ধেমাজি,২৮ মাৰ্চ: তুংগত উঠিছে লোকসভা নিৰ্বাচনৰ নিৰ্বাচনী প্ৰচাৰ । প্ৰথম পৰ্যায়ৰ মনোনয়ন দাখিলৰ পিচতে শাসক-বিৰোধী উভয়ে নামি পৰিছে ভোট সংগ্ৰহৰ অংকত । শাসকীয় দল বিজেপিৰ বহুকেইগৰাকী হাই প্ৰফাইল নেতাই জঁপিয়াই পৰিছে নিৰ্বাচনী প্ৰচাৰত । নিৰ্বাচনী প্ৰচাৰ তুংগত উঠিছে লখিমপুৰ লোকসভা সমষ্টিতো । বিজেপিৰ লখিমপুৰ লোকসভা সমষ্টিৰ প্ৰাৰ্থী প্ৰদান বৰুৱাৰ হৈ নিৰ্বাচনী প্ৰচাৰত নামিছে বিজেপি নেতা-কৰ্মী ।
লোকসভা সমষ্টিটোত হেট্ৰিক গঢ়াৰ লক্ষ্যৰে নামি পৰিছে বিজেপি মিত্ৰজোঁটৰ প্ৰাৰ্থী প্ৰদান বৰুৱা । লখিমপুৰ সংসদীয় সমষ্টিৰ অন্তৰ্গত ধেমাজি, ঢকুৱাখনা, চিচিবৰগাঁও বিধানসভা সমষ্টিৰ পঞ্চায়তে পঞ্চায়তে দলীয় কৰ্মীৰ সৈতে মিলিত হৈ ৰচনা কৰিছে ৰণকৌশল ৷ বিগত দহ বছৰত বিজেপি চৰকাৰে অঞ্চলটোত কৰি অহা উন্নয়নৰ খতিয়ান দাঙি ধৰিছে ৷ বৃহস্পতিবাৰে সমষ্টিটোৰ পশ্চিম ধেমাজিৰ খলিহামাৰী, নৰোৱাথান, গুৱেখন্দা, আজোহা পঞ্চায়তৰ হিলৈপৰা, মাছখোৱা অঞ্চলৰ যোৰকটা পঞ্চায়তত দলীয় কৰ্মীসভাত অংশগ্ৰহণ কৰি প্ৰচাৰ চলাই প্ৰাৰ্থীগৰাকীয়ে ৷
প্ৰাৰ্থী প্ৰদান বৰুৱাৰ লগত থাকি ৰাইজৰ আগত নৰেন্দ্ৰ মোদী চৰকাৰৰ জয়গান গাই শিক্ষা মন্ত্ৰীগৰাকীয়ে ৷ ধেমাজি মাছখোৱা আৰু ঢকুৱাখনাত দহ বছৰে বিজেপি চৰকাৰে ৰাস্তা-ঘাটৰ উন্নয়ন কৰা, বান প্ৰতিৰোধ কৰা বুলি দাবী কৰি শাসকীয় দলৰ উন্নয়নৰ খতিয়ান দাঙি ধৰে ধেমাজিৰ বিধায়ক তথা ৰাজ্যৰ শিক্ষা মন্ত্ৰী ডাঃ ৰণোজ পেগুৱে ৷ লগতে অসম প্ৰদেশ কংগ্ৰেছৰ সভাপতি ভূপেন বৰাৰ ঠিকনা অনাগত দিনত নিশ্চিতভাৱে সলনি হ'ব আৰু ইয়াৰ বিপৰীতে বিজেপিৰ ঠিকনা একে থাকিব বুলিও মন্তব্য কৰে শিক্ষা মন্ত্ৰীগৰাকীয়ে ৷ উল্লেখ্য যে ভূপেন বৰাই বিজেপিত যোগ দিব বুলি ইতিমধ্যে মুখ্যমন্ত্ৰীয়েও দৃঢ়তাৰে দাবী কৰি আহিছে ৷
