তিনিচুকীয়া, ১৩ এপ্ৰিল : সমাগত লোকসভা নিৰ্বাচন । ৰাজ্যৰ প্ৰতিটো লোকসভা সমষ্টিত ৰাজনৈতিক দলসমূহে নিৰ্বাচনী প্ৰচাৰ তীব্ৰতৰ কৰি তুলিছে । শাসকীয় দলৰ প্ৰাৰ্থীৰ হৈ নিৰ্বাচনী প্ৰচাৰৰ বাবে মুখ্যমন্ত্ৰী ড৹ হিমন্ত বিশ্ব শৰ্মাই অসমৰ ইমূৰৰ পৰা সিমূৰলৈ ভ্ৰমণ কৰিছে । গৰু বিহুৰ দিনাও তেওঁ প্ৰচাৰ অব্যাহত ৰাখিলে ।
গৰু বিহুৰ দিনা মুখ্যমন্ত্ৰী ড৹ হিমন্ত বিশ্ব শৰ্মাই লখিমপুৰ লোকসভা সমষ্টিত নিৰ্বাচনী প্ৰচাৰ চলায় । লখিমপুৰ লোকসভা সমষ্টিৰ বিজেপি মিত্ৰজোঁটৰ প্ৰাৰ্থী প্ৰদান বৰুৱাৰ হৈ মুখ্যমন্ত্ৰীগৰাকীয়ে কাকপথাৰত আজি নিৰ্বাচনী প্ৰচাৰ চলায় । সভাত অংশগ্ৰহণ কৰি প্ৰদান বৰুৱাক ভোট দি জয়ী কৰোৱাৰ লগতে প্ৰধানমন্ত্ৰী নৰেন্দ্ৰ মোদীৰ হাত শক্তিশালী কৰাৰ আহ্বান জনাই মুখ্যমন্ত্ৰীয়ে । ইফালে সংবাদ মাধ্যমৰ সন্মুখত মুখ্যমন্ত্ৰীগৰাকীয়ে আগন্তুক নিৰ্বাচন সন্দৰ্ভত কেইবাটাও গুৰুত্বপূৰ্ণ মন্তব্য কৰে । মুখ্যমন্ত্ৰীয়ে দাবী কৰা মতে প্ৰথম পৰ্যায়ত অনুষ্ঠিত হ'বলগীয়া নিৰ্বাচনত ৰাজ্যৰ ৫ টা লোকসভা সমষ্টিত কোনো প্ৰতিদ্বন্দ্বিতাই নহয় । তেওঁৰ মতে কেৱল কৰিমগঞ্জ, নগাঁও আৰু ধুবুৰীতহে প্ৰতিদ্বন্দ্বিতা হ'ব ।
