স্পৰ্টছ ডেস্ক, 13 জুলাই : হাৰাৰে স্প’ৰ্টছ ক্লাবত যশস্বী জয়ছোৱাল আৰু অধিনায়ক শুভমন গীলৰ বেটিং বিক্ৰমৰ সহায়ত ভাৰতে জিম্বাব’ৱেক চতুৰ্থ T-২০ত ১০ উইকেটত পৰাস্ত কৰে। ভাৰতৰ হৈ অ’পেনিং বেটছমেন শুভমন গীল আৰু যশস্বী জয়ছোৱালে অপৰাজিত অৰ্ধশতক অৰ্জন কৰে।
All in readiness for the 4⃣th T20I 💪
— BCCI (@BCCI) July 13, 2024
Are you ready❓#TeamIndia | #ZIMvIND pic.twitter.com/2zdaH4ER4t
153 ৰাণৰ লক্ষ্য অনুসৰণ কৰি ভাৰতীয় দলে শুভমন গীল আৰু যশস্বী জয়ছোৱালৰ অৰ্ধ শতকৰ সহায়ত 15.2 অভাৰত এটাও উইকেট নেহেৰুৱাকৈ বিজয় সাব্যস্ত কৰে ৷ যশস্বী জয়ছোৱালে মাত্ৰ 53 টা বলতে 93 ৰাণৰ এক দৰ্শনীয় ইনিংছ খেলে ৷ তেওঁ 13 টা চিৰা আৰু দুটা ছয়ৰে নিজৰ ইনিংছ সজায় ৷ মাত্ৰ 7 ৰাণৰ বাবে শতক বঞ্চিত হয় যুৱ খেলুৱৈজন ৷ ইফালে জয়ছোৱালক সংগ দি অধিনায়ক শুভমন গীলে 39 টা বলত 58 ৰাণৰ বৰঙণি আগবঢ়ায় ৷ গীলে 2 টা ছয় আৰু 6 টা চাৰিৰে ব্যক্তিগত 58 ৰাণত অপৰাজিত হৈ থাকে ৷ এই জয়েৰে পাঁচখনীয়া মেচৰ শৃংখলাটোত ভাৰতে 3-1 ব্যৱধানত অগ্ৰগতি লাভ কৰিছে ৷ যশস্বী জয়ছোৱাল প্লেৱাৰ অব দ্য মেচ বিবেচিত হয় ৷
উল্লেখ্য যে, প্ৰথমখন মেচত জিম্বাব'ৱেৰ বিৰুদ্ধে পৰাজয়ৰ পিচত ভাৰতীয় দলটোৱে শৃংখলাত বৃহৎ প্ৰত্যাৱৰ্তন ঘটাই অগ্ৰগতি লাভ কৰিছে ৷ দ্বিতীয় আৰু তৃতীয় T-২০ মেচত টিম ইণ্ডিয়াই সহজেই জয়লাভ কৰে ৷
ইফালে হাৰাৰে স্পৰ্টছ ক্লাবত অনুষ্ঠিত হোৱা আজিৰ মেচখনত টছত জিকি প্ৰথমে ফিল্ডিঙৰ সিদ্ধান্ত লয় ভাৰতে ৷ প্ৰথমে বেটিঙৰ আমন্ত্ৰণ লাভ কৰি জিম্বাব’ৱে দলটোৱে নিজৰ ইনিংছ আৰম্ভ কৰি নিৰ্ধাৰিত 20 অভাৰত 7 টা উইকেটৰ বিনিময়ত 152 ৰাণ সংগ্ৰহ কৰিছে ৷ দলটোৱে শক্তিশালী আৰম্ভণিৰে ভাৰতৰ সন্মুখত 153 ৰাণৰ লক্ষ্য বান্ধি দিছে ৷ জিম্বাব’ৱেৰ হৈ অধিনায়ক তথা জ্যষ্ঠ খেলুৱৈ ছিকন্দৰ ৰাজাই 46 ৰাণৰ এক ইনিংছ খেলে ৷ 28 টা বলতে প্ৰবীণ খেলুৱৈজনে এই স্ক’ৰ সংগ্ৰহ কৰি তুষাৰ দেশপাণ্ডেৰ বলত পেভিলিয়নমুখী হয় ৷ অ’পেনাৰ ৱেছলী মাধেভেৰে (25) আৰু টাদিৱানাশে মাৰুমণি (32) এ দলক এক শক্তিশালী আৰম্ভণি দিয়ে ৷
ভাৰতৰ হৈ খলিল আহমেদে সাৰ্বাধিক 2 টা উইকেট দখল কৰে ৷ আনহাতে ৱাশ্বিংটন সুন্দৰ, শিভম ডুবে আৰু অভিষেক শৰ্মাই 1 টাকৈ উইকেট লাভ কৰে ৷ ইফালে আজিৰ মেচত ভাৰতৰ হৈ আন্তঃৰাষ্ট্ৰীয় T-20ত অভিষেক ঘটোৱা তুষাৰ দেশপাণ্ডেই 1 টা উইকেট দখল কৰে ৷
উল্লেখ্য যে, আজিৰ মেচখনত আন্তঃৰাষ্ট্ৰীয় T-২০ত ভাৰতীয় দলৰ হৈ অভিষেক ঘটাইছে সোঁহাতৰ বেগী বলাৰ তুষাৰ দেশপাণ্ডেই ৷ 2024 চনৰ আই পি এলত তেওঁৰ ফ্ৰেঞ্চাইজি চেন্নাই ছুপাৰ কিংছৰ হৈ উজ্জ্বল প্ৰদৰ্শনৰ বাবে পুৰস্কৃত হৈছে তুষাৰ ৷ যুৱ ক্ৰিকেটাৰগৰাকীয়ে ঘৰুৱা T-২০ খেলাৰ সময়ত 80 খন মেচত 116 টা উইকেট দখল কৰিছে ৷ বেগী বলাৰ আভেশ খানৰ সলনি দলত স্থান লাভ কৰিছে তুষাৰ দেশপাণ্ডেই ৷ আনহাতে এই শৃংখলাৰ জৰিয়তে আন্তঃৰাষ্ট্ৰীয় T-20ত অভিষেক ঘটোৱা ৰিয়ান পৰাগ প্ৰথমখন মেচত ব্যৰ্থ হোৱাৰ পিচত মূল একাদশলৈ প্ৰত্যাৱৰ্তন কৰাত প্ৰত্যাহ্বানৰ সন্মুখীন হৈছে ৷ তৃতীয়খন মেচৰ পৰা বাহিৰ হোৱা ৰিয়ান পৰাগ আজিৰ মেচখনৰো মূল একাদশত স্থান লাভ কৰিবলৈ সক্ষম নহ’ল ৷
ভাৰতৰ মূল একাদশ-
যশস্বী জয়ছোৱাল, শুভমন গিল (অধিনায়ক), অভিষেক শৰ্মা, ৰুতুৰাজ গায়কোৱাড়, সঞ্জু চেমচন (উইকেট কীপাৰ), ৰিংকু সিং, শিৱম ডুবে, ৱাশ্বিংটন সুন্দৰ, ৰবি বিষ্ণোই, তুষাৰ দেশপাণ্ডে, খলিল আহমেদ ৷
