বৰপেটা, 21 জুন : বৰপেটা চিকিৎসা মহাবিদ্যালয় আৰু হাস্পতাল কৰ্তৃপক্ষৰ অভিনৱ পদক্ষেপ ৷ চিকিৎসা মহাবিদ্যালয়খনৰ পৰা প্ৰসূতি মাতৃৰ ডিচাৰ্জৰ সময়তে চিকিৎসালয় কৰ্তৃপক্ষই নৱজাতকৰ হাতত তুলি দিলে জন্মৰ প্ৰমাণপত্ৰৰ সৈতে আধাৰ নম্বৰ ৷ আজি এই কাৰ্যসূচীৰ আৰম্ভণি স্বৰূপে বৰপেটা চিকিৎসা মহাবিদ্যালয় আৰু হাস্পতালৰ দুটি নৱজাতকৰ অভিভাৱকৰ হাতত কৰ্তৃপক্ষই তুলি দিলে জন্মৰ প্ৰমাণপত্ৰৰ লগতে আধাৰ নম্বৰ ৷
শুকুৰবাৰে বৰপেটা চিকিৎসা মহাবিদ্যালয় আৰু হাস্পতালৰ অধ্যক্ষ ডাঃ ৰমেন তালুকদাৰ, অধীক্ষক পাৰ্থ প্ৰতীম বৰুৱা, বৰপেটাৰ জিলা অতিৰিক্ত আয়ুক্ত গীতাশ্ৰী লাচিত আৰু যুটীয়া সঞ্চালকৰ উপস্থিতিত এই কাৰ্যসূচীৰ শুভাৰম্ভ কৰা হয় ৷ বৰপেটা চিকিৎসা মহাবিদ্যালয় আৰু হাস্পতালত ডিচাৰ্জৰ সময়তে এইদৰে নৱজাতকৰ অভিভাৱকৰ হাতত কৰ্তৃপক্ষই তুলি দিয়ে জন্মৰ প্ৰমাণপত্ৰৰ সৈতে আধাৰ নম্বৰ ৷
বৰপেটা চিকিৎসা মহাবিদ্যালয় আৰু হাস্পতালৰ অধ্যক্ষ ডাঃ ৰমেন তালুকদাৰে জনোৱা মতে স্বাস্থ্য বিভাগৰো দায়িত্বত থকা মুখ্যমন্ত্ৰী ড৹ হিমন্ত বিশ্ব শৰ্মাৰ নিৰ্দেশ ক্ৰমে এইদৰে প্ৰসূতি মাতৃৰ ডিচাৰ্জৰ সময়তে জন্মৰ প্ৰমাণপত্ৰ আৰু আধাৰ নম্বৰ প্ৰদানৰ সিদ্ধান্ত গ্ৰহণ কৰা হয় ৷ উল্লেখ্য যে, মুখ্যমন্ত্ৰী ড৹ হিমন্ত বিশ্ব শৰ্মাই প্ৰসূতিৰ ডিচাৰ্জৰ সময়তে নৱজাতকক জন্মৰ প্ৰমাণপত্ৰ আৰু আধাৰ নম্বৰ প্ৰদানৰ বাবে জিলাসমূহৰ যুটীয়া স্বাস্থ্য সঞ্চালকৰ লগতে চিকিৎসা মহাবিদ্যালয় আৰু হাস্পতাল সমূহলৈ নিৰ্দেশনা প্ৰদান কৰিছিল ৷ মুখ্যমন্ত্ৰীৰ এই নিৰ্দেশৰ পিচতে আজি ৰাজ্যত প্ৰথমবাৰৰ বাবে ডিচাৰ্জৰ দিনটোতে দুটিকৈ নৱজাতকৰ অভিভাৱকৰ হাতত জন্মৰ প্ৰমাণপত্ৰ আৰু আধাৰ নম্বৰ প্ৰদান কৰে বৰপেটা চিকিৎসা মহাবিদ্যালয় আৰু হাস্পতাল কৰ্তৃপক্ষই ৷
লগতে পঢ়ক : এন আৰ চিৰ বায়'মেট্ৰিকত গোর্খাসকলক অন্তৰ্ভুক্ত কৰিবলৈ অমিত শ্বাহলৈ পত্ৰ প্ৰেৰণ কৰা হৈছে : মুখ্যমন্ত্ৰী - CM Himanta Biswa Sarma
