গুৱাহাটী,১ অক্টোবৰ: স্বাধীনতা দিৱসৰ দিনা গুৱাহাটীকে ধৰি ৰাজ্যৰ বিভিন্ন স্থানত বোমা সংস্থাপন কৰা আৰু বোমা কঢ়িওৱা প্ৰায়খিনি লোককে গ্ৰেপ্তাৰ কৰা হৈছে । এই কথা সদৰী কৰে অসম আৰক্ষীৰ সঞ্চালক প্ৰধান জি পি সিঙে । মঙলবাৰে গুৱাহাটীত সংবাদ মাধ্যমৰ আগত আলফা স্বাধীনৰ দ্বাৰা স্বাধীনতা দিৱসৰ দিনা ৰাজ্যৰ বিভিন্ন স্থানত বোমা সংস্থাপন কৰা ঘটনা সন্দৰ্ভত এইদৰে প্ৰতিক্ৰিয়া ব্যক্ত কৰে ডি জি পি জি পি সিঙে ।
আৰক্ষী সঞ্চালক প্ৰধান সিঙে কয়,"বোমা কঢ়িওৱা আৰু সংস্থাপন কৰা সন্দৰ্ভত গ্ৰেপ্তাৰ কৰা লোকসকলে নিজৰ দায়িত্ব স্বীকাৰ কৰিছে । মই এটাই কথা ক'ব বিচাৰিছো যে অসমলৈ ঘূৰি অহা শান্তি বৰ্তাই ৰখাৰ বাবে মই সকলোৰে প্ৰতি আহ্বান জনাইছো । যিখিনি ল'ৰাই এই বোমা সংস্থাপন কৰিছিল তাৰ প্ৰায়খিনি অসমত থকা অভাৰগ্ৰাউণ্ড ৱৰ্কাৰ । লাভ কৰা তথ্য আৰু মোৰ 'নিয়া'ৰ অভিজ্ঞতাৰ পৰা এটা কথা ক'ব পাৰো যে তেওঁলোকৰ নিশ্চিতভাৱে ক'নভিকচন হ'ব । তেওঁলোকে অপ্ৰত্যাশিতভাৱে নিজৰ জীৱনটো নষ্ট কৰিব বিচাৰিছে ।"
তেওঁ লগতে কয়,"যিসকল এতিয়াও এই কাৰ্যত জড়িত হৈ আছে তেওঁলোকক মই আঁতৰি আহিবলৈ আহ্বান জনাইছো । আমি বহু তথ্য লাভ কৰিছো আৰু একচন লোৱা হ'ব । আমি এতিয়ালৈকে যিসকলক গ্ৰেপ্তাৰ কৰিছো, টেকনিকেল তথ্যৰ আধাৰত গ্ৰেপ্তাৰ কৰিছো । আমাৰ হাতত যথেষ্ট শক্তিশালী তথ্য আছে আৰু আমি সেইবোৰ আদালতত দাখিল কৰিম । কিছুমানে বোমা স্থাপন কৰিছে, কিছুমানে বোমা আনিছে, কিছুমানে বোমা অনা মানুহ হায়াৰ কৰিছে, কিছুমানে পইচা সৰবৰাহ কৰিছে আৰু এনেকে এটা ডাঙৰ নেটৱৰ্ক আছে । সেই নেটৱৰ্কটো আমি সম্পূৰ্ণ ৰূপে উলিয়াইছো । সকলোৰে ভূমিকা সন্দৰ্ভত আমি আদালতত শ্বাৰ্জশ্বিট দিম ।"
আনহাতে পলাতক হৈ থকা প্ৰৱঞ্চক দীপাংকৰ বৰ্মন সন্দৰ্ভত ডি জি পিয়ে কয়,"কিমান দিন পলাই থাকিব । মই আগতেই কৈছো যে যিয়েই নহওক কিয় কোনো সাৰি যাব নোৱাৰে । ডিজিটেল বেচড ডাটা আছে । সকলো তথ্য ডিজিটেলী আছে । সকলো বিভাগ একেলগ হৈ কাম কৰি আছো । গতিকে কোনো কাৰণতে কোনো পধ্যেই সাৰি কোনো যাব নোৱাৰে । দুদিন অগাপিছাকৈ ধৰা পৰিব আৰু ক'নভিকচনো হ'ব ।"
প্ৰৱঞ্চক স্বপ্ননীল দাসৰ প্ৰসংগত ডিজিপিয়ে কয়,"প্ৰতিটো গোচৰত সেইধৰণে একচন লোৱা হ'ব । কোনো সাৰি যাব নোৱাৰে । ডিজিটেল তথ্যৰ ভিত্তিত তদন্ত চলাই থকা হৈছে । ইয়াত ফিজিকেল নাইবা অ'ৰেল তথ্যৰ প্ৰয়োজন নাই । সকলো ডিজিটেল আৰু গতিকে কোনো সাৰি যাব নোৱাৰে ।" লগতে ধৃত দুলাল বৰা প্ৰসংগত ডি জি পিয়ে কয়, "আপোনালোকে খুচৰিলে সকলো গম পাব । আজি নহয় বহু আগৰ পৰা কাহিনীটো চলি আছে । একচন হৈ আছে । আগতেও জেল খাটি আহিছে । আইনগতভাৱে ব্যৱস্থা লোৱা হ'ব ।"
