স্প’ৰ্টছ ডেস্ক, 15 ছেপ্টেম্বৰ: ইতিমধ্যে বাংলাদেশৰ সৈতে টেষ্ট শৃংখলাত অংশগ্ৰহণৰ বাবে যুদ্ধংদেহী প্ৰস্তুতি আৰম্ভ কৰিছে টীম ইণ্ডিয়াই ৷ দলটো চেন্নাইত উপস্থিত হোৱাৰ পিছত আৰম্ভ কৰিছে নেট অনুশীলন ৷ শৃংখলাৰ প্ৰথমখন মেচ 19 ছেপ্টেম্বৰৰ পৰা চেন্নাইত অনুষ্ঠিত হোৱাৰ বিপৰীতে দ্বিতীয়খন মেচ অনুষ্ঠিত হ’ব কানপুৰত ৷
এই শৃংখলাটো ভাৰতীয় ক্ৰিকেট দলটোৰ বাবে অতি গুৰুত্বপূৰ্ণ ৷ কিয়নো বাংলাদেশক পৰাস্ত কৰিব পাৰিলে দলটোৱে লাভ কৰিব এক অনন্য অভিলেখ লিপিবদ্ধ কৰাৰ সোণালী সুযোগ ৷
ভাৰতীয় দলৰ ওচৰত ইতিহাস সৃষ্টি কৰাৰ সুযোগ
যদিহে শৃংখলাৰ প্ৰথমখন মেচত বাংলাদেশৰ বিৰুদ্ধে ভাৰতে জয় লাভ কৰে, তেন্তে ই হৈ পৰিব এক বৃহৎ অভিলেখ ৷ 1932 চনত টেষ্ট অভিষেকৰ পিছত ভাৰতে মুঠ 579 খন মেচত অংশগ্ৰহণ কৰিছে ৷ য’ত 178 খনত জয় লাভ কৰিছে দলটোৱে আৰু পৰাস্ত হৈছে 178 খন মেচত । বাকী থকা 223 খন মেচৰ ভিতৰত 222 খন মেচৰ সমাপ্তি হৈছিল অমীমাংসিতভাৱে আৰু এখন মেচ বাতিল কৰা হৈছিল ।
যদিহে 19 ছেপ্টেম্বৰৰ পৰা চেন্নাইত অনুষ্ঠিত হ’বলগীয়া প্ৰথমখন টেষ্টত ভাৰতে বাংলাদেশৰ বিৰুদ্ধে জয় লাভ কৰে, তেন্তে টেষ্ট ক্ৰিকেটত পৰাজয়তকৈ অধিক জয় লাভ কৰা পঞ্চমটো দলত পৰিণত হ'ব ভাৰত । ভাৰতে এতিয়ালৈকে এই অভিলেখ স্পৰ্শ কৰিবলৈ সক্ষম হোৱা নাই ।
যদি তেওঁলোকে এই লক্ষ্যত উপনীত হয়, তেন্তে 1932 চনৰ পিছত অৰ্থাৎ 92 বছৰৰ পিছত প্ৰথমবাৰৰ বাবে গঢ়িব এই অভিলেখ ৷ টেষ্ট ক্ৰিকেটৰ ইতিহাসত পূৰ্বে মাত্ৰ চাৰিটা দলেহে পৰাজয়তকৈ অধিক জয় সাব্যস্ত কৰিছে ।
টেষ্টত পৰাজয়তকৈ অধিক জয়ৰ সোৱাদ লাভ কৰা দল
- এই তালিকাৰ প্ৰথম স্থানত আছে অষ্ট্ৰেলিয়া, যিয়ে 866 খন টেষ্ট মেচ খেলি 414 খনত জয়ী হৈছে ৷ বিপৰীতে 232 খনত পৰাজিত হৈছে ৷
- ইংলেণ্ডে 1,077 খন টেষ্ট মেচ খেলি 397 খনত জয় আৰু 325 খনত পৰাজয়ৰ সৈতে তালিকাৰ দ্বিতীয় স্থানত আছে ।
- দক্ষিণ আফ্ৰিকাই 466 খন টেষ্ট খেলিছে, য'ত 179 খন মেচ জিকিছে দলটোৱে ৷ বিপৰীতে 161 খনত পৰাজয়বৰণ কৰে দলটোৱে ৷ দলটো আছে তালিকাৰ তৃতীয় স্থানত ।
- পাকিস্তানে 458 খন টেষ্ট মেচৰ ভিতৰত 148 খনত জয় লাভ কৰিছে ৷ তালিকাৰ চতুৰ্থ স্থানত থকা দলটোৱে 144 খন মেচত পৰাজিত হৈছে ।
