গুৱাহাটী, ২২ জুন : শক্তিপীঠ কামাখ্যা মন্দিৰত আৰম্ভ হৈছে মহা অম্বুবাচী মেলা । ২৬ জুনলৈ শক্তিপীঠ কামাখ্যা ধামত অনুষ্ঠিত হ'ব অম্বুবাচী মেলা । শনিবাৰে পুৱা অম্বুবাচীৰ প্ৰবৃত্তিৰ লগে লগে কামাখ্যা মন্দিৰৰ মুখ্য দুৱাৰ বন্ধ হৈ পৰে । ২৬ জুনৰ পুৱা দেৱীৰ নিত্য পূজাৰ পিচত ভক্তৰ বাবে পুনৰ খুলি দিয়া হ’ব মন্দিৰৰ মূল দুৱাৰ । অম্বুবাচী মেলাৰ বাবে কামাখ্যা ধামত সমাগত হৈছে বিভিন্ন ৰাজ্যৰ সাধু-সন্ন্যাসীসকল । সাধনাত ব্ৰতী হৈছে এইসকল সাধু-সন্ন্যাসী ।
মধ্যপ্ৰদেশৰ দিগম্বৰ বম বম পুৰী মহাৰাজ:
মধ্যপ্ৰদেশৰ মহাবিদ্যা ধামৰ পৰা আহিছে দিগম্বৰ বম বম পুৰী মহাৰাজ । তেওঁ কয় যে ১৫-১৭ বছৰ ধৰি তেওঁ কামাখ্যা ধামৰ অম্বুবাচী মেলালৈ আহি আছে । বম বম পুৰী মহাৰাজে জানিবলৈ দিয়ে যে এসময়ত ইয়াত একো নাছিল । এতিয়া বহুত ব্যৱস্থা হৈছে । এসময়ত ইয়াতে এজন পাঞ্জাৱী লোকে খাদ্য ৰান্ধি সাধুসকলক খুৱাইছিল ।
লগতে পঢ়ক: অম্বুবাচী মেলা উপভোগ কৰিবলৈ কোন পথেৰে যাব আপুনি ?
নেপালৰ কাশীগিৰী:
নেপালৰ পৰা অহা কাশীগিৰীয়ে কয় যে তেওঁ ১১ বছৰ ধৰি কামাখ্যা ধামৰ অম্বুবাচী মেলালৈ আহি আছে । এতিয়া ইয়াত বহুত পৰিৱৰ্তন হৈছে । এতিয়া বহুত সু-ব্যৱস্থা হৈছে । তেওঁ কয় যে কামাখ্যালৈ আহি তেওঁ প্ৰতিবছৰে এনেদৰে সাধনাত ব্ৰতী হয় ।
উত্তৰাখণ্ডৰ মহন্ত প্ৰেমানন্দ গিৰী:
উত্তৰাখণ্ডৰ মহন্ত প্ৰেমানন্দ গিৰীয়ে কয় যে ২০-২২ বছৰৰ পৰা কামাখ্যা ধামৰ অম্বুবাচী মেলালৈ তেওঁ আহি আছে । মাত্ৰ লকডাউনৰ সময়ত আহিব পৰা নাছিল । তেওঁ কয়- ‘‘কামাখ্যা মাৰ আহ্বানত সদায় কামাখ্যা ধামৰ অম্বুবাচী মেলালৈ আহি আছো ।’’
পশ্চিমবংগৰ গুৰুজী শ্ৰী বিনয়ী মহাৰাজ:
তেওঁ কয় যে ৩০ বছৰৰ পৰা কামাখ্যা ধামৰ অম্বুবাচী মেলালৈ আহি আছে । আগৰ মহত্ব এতিয়া নাই । এতিয়া ইয়াত সাধনা কৰিব নোৱাৰি । মন্দিৰৰ পৰিক্ৰমা কৰিব দিয়া নহয় । গতিকে অম্বুবাচী মেলাৰ মহত্ব নোহোৱা হৈছে । সাধুসকলে এই কথাত কষ্ট পোৱা বুলি কয় বিনয়ী মহাৰাজে ৷
