হাফলং, 4 আগষ্ট : ডিমা হাছাও জিলাৰ উমৰাংচু ডালমিয়া চিমেন্ট ফেক্টৰীত সংঘটিত হৈছে ভয়ংকৰ দুৰ্ঘটনা ৷ এই দুৰ্ঘটনাটোত 5 গৰাকীকৈ শ্ৰমিকৰ মৃত্যু হোৱা বুলি আশংকা প্ৰকাশ কৰা হৈছে । লগতে সাতগৰাকী শ্ৰমিক গুৰুতৰভাৱে আহত হৈছে বুলি জানিব পৰা গৈছে । লক্ষণীয় বিষয় যে, বাতৰি যুগুত কৰা পৰলৈকে ডালমিয়া চিমেন্ট কৰ্তৃপক্ষই এই সন্দৰ্ভত কোনো মন্তব্য প্ৰকাশ কৰা নাই ।
জানিব পৰা মতে, উমৰাংচু ডালমিয়া চিমেন্ট ফেক্টৰীৰ দ্বিতীয়টো লাইনত নতুন প্ৰকল্পৰ কাম আৰম্ভ হৈছে । শনিবাৰে বিয়লি ভাগত ডালমিয়া চিমেণ্টৰ নতুনকৈ কাম আৰম্ভ হোৱা দ্বিতীয়টো লাইনত ক্ৰেং টাৱাৰ ভাঙি যায় ৷ ফলত 5 গৰাকী শ্ৰমিকৰ মৃত্যু হোৱা বুলি আশংকা কৰা হৈছে । ইয়াৰ লগতে আন সাতগৰাকী শ্ৰমিক গুৰুতৰভাৱে আহত হোৱা বুলি জানিব পৰা গৈছে ৷
লগতে পঢ়ক : ঝাৰখণ্ডত ৰে'ল দুৰ্ঘটনা : দুগৰাকী যাত্ৰী নিহত - Jharkhand train accident
ঘটনা সংঘটিত হোৱাৰ পাচতে ততাতৈয়াকৈ আহতসকলক হোজাইৰ হাম হাস্পতালত ভৰ্তি কৰোৱা হয় । জানিব পৰা মতে, পাইলেন নামৰ এটা সংস্থাৰ অধীনত উমৰাংচুৰ ডালমিয়া চিমেন্ট দুই নম্বৰ লাইনৰ নতুন প্ৰকল্পৰ কাম চলি আছে ৷ এই কাম দিনে-নিশাই চলি আছে বুলি জানিব পৰা গৈছে ।
কিন্তু ইয়াৰ মাজতে শনিবাৰে সন্ধিয়া সংঘটিত হয় এই অঘটনটো ৷ ইফালে এই সমগ্ৰ ঘটনাটো ডালমিয়া চিমেন্ট ফেক্টৰীয়ে গাপ দিবলৈহে চেষ্টা কৰিছে বুলি অভিযোগ উত্থাপন হৈছে ।
উল্লেখনীয় বিষয় যে, এই দুৰ্ঘটনাটোৰ খবৰ লাভ কৰাৰ পাচতে স্থানীয় সংবাদকৰ্মীসকল সংবাদ সংগ্ৰহৰ বাবে ডালমিয়া চিমেন্ট ফেক্টৰীটোত উপস্থিত হয় ৷ কিন্তু ডিমা হাছাও আৰক্ষীয়ে সংবাদকৰ্মীসকলক ডালমিয়া চিমেন্ট ফেক্টৰী চৌহদত প্ৰৱেশ কৰিবলৈ বাধা প্ৰদান কৰে ৷
বিতং খবৰৰ অপেক্ষাত...
