মৰাণ, 8 মাৰ্চ: ডিব্ৰুগড় কেন্দ্ৰীয় কাৰাগাৰৰ অধীক্ষক নৃপেন দাসক গ্ৰেপ্তাৰ কৰাৰ পিচতেই পোহৰলৈ আহিছে বিস্ফোৰক তথ্য ৷ ডিব্ৰুগড় আৰক্ষীয়ে গ্ৰেপ্তাৰ কৰিছিল কাৰাগাৰৰ অধীক্ষকগৰাকীক ৷ উল্লেখ্য যে, বিগত মাহত খালিস্তানী উগ্ৰপন্থী অমৃতপাল সিংসহ আন 9 সহযোগী থকা NSA চেলত উদ্ধাৰ হৈছিল বৃহৎ পৰিমাণৰ চিম কাৰ্ড, টিভি ৰিমৰ্ট, দুটা ম'বাইল, স্পাই কেম পেইন, ব্লু টুথ হেডফোন আদি । অসম আৰক্ষীৰ সঞ্চালক প্ৰধান জি পি সিঙে এই সন্দৰ্ভত অৱগত কৰাৰ পাচতে ডিব্ৰুগড় কাৰাগাৰৰ ভিতৰত হাহাকাৰ পৰিৱেশৰ সৃষ্টি হৈছিল আৰু ডিব্ৰুগড় আৰক্ষীয়ে ৰুজু কৰিছিল ঘটনা সন্দৰ্ভত গোচৰ ।
গোচৰ সন্দৰ্ভত তদন্ত অব্যাহত ৰাখিছিল ৰাজ্যৰ গৃহ বিভাগে । তদন্ত অব্যাহত থকাৰ সময়তে ডিব্ৰুগড় কেন্দ্ৰীয় কাৰাগাৰৰ অধীক্ষক নৃপেন দাসক গ্ৰেপ্তাৰ কৰা হয় । ডিব্ৰুগড় সদৰ থানাৰ আৰক্ষীয়ে অধীক্ষকগৰাকীক আটক কৰি বৃহস্পতিবাৰে নিশাৰে পৰা জেৰা অব্যাহত ৰাখিছে বুলি জানিব পৰা গৈছে ।
ডিব্ৰুগড় কেন্দ্ৰীয় কাৰাগাৰৰ অধীক্ষকগৰাকীক গ্ৰেপ্তাৰক লৈ তথ্য ৰাজহুৱা কৰিলে ডিব্ৰুগড়ৰ আৰক্ষী অধীক্ষক ৰাকেশ ৰেড্ডীয়ে । জিলা আৰক্ষী অধীক্ষকগৰাকীয়ে জানিবলৈ দিয়া অনুসৰি খালিস্তানী উগ্ৰপন্থী অমৃতপাল সিং থকা NSA চেলত নিষিদ্ধ সামগ্ৰী যোগান ধৰিছিল কাৰাগাৰৰ অধীক্ষক নৃপেন দাসে । লগতে কাৰাগাৰৰ নীতি-নিয়ম ভংগ কৰি খালিস্তানী উগ্ৰপন্থী কেইজনক বিশেষ সুবিধা দিছিল অধীক্ষকগৰাকীয়ে । এই সম্পৰ্কত তদন্ত অব্যাহত ৰখা বুলি জানিবলৈ দিয়ে ডিব্ৰুগড়ৰ আৰক্ষী অধীক্ষক ৰাকেশ ৰেড্ডীয়ে।
উল্লেখ কৰা প্ৰয়োজন যে, ঘটনাৰ কথা পোহৰলৈ অহাৰ পাচতে প্ৰথমেই সন্দেহৰ আৱৰ্তত সোমাই পৰিছিল ডিব্ৰুগড় কেন্দ্ৰীয় কাৰাগাৰৰ অধীক্ষকগৰাকী । অৱশ্যে এই ঘটনাৰ লগত অধীক্ষকগৰাকী কেনেকৈ জড়িত সেই সম্পৰ্কে আৰক্ষীয়ে বৰ্তমান পৰ্যন্ত কোনো ধৰণৰ তথ্য ৰাজহুৱা কৰা নাই ।
উল্লেখ্য যে, শেহতীয়াকৈ জানিব পৰা মতে ডিব্রুগড় কাৰাগাৰ কৰ্তৃপক্ষই যোগান ধৰা খাদ্য গ্ৰহণ কৰা নাছিল খালিস্তানপন্থী নেতা অমৃতপাল সিং আৰু তেওঁৰ কাৰাবন্দী সহযোগীসকলে ৷ প্ৰাপ্ত তথ্য মতে সুৰক্ষাৰ দোহাই দি জেল কৰ্তৃপক্ষই দিয়া আহাৰ গ্ৰহণ কৰাৰ পৰা বিৰত থাকি নিজে তৈয়াৰ কৰা খাদ্য গ্ৰহণ কৰি আছে অমৃতপাল সিং আৰু সহযোগীসকল ৷
আনহাতে, অমৃতপালৰ সহযোগী কুলৱন্ত সিঙৰ স্বাস্থ্য শোচনীয় হৈ পৰাত 5 মাৰ্চৰ নিশাই অসম চিকিৎসা মহাবিদ্যালয় হাস্পতালত সংকটজনক অৱস্থাত ভৰ্তি কৰোৱা হয় কুলৱন্ত সিঙক ৷
লগতে পঢ়ক: ডিব্ৰুগড়ৰ কেন্দ্ৰীয় কাৰাগাৰত ভয়ংকৰ ঘটনা
