণ্টযোগে চৰকাৰীভাৱে লাভ কৰে ক্ষতিপূৰণৰ ধন ৷ তাৰ বিপৰীতে বহু ক্ষতিগ্ৰস্তই আজি পৰ্যন্ত লাভ কৰা নাই ক্ষতিপূৰণ ৷ যাৰ বাবে বাৰম্বাৰ চক্ৰ বিষয়াৰ কাৰ্যালয়লৈ তাঁত-বাতি কৰিবলগীয়া হৈছে এইসকল বঞ্চিত লোকে ৷ সোমবাৰে জখলাবন্ধাৰ দেৱসত্ৰ, শেনচোৱা, কটিয়ৰী, ঢেকীয়াল গাঁৱৰ দুই শতাধিক লোকে ক্ষতিপূৰণৰ দাবীত পুনৰ ভিৰ কৰেহি কলিয়াবৰ চক্ৰ বিষয়াৰ কাৰ্যালয় ৷
লগতে পঢ়ক : মহানগৰীত দাম বৃদ্ধিৰ বিৰুদ্ধে চি পি আইৰ প্ৰতিবাদ - Protest in Guwahati
