ডিব্ৰুগড়, 20 মে’ : বুঢ়ীদিহিং নদীত নিৰ্মাণৰত অৱস্থাতে ভাঙি পৰিল দলঙৰ খুটা ৷ ডিব্ৰুগড় জিলাৰ নাহৰকটীয়াত নতুনকৈ নিৰ্মাণ হৈ থকা দলঙৰ কামত ব্যাপক বিসংগতিৰ অভিযোগ ৷ নাহৰকটীয়াৰ জয়পুৰৰ নগাঘাটৰ পৰা টিপামলৈ বুঢ়ীদিহিং নদীৰ ওপৰত নিৰ্মাণ হৈ থকা দলঙখনৰ নিৰ্মাণত ব্যাপক বিসংগতিৰ অভিযোগ উত্থাপন কৰিছে স্থানীয় ৰাইজ তথা দল-সংগঠনে ৷ ৰাইজৰ বহু প্ৰতিবাদৰ অন্তত নিৰ্মাণ হোৱা দলঙখনৰ কাম ভাৰতীয় ইনফ্ৰা প্ৰজেক্ট লিমিটেড নামৰ এটা কোম্পানীয়ে লাভ কৰিছে ৷ কিন্তু নিৰ্মীয়মান অৱস্থাতে দলঙখনৰ দুটাকৈ খুটা হাউলি পৰাত চিন্তিত হৈ পৰিছে সচেতন ৰাইজ ৷
ঠিকাদাৰী প্ৰতিষ্ঠানৰ এইধৰণৰ নিম্নমানৰ কামক লৈ ক্ষোভিত হৈ পৰিছে ৰাইজৰ লগতে দল-সংগঠন ৷ এই খবৰ ৰাজহুৱা হোৱাৰ পাচতেই দলঙখনৰ নিৰ্মাণত হোৱা গাফিলতি আৰু কামৰ নমুনা পৰ্যবেক্ষণ কৰিবলৈ নাহৰকটীয়া ছাত্ৰ সন্থাই ৰাইজৰ অভিযোগ অনুসৰি দেওবাৰে দলং নিৰ্মাণস্থলীত উপস্থিত হয় ৷ কিন্তু আছুৰ দলটো পৰ্যবেক্ষণ কৰিবলৈ গৈ দলং নিৰ্মাণ কাৰ্যত জড়িত বিষয়াক প্ৰশ্ন কৰাত তেওঁ সমগ্ৰ ঘটনাটোক লৈ দায়সৰা মন্তব্য দিয়া বুলি জানিবলৈ দিছে ৷ নিজৰ কামৰ গাফিলতি স্বীকাৰ কৰাৰ পৰিবৰ্তে পৰ্যবেক্ষণ কৰিবলৈ যোৱা ছাত্ৰ সন্থাৰ সজাতি দলক আওকাণ আৰু উপলুঙা মন্তব্য দিয়া ঘটনাত এতিয়া ক্ষোভিত হৈ পৰিছে আছু ৷
