তেজপুৰ, 18 মে': ৰাজ্যৰ কৃষি বিভাগৰ আজৱ কাণ্ড । বিজ্ঞাপনে ৰাজ্যৰ কৃষকক অনিশ্চয়তাত পেলাইছে বুলি অভিযোগ বিশিষ্ট আৰ টি আই কৰ্মী দিলীপ নাথৰ । উল্লেখ্য যে, যোৱা 8 ফেব্ৰুৱাৰীত কৃষি বিভাগে বাতৰি কাকতৰ জৰিয়তে প্ৰকাশ কৰিছিল এক বিজ্ঞাপন ৷ উক্ত বিজ্ঞাপনটোত উল্লেখ আছে যে অসমৰ সকলো জিলাৰ কৃষক উপকৃত হোৱাকৈ কৃষকসকলে চৰকাৰী নথি-পত্ৰ দাখিল কৰিলে একোটাকৈ মেচিন পাম্প প্ৰদান কৰিব কৰা হ’ব । কোনো জিলাত 100 যদি কোনো জিলাত 120 টাকৈ প্ৰদান কৰা হ’ব ।
ইয়াৰ লগতে বিজ্ঞাপনটোত কোৱা হৈছে প্ৰতিগৰাকী কৃষকৰ 15 বিঘা কৃষি ভূমি থকাৰ প্ৰমাণ পত্ৰ দাখিল কৰিব লাগিব, ইয়ে সাধাৰণ কৃষকৰ মাজত অসুবিধা সৃষ্টি কৰিছে । কাৰণ কৃষকে এই প্ৰমাণ পত্ৰ নিৰ্দিষ্ট ৰাজহ চক্ৰ বিষয়াৰ কাৰ্যালয়ৰ পৰা লাভ নকৰে । অসম চৰকাৰে শেহতীয়াকৈ মুকলি কৰা মিছন বসুন্ধৰা আঁচনিৰ জৰিয়তে এজন কৃষকে মাত্ৰ 7 বিঘা কৃষি ভূমিৰহে প্ৰমাণ পত্ৰ লাভ কৰিব ।
এই সন্দৰ্ভত বিশিষ্ট আৰ টি আই কৰ্মী দিলীপ নাথে কয়, "এই নীতিৰ আধাৰত অসমৰ কোনো কৃষকে এই চৰকাৰী আঁচনিৰ লাভ আদায় কৰিবলৈ সক্ষম নহ’ব । এই বিজ্ঞাপনৰ আধাৰত কোনো কৃষকে এই আঁচনি লাভ কৰিবলৈ নোৱাৰিব । যদি এজন কৃষকৰ হাতত 15 বিঘা কৃষি ভূমি থাকে তেওঁ এই কৃষি কাৰ্যত ব্যৱহৃত মেচিন পাম্প নিজেই কিনিবলৈ সক্ষম হ’ব ।"
নাথে অসমৰ মুখ্যমন্ত্ৰী ড৹ হিমন্ত বিশ্ব শৰ্মাক বিষয়টোৰ ওপৰত গুৰুত্ব প্ৰদান কৰি কৃষকৰ উপযোগী তথা লাভান্বিত হোৱাকৈ পুনৰ বিজ্ঞাপন প্ৰকাশ কৰিবলৈ অনুৰোধ জনায় ।
মন কৰিবলগীয়া যে অসমত বৰ্তমান ধান খেতিৰ সময় ৷ অৱশ্যে খেতিপথাৰত পানীৰ যোগান নাই । খেতিয়কে কঁঠিয়া পেলাবলৈ পথাৰত পৰ্যাপ্ত পানী যোগান নাই ৷ যাৰ ফলস্বৰূপে চৰকাৰৰ কৃষি বিভাগে এনে ধৰণৰ মেচিন পাম্প যিসকল কৃষকে কিনিবলৈ সক্ষম নহয় তেনে কৃষকৰ খেতিপথাৰলৈ পানী যোগান ধৰিবলৈ এই মেচিন পাম্প প্ৰদান কৰা হ’ব বুলি ঘোষণা কৰিছে ।
কিন্ত বিভাগীয় বিজ্ঞাপন অনুসৰি কৃষকে ৰাজহ চক্ৰ বিষয়াৰ কাৰ্যালয়ৰ পৰা কোনো কাৰণতে 15 বিঘা কৃষিভূমিৰ প্ৰমাণ পত্ৰ লাভ কৰিব নোৱাৰে ।
লগতে পঢ়ক: ৰাজ্যত অভাৱনীয় হাৰত কমিছে বৰষুণ, স্বাভাৱিকতকৈ ৩৩% কম হৈছে বৰষুণ - Rainfall Rates in Assam
