গুৱাহাটী: উন্নয়নৰ ভৰত যেন স্তব্ধ হৈ পৰিছে গুৱাহাটী মহানগৰ । আন্তঃগাঁথনিৰ উন্নয়ন বনাম বৌদ্ধিক উন্নয়নৰ যুঁজখনত যেন পিছুৱাবলৈ বাধ্য হৈছে বৌদ্ধিক উন্নয়ন । বছৰটো অপেক্ষা কৰি ৰৈ থকা গুৱাহাটী মহানগৰীৰ একমাত্ৰ বৃহৎ গ্ৰন্থমেলাৰ স্থানক লৈ অনিশ্চয়তাই দেখা দিছে । অসম প্ৰকাশন পৰিষদে চৰকাৰীভাৱে আয়োজন কৰা গ্ৰন্থমেলাখন এইবৰ্ষত ক’ত অনুষ্ঠিত হ’ব সেয়া এতিয়াও ঠিৰাং কৰিব পৰা নাই ৷ গুৱাহাটীত হ’বলগীয়া অসম গ্ৰন্থমেলাৰ স্থানক লৈ অনিশ্চয়তাত আয়োজক অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থা ।
বিগত প্ৰায় দুই দশক ধৰি চানমাৰী অভিযান্ত্ৰিক প্ৰতিষ্ঠানৰ খেলপথাৰত অনুষ্ঠিত হৈ আহিছিল দুখনকৈ গ্ৰন্থমেলা । অসম প্ৰকাশন পৰিষদৰ গুৱাহাটী গ্ৰন্থমেলা আৰু সদৌ অসম পুথি প্ৰকাশক আৰু বিক্ৰেতা সংস্থাৰ উত্তৰ-পূৱ গ্ৰন্থমেলা । পৰৱৰ্তী সময়ত অসম চৰকাৰৰ পৃষ্ঠপোষকতাত দুয়োখন গ্ৰন্থমেলাৰ বিলুপ্তি ঘটাই শেহতীয়াভাৱে অসম গ্ৰন্থমেলা আৰম্ভ কৰিছিল ৷ কিন্তু এইবাৰ গুৱাহাটী মহানগৰীত চলি থকা নিৰ্মাণকাৰ্যৰ বাবে অনিশ্চয়তাত পৰিছে অসম গ্ৰন্থমেলা অনুষ্ঠিত হ’ব নে নাই ?
নুনমাটিৰ পৰা দীঘলীপুখুৰীলৈ নিৰ্মীয়মান উৰণ সেতুৰ বাবে চানমাৰি অভিযান্ত্ৰিক প্ৰতিষ্ঠানৰ খেলপথাৰকলৈও সিদ্ধান্তত উপনীত হ’ব পৰা নাই অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থা ৷ কিয়নো সেই ঠাইখিনিত নিৰ্মাণকাৰ্য হৈ থকাৰ বাবে গ্ৰন্থমেলা আয়োজন কৰিব পৰা পৰিৱেশ নাই চানমাৰিত ৷ আনহাতে গণতন্ত্ৰ দিৱসৰ বাবে খানাপাৰা খেলপথাৰৰ অনুমতি প্ৰশাসনৰ পৰা লাভ কৰা নাই আয়োজক সমিতিয়ে ৷ এই কথা জনাইছে অসম প্ৰকাশন পৰিষদৰ সচিব প্ৰমোদ কলিতায়ে ।
অৱশ্যে প্ৰকাশন পৰিষদৰ সচিবগৰাকীয়ে জনায়, “আমি সোনকালেই সিদ্ধান্ত লাভ কৰিম ৷ যদি গণতন্ত্ৰ দিৱসৰ বাবে খানাপাৰাৰ খেলপথাৰত অসম গ্ৰন্থমেলা আয়োজন কৰিবলৈ সক্ষম নহয়, তেন্তে চানমাৰীতেই আমি আয়োজন কৰিম ৷ গ্ৰন্থমেলাৰ স্থান থিৰাং নহ’লেও আমাৰ আয়োজন পূৰ্ণোদ্যমে চলি আছে ৷ চানমাৰীত ইতিমধ্যে বুক হৈয়েই আছে । লোক নিৰ্মাণ বিভাগৰ সৈতে কথা পাতি উৰণ সেতুৰ নিৰ্মাণকাৰ্য চলি থকা ঠাইখিনি আমি মুকলি কৰি ল’ব পাৰিম ৷” অৱশ্যে আয়োজক সমিতিৰ প্ৰথম পছন্দ খানাপাৰা খেলপথাৰ ৷
লগতে, প্ৰকাশন পৰিষদৰ সচিব প্ৰমোদ কলিতাই জনায় যে অহা পাঁচ নৱেম্বৰৰ পৰা সাতদিনীয়াকৈ দুলীয়াজানত অনুষ্ঠিত হ’ব অসম গ্ৰন্থমেলা । সমান্তৰালভাবে যোৰহাট আৰু নলবাৰীতো অনুষ্ঠিত হ’ব অসম গ্ৰন্থমেলা ৷ ১৫ নৱেম্বৰৰ পৰা যোৰহাট আৰু ১৬ নৱেম্বৰৰ নলবাৰীত অনুষ্ঠিত হ’ব অসম গ্ৰন্থমেলা ।
লগতে পঢ়ক: বৰপেটাত ৰাজ্যপালে মুকলি কৰিলে তৃতীয় ৰাষ্ট্ৰীয় গ্ৰন্থ আৰু বিজ্ঞান মেলা
