ডিফু, 10 মে': সুদুৰ ইটালীৰ পৰা এটি ১২ বছৰীয়া শিশুক নিজৰ সন্তান হিচাপে লৈ যাবলৈ আহিল হৃদয়বান পিতৃ-মাতৃ জাৰ্জিঅ' কাভকাৰ আৰু এলিছা ডেভট ৷ কাৰ্বি আংলং জিলাৰ ধনশিৰিৰ শিশুগৃহৰ পৰা আৰ্জিনা নামৰ শিশুটিক নিজৰ কৰি ল’বলৈ ৬ টা বছৰ অপেক্ষা কৰিবলগা হ’ল জাৰ্জিঅ' আৰু এলিছে ৷
মঙলবাৰে ডিমাপুৰত আহি উপস্থিত হোৱা দম্পতীটোৱে বুধবাৰে পুৱাতে আহি কাৰ্বি আংলং জিলাৰ ধনশিৰিত থকা মিছন কনছান নামৰ শিশুগৃহত উপস্থিত হয় ৷
জিলা প্ৰশাসনৰ তৰফৰ পৰা এ ছি এছ বিষয়া আৰাধনা দাস আৰু এ পি এছ বিষয়া অতিৰিক্ত আৰক্ষী অধীক্ষক জয়ন্ত বৰুৱা, জিলা চাইল্ড প্ৰটেকচন বিষয়া বাছাপী টেৰণপী, নটাৰী ফুনু বৰ্মনসহ শুভাকাংক্ষীসকলৰ উপস্থিতিত অশ্ৰুসিক্ত নয়নেৰে আৰ্জিনাক বিদায় দিয়া হয় ৷ শিশুগৃহটোৰ সকলোৰে মাতৃ হিচাপে থকা অম্বিকা প্ৰধানে নিজৰ ভাষণত কয় যে, ৬ বছৰ বয়সতে আৰ্জিনাক শিশুগৃহলৈ অনা হৈছিল ৷
পিছত মেঘালয়ৰ খাচী পৰিয়াল এটাই শিশুটিক নিজৰ সন্তান হিচাপে স্বীকৃতি দি লৈ গৈছিল যদিও তেওঁলোকৰ সৈতে আৰ্জিনা সুখী নোহোৱাত ঘূৰি আহে শিশুগৃহলৈ ৷
উল্লেখ্য যে, এইটো শিশুগৃহৰ পৰা ২০১৯ চনত ফ্ৰান্সলৈ যোৱা পূৰবী, ২০২১ ত মাল্টালৈ যোৱা ফ্ল’ৰিণ, ২০২২ ত স্পেইনলৈ যোৱা খুশী আৰু ডেনমাৰ্কলৈ যোৱা জেমছৰ জীৱনশৈলী ভিডিঅ' কলযোগে দেখি আৰ্জিনাই নিজেই যোৱাৰ মন মেলে আৰু আজি তাই পিতৃ-মাতৃক পাই সুখী অনুভৱ কৰে ৷
আৰ্জিনাৰ পিতৃ-মাতৃয়ে ইটালিয়ান ভাষাতে দিয়া ভাষণ দোভাষীয়ে অনুবাদ কৰি স্থানীয় লোকক বুজাই দিয়ে ৷ তেওঁলোকে কয় যে, আজি তেওঁলোক যথেষ্ট সুখী ৷ আৰ্জিনাক নিজ সন্তান হিচাপে লাভ কৰি নিজকে সৌভাগ্যৱান বুলি কয় দম্পতীটোৱে ৷
পিতৃ জাৰ্জিঅ'ই আবেগিক হৈ কয় যে, এই দিনটোৰ বাবে তেওঁলোকে ৬ বছৰে অপেক্ষা কৰি আছিল ৷ তেওঁলোকে আৰ্জিনাৰ বাবে এটা নতুন কোঠা সকলো সা-সুবিধা উপলব্ধ হোৱাকৈ নিৰ্মাণ কৰিছে ৷ তেওঁলোকে আৰ্জিনাৰ যিটো বিষয়তে ৰাপ আছে, সেই বিষয়তে জীৱনটো গঢ়িবলৈ সুবিধা প্ৰদান কৰিব বুলি জানিবলৈ দিয়ে ৷
উল্লেখ্য যে, আৰ্জিনাই গীত গাই আৰু খেলা-ধূলা কৰি ভালপায় ৷ শিশুগৃহৰ কেঁচুৱা কেইটাৰ লগতে আৰ্জিনাই কটাই অধিকতম সময় ৷ বৃহস্পতিবাৰে কলকাতালৈ গৈ ভিছাৰ কাম সম্পূৰ্ণ কৰি দিল্লীৰ পৰা আৰ্জিনা উৰা মাৰিব ইটালীলৈ ৷ এক আৱেগিক পৰিৱেশত আৰ্জিনা নামৰ শিশুটিয়ে এৰিলে মিছন কনচাৰ্ণ শিশুগৃহ ৷
