সৰুপথাৰ: সৰুপথাৰত সোমবাৰে মুখ্যমন্ত্ৰী ড৹ হিমন্ত বিশ্ব শৰ্মাই কেইবাটাও শুভ উদ্বোধনীৰ লগতে আধাৰশিলাৰ অনুষ্ঠানত অংশগ্ৰহণ কৰে । সৰুপথাৰক সমজিলা ঘোষণাৰ পিছত প্ৰথমবাৰৰ উপস্থিত হৈ মুখ্যমন্ত্ৰীগৰাকীয়ে প্ৰথমে কুশল কোঁৱৰ ষ্টেডিয়ামৰ লগতে নতুনকৈ নিৰ্মাণ কৰা এটি ইনড'ৰ ষ্টেডিয়ামৰ শুভ উদ্বোধন কৰে । মুখ্যমন্ত্ৰীগৰাকীয়ে ইয়াৰ পিচতেই সৰুপথাৰ কুশল কোঁৱৰ ষ্টেডিয়ামত এটি চুইমিং পুলৰ আধাৰশিলা স্থাপন কৰে ।
মুখ্যমন্ত্ৰীগৰাকীয়ে লগতে সৰুপথাৰ মণ্ডল বিজেপি কাৰ্যালয়ৰ এটি সভাগৃহৰো শুভ উদ্বোধন কৰে । সমান্তৰালকৈ তেওঁ সৰুপথাৰ ছেৱাগুৰিস্থিত এটি গ্ৰাম্য ষ্টেডিয়াম উদ্বোধন কৰে । সৰুপথাৰত বিধায়ক বিশ্বজিৎ ফুকনৰ তত্বাৱধানত পোন্ধৰ কোটি টকা ব্যয় সাপেক্ষে নতুনকৈ নিৰ্মাণ কৰা সৰুপথাৰ সমজিলাৰ অসামৰিক চিকিৎসালয়খনো উদ্বোধন কৰে । লগতে মুখ্যমন্ত্ৰীগৰাকীয়ে অসামৰিক চিকিৎসালয়তে নুমলীগড় তেল শোধনাগাৰৰ চি এছ আৰ পুঁজিৰ দ্বাৰা নিৰ্মাণ কৰা এটি অক্সিজেন প্লেন্টৰ শুভ উদ্বোধন কৰে ।
ইনড'ৰ ষ্টেডিয়াম শুভ উদ্বোধন কৰাৰ সময়ত বক্সাৰ লাভলীনা বৰগোহাঁই, লনবল খেলুৱৈ নয়নমণি শইকীয়া, আন্তঃৰাষ্ট্ৰীয় খেলুৱৈ যমুনা বড়ো, অসমৰ একমাত্ৰ মহিলা চেইলৰ নিশামনি বৰা উপস্থিত থাকি সহযোগিতা আগবঢ়ায় । শুভ উদ্বোধনী অনুষ্ঠানত মুখ্যমন্ত্ৰীৰ লগতে সাংসদ কামাখ্যা প্ৰসাদ তাছা, স্থানীয় বিধায়ক বিশ্বজিৎ ফুকন আৰু গোলাঘাট জিলাৰ আয়ুক্ত, আৰক্ষী অধীক্ষক উপস্থিত থাকে ।
ধৰ্মীয় গোড়ামিৰ ওপৰত নিৰ্মাণ হোৱা দেশে হিন্দুক সুৰক্ষা দিব নোৱাৰে :
মুখ্যমন্ত্ৰীগৰাকীয়ে বাংলাদেশ সম্পৰ্কে কেতবোৰ গুৰুত্বপূৰ্ণ মন্তব্য আগবঢ়াই কয়, " পূৰ্বতে পাকিস্তানত সংখ্যালঘু হিন্দুৰ ওপৰত আক্ৰমণ হৈছিল । এতিয়া মুছলমান দেশ বাংলাদেশত সংখ্যালঘু হিন্দুৰ ওপৰত হোৱা আক্ৰমণে আমাক বেদনাসিক্ত কৰি তুলিছে । যি দেশে ধৰ্মীয় গোড়ামি কৰে, ধৰ্মীয় গোড়ামিৰ ওপৰত নিৰ্মাণ হোৱা দেশে হিন্দুক সুৰক্ষা দিব নোৱাৰে ।"
