গুৱাহাটী, ১৩ আগষ্ট: কোকৰাঝাৰ-চিৰাং জিলাৰ সীমান্তত নতুনকৈ উগ্ৰপন্থী গোট গঠন কৰিবলৈ চেষ্টা চলোৱা এটা দলক অস্ত্ৰসহিতে মূলসুঁতিলৈ প্ৰত্যাৱৰ্তন কৰাবলৈ সক্ষম হৈছে কোকৰাঝাৰ আৰক্ষী ৷ অসম আৰক্ষীৰ বাবে এয়া এক বৃহৎ সফলতা বুলি বিবেচিত হৈছে । বিগত তিনি-চাৰি মাহৰ পৰা নতুন উগ্ৰপন্থী গোট গঠন কৰিবলৈ চেষ্টা কৰি আছিল ২০ জনীয়া যুৱকৰ দলটোৱে । কোকৰাঝাৰ জিলাৰ অতিৰিক্ত আৰক্ষী অধীক্ষক পৃথ্বীৰাজ ৰাজখোৱাই আজি এক সংবাদমেল আয়োজন কৰি এই কথা ব্যক্ত কৰে ৷
অতিৰিক্ত আৰক্ষী অধীক্ষক পৃথ্বীৰাজ ৰাজখোৱাই সংবাদমেলত কয়, "কেইজনমান কেডাৰে নতুন উগ্ৰপন্থী গোট গঠন কৰিবলৈ চেষ্টা কৰি কেইবাদিনৰ পৰা চেষ্টা কৰি আছিল বুলি আমি সোমবাৰে নিশা তথ্য লাভ কৰো ৷ গোপন সূত্ৰৰ পৰা লাভ কৰা খবৰৰ ভিত্তিত আমি তেওঁলোকক অনুসৰণ কৰো আৰু আমি অস্ত্ৰসহিতে দলটোক উলিয়াই আনিবলৈ সক্ষম হও । দলটোত ২০ জন সদস্য আছিল ৷"
অতিৰিক্ত আৰক্ষী অধীক্ষকগৰাকীয়ে লগতে কয়, "কালি গভীৰ নিশা তেওঁলোকক অনা হৈছিল ৷ তেওঁলোকক সোধাপোছা কৰা হ’ব ৷ তেওঁলোকে আমাক কেইবাটাও অস্ত্ৰ-শস্ত্ৰ জমা দিছে । নতুনকৈ উগ্ৰপন্থী সংগঠন খোলাৰ আঁৰত কাৰোবাৰ সমৰ্থন আছে নেকি সেয়া সোধাপোছা কৰা হ'ব । কোনোবাই আৰ্থিকভাৱে সহায় কৰিছিল নেকি সেয়াও তদন্তৰ আওঁতালৈ অনা হ'ব । এজন এজনকৈ সোধাপোছা কৰা হ'ব ।"
Another success for @assampolice In Kokrajhar-Chirang forests, we’ve been able to intercept and bring out a group of 20 youths who had been trying to form a new militant group since last three/four months. They’ve listened to reason and come out and handed over the weapons held… pic.twitter.com/8I0qYHF5ix
— GP Singh (@gpsinghips) August 12, 2024
আৰক্ষী বিষয়াগৰাকীয়ে জানিবলৈ দিয়া মতে, কোকৰাঝাৰ-চিৰাং সীমান্তৱৰ্তী জংঘলৰ পৰা কৌশলেৰে অস্ত্ৰসহিতে দলটোক উলিয়াই অনা হৈছে । নতুনকৈ উগ্ৰপন্থী সংগঠন খুলিব বিচৰা দলটোত ২০ জন সদস্যৰ বাহিৰেও আৰু কোনোবা জড়িত আছে নেকি সেয়াও তদন্ত কৰা হ'ব ।
কেডাৰকেইজনে জমা দিয়া অস্ত্ৰ-শস্ত্ৰসমূহ হ'ল ক্ৰমে অটোমেটিক ৰাইফল ৬ টা, একক শ্ব’টৰ ৰাইফল ৪ টা, মেগজিনৰ সৈতে ৩ টা পিষ্টল, এইচ ই গ্ৰেনেড ৫ টা, এ কে ৰাইফলৰ সজীৱ গুলী ৫৪ জাঁই, পিষ্টলৰ সজীৱ গুলী ৯ জাঁই । সদ্যহতে মূলসুঁতিলৈ অহা ২০ সদস্যক কোকৰাঝাৰ গৌৰাং নদীৰ পাৰত চান্দামাৰীস্থিত অস্থায়ী শিবিৰত কটকটীয়া নিৰাপত্তাৰ মাজত ৰখা হৈছে ।
