স্পৰ্টছ ডেস্ক, ১৩ জুলাই : ভাৰতীয় ক্ৰিকেট নিয়ন্ত্ৰণ বোৰ্ডে (বি চি চি আই) ৰাহুল দ্ৰাবিড়ৰ স্থানত ভাৰতীয় ক্ৰিকেট দলৰ মুখ্য প্ৰশিক্ষক হিচাপে গৌতম গম্ভীৰক নিযুক্তি দিয়াৰ পিচত সহায়ক কৰ্মচাৰীসকলৰ বিষয়ে বিভিন্ন মহলৰ পৰা বিভিন্ন খবৰ আহি আছে । বিক্ৰম ৰাথোৰ, পাৰশ মাম্ব্ৰে আৰু টি দিলীপৰ বি চি চি আইৰ সৈতে চুক্তিৰ ম্যাদ উকলি যোৱাৰ পিচত বেটিং, বলিং আৰু ফিল্ডিং প্ৰশিক্ষকক লৈ বৰ্তমান চৰ্চা চলি আছে ।
অৱশ্যে এইবাৰ ভাৰতৰ প্ৰাক্তন অপেনাৰ গম্ভীৰৰ মুখ্য প্ৰশিক্ষক হিচাপে আগমনৰ পিচত সহায়ক কৰ্মচাৰীৰ গাঁথনিত সূক্ষ্ম পৰিৱৰ্তন হ'ব পাৰে । বি চি চি আয়ে নৱনিযুক্ত প্ৰশিক্ষক গম্ভীৰৰ পৰামৰ্শ অনুসৰি 'বেটিং প্ৰশিক্ষক'ৰ পদ বিলোপ কৰাৰ সম্ভাৱনা আছে । ইয়াৰ পৰিৱৰ্তে এই পদটোক 'সহকাৰী প্ৰশিক্ষক' হিচাপে নামকৰণ কৰাৰ সম্ভাৱনা আছে । এই পদৰ দৌৰত থকা ব্যক্তিজন আন কোনো নহয়, ভাৰত আৰু মুম্বাইৰ প্ৰাক্তন অলৰাউণ্ডাৰ অভিষেক নায়াৰ । তেনে ক্ষেত্ৰত গম্ভীৰে নিজেই দলটোৰ বেটিং দিশ চোৱাচিতা কৰিব ।
আনহাতে, বলিং প্ৰশিক্ষকৰ পদত বৰ্তমান কেইবাটাও নাম চৰ্চাত আছে । ভাৰতৰ প্ৰাক্তন চিমাৰ লক্ষ্মীপতি বালাজী আৰু আৰ বিনয় কুমাৰৰ উপৰি জাহিৰ খানৰ নামো চৰ্চাত আছে । সূত্ৰ মতে, গম্ভীৰে বলিং প্ৰশিক্ষকৰ পদত দক্ষিণ আফ্ৰিকাৰ প্ৰাক্তন পেচাৰ মৰ্নে মৰ্কেলৰ নামো পৰামৰ্শ দিছে । কিন্তু বি চি চি আয়ে এই পৰামৰ্শ অনুসৰি কাম কৰিবনে নাই সেয়া এতিয়াও স্পষ্ট নহয় ।
"সকলো সহায়ক কৰ্মচাৰীৰ পদৰ বাবে বহুতো নাম চৰ্চাত আছে । কিন্তু এতিয়ালৈকে বি চি চি আইৰ তৰফৰ পৰা একো চূড়ান্ত কৰা হোৱা নাই । আগন্তুক কেইদিনমানৰ ভিতৰত পৰিস্থিতি কেনেদৰে মোকাবিলা কৰা হ'ব সেয়া লক্ষ্য কৰি তাৰ পিচত আমি চূড়ান্ত সিদ্ধান্ত ল'ব পাৰোঁ ।" বি চি চি আইৰ এগৰাকী শীৰ্ষ বিষয়াই শুকুৰবাৰে ইটিভি ভাৰতক কয় ।
জানিব পৰা গৈছে যে অশোক মালহোত্ৰা, যতীন পৰাঞ্জপে আৰু সুলক্ষণা নায়কক লৈ গঠিত ক্ৰিকেট উপদেষ্টা সমিতিয়ে এতিয়ালৈকে মুখ্য প্ৰশিক্ষক পদৰ বাবে গৌতম গম্ভীৰ আৰু ভাৰতৰ প্ৰাক্তন অলৰাউণ্ডাৰ ডব্লিউ ভি ৰমণৰ দুটা সাক্ষাৎকাৰ অনুষ্ঠিত কৰিছিল । তাত তেওঁলোকৰ শৈলী উপস্থাপনৰ পিচত গম্ভীৰক অগ্ৰাধিকাৰ দিয়া হৈছিল । কিন্তু সহায়ক কৰ্মচাৰীৰ পদ পূৰণৰ বাবে কোনো সাক্ষাৎকাৰ লোৱা হোৱা নাই । "সহায়ক কৰ্মচাৰীসকলৰ বাবে আৰু কোনো সাক্ষাৎকাৰ অনুষ্ঠিত নহ'ব পাৰে, কিয়নো উক্ত পদসমূহ বি চি চি আয়ে পোনপটীয়াকৈ পূৰণ কৰিব পাৰে ।" বিষয়াগৰাকীয়ে লগতে কয় ।
উল্লেখ্য যে ৰাহুল দ্ৰাবিড়ক ২০২১ চনত বি চি চি আইৰ তদানীন্তন সভাপতি তথা দ্ৰাবিড়ৰ এসময়ৰ সতীৰ্থ সৌৰভ গাংগুলীয়ে পোনপটীয়াকৈ ভাৰতীয় দলৰ মুখ্য প্ৰশিক্ষক হিচাপে বাছনি কৰিছিল ।
