বিলাসীপাৰা, 29 মে’ : ৰাজ্যৰ ভিন্ন ৰেমলৰ ত্ৰাসে আতংকিত কৰিছে ৰাজ্যবাসীক ৷ সাগৰীয় ঘূৰ্ণিবতাহ ৰেমলৰ বাবে দেওবাৰৰ নিশাৰে পৰা ৰাজ্যজুৰি অব্যাহত আছে ধুমুহা-বৰষুণৰ তাণ্ডৱ । নিশাৰে পৰা হোৱা প্ৰবল ধুমুহা আৰু বৰষুণৰ ফলত ৰাজ্যৰ বিভিন্ন প্ৰান্তত বিস্তৰ ক্ষয়-ক্ষতি হৈছে । বিভিন্ন স্থানত গছ বাগৰি পৰাৰ ফলত সংঘটিত হৈছে বহুকেইটা ঘটনা । মঙলবাৰে পুৱাৰ ভাগত মৰিগাঁও জিলাত চলন্ত অট’ত গছ বাগৰি এগৰাকী কলেজীয়া শিক্ষাৰ্থীয়ে মৃত্যুক আঁকোৱালি খবৰৰ পিচতে এইবাৰ ধুবুৰী জিলাৰ বিলাসীপাৰাত সংঘটিত হৈছে তেনে এক ঘটনা ৷
ৰেমলৰ প্ৰচণ্ড ধুমুহাৰ ফলত পথত বাগৰি পৰিল শিক্ষাৰ্থী কঢ়িয়াই অনা অট’ৰিক্সা । অট’ৰিক্সাখন বাগৰাৰ ফলত থিতাতে নিহত হয় 7 বছৰীয়া এটি কণমানি ৷ কণমানিটো বিলাসীপাৰা চহৰত অৱস্থিত শংকৰদেৱ শিশু আৰু বিদ্যা নিকেতনৰ প্ৰথম শ্ৰেণীৰ ছাত্ৰ বুলি জানিব পৰা গৈছে ৷ মৃত কণমানিটোৰ নাম শুভংকৰ বৰ্মন ৷
আনহাতে এই দুৰ্ঘটনাত আহত হয় অট’ৰিক্সাত থকা আন চাৰিগৰাকী শিক্ষাৰ্থী ৷ ইয়াৰোপৰি মৃত শুভংকৰৰ মাতৃৰ অৱস্থা সংকটজনক বুলি জানিব পৰা গৈছে । শুভংকৰৰ মাতৃক সংকটজনক অৱস্থাত কোকৰাঝাৰ অসামৰিক চিকিৎসালৈ প্ৰেৰণ কৰা হৈছে ৷
