কমলাক্ষ দে’ পুৰকায়স্থৰ পুত্তলিকা দাহ শিলচৰ, 15 ফেব্ৰুৱাৰী : শিলচৰত কংগ্ৰেছী বিধায়ক কমলাক্ষ দে’ পুৰকায়স্থৰ পুত্তলিকা দাহ ৷ জিলা কংগ্ৰেছে বিধায়কজনৰ পুত্তলিকা দাহ কৰি সাব্যস্ত কৰে তীব্ৰ প্ৰতিবাদ ৷ পুত্তলিকা দাহ কৰি বিধায়ক কমলাক্ষ দে’ পুৰকায়স্থক বিভীষণ আখ্যা কংগ্ৰেছৰ ৷
মুখ্যমন্ত্ৰীক গামোচা পিন্ধাই ৰাজ্যৰ বিজেপি চৰকাৰৰ সকলো কাম-কাজলৈ নিজৰ সহযোগিতাৰ কথা প্ৰকাশ কৰাৰ পিছৰে পৰা বিধায়ক কমলাক্ষ দে’ৰ বিৰুদ্ধে বৰাকত কংগ্ৰেছ দলৰ নেতা-কৰ্মী সকলৰ মাজত তীব্ৰ ক্ষোভ অব্যাহত আছে ৷ বিধায়ক কমলাক্ষৰ বিৰুদ্ধে বৰাকত সৰৱ হৈ পৰিছে কংগ্ৰেছ নেতা-কৰ্মী ৷
কৰিমগঞ্জ আৰু হাইলাকান্দিৰ পাছত এইবাৰ বিধায়ক কমলাক্ষ দে’ পুৰকায়স্থৰ বিৰুদ্ধে সৰৱ হৈ পৰিছে শিলচৰ জিলা কংগ্ৰেছ ৷ আজি বিধায়কজনৰ পুত্তলিকা দাহ কৰি তেওঁক তীব্ৰ গৰিহণা দিয়ে শিলচৰ জিলা কংগ্ৰেছৰ নেতা-কৰ্মী সকলে ৷ হাতে হাতে প্লে কাৰ্ড লৈ 'কমলাক্ষ দে’ পুৰকায়স্থ নামত গ’ বেক' ধ্বনি দিয়ে প্ৰতিবাদকাৰী সকলে ৷
প্ৰতিবাদস্থলীত প্ৰতিবাদকাৰী সকলে কয় যে, দলত থাকি দলৰ সৈতে বিশ্বাসঘাতকতা কৰিছে কমলাক্ষ দে’ পুৰকায়স্থই ৷ লগতে কমলাক্ষ দে’ পুৰকায়স্থক বিভীষণ বুলিও আখ্যা দিয়ে শিলচৰ জিলা কংগ্ৰেছে ৷ আনহাতে তেওঁলোকে কয় যে, তেওঁলোকে শীঘ্ৰেই বিজেপিত যোগদান কৰক ৷ লগতে তেনে লোকক সকীয়নি প্ৰদান কৰে শিলচৰ জিলা কংগ্ৰেছে ৷
উল্লেখ্য যে, অসম বিধান সভা চৌহদত বুধবাৰে মুখ্যমন্ত্ৰীক গামোচা পিন্ধাই কংগ্ৰেছৰ দুই বিধায়ক বসন্ত দাস আৰু কমলাক্ষ দে’ পুৰকায়স্থই ৷ লগতে মুকলিকৈ ৰাজ্যৰ বিজেপি চৰকাৰৰ সকলো কাম-কাজলৈ নিজৰ সহযোগিতাৰ কথা প্ৰকাশ কৰে দুয়োজন কংগ্ৰেছী বিধায়কে ৷ ইফালে প্ৰদেশ কংগ্ৰেছৰ কাৰ্যকৰী সভাপতিৰ পদৰ পৰাও পদত্যাগ কৰে বিধায়ক কমলাক্ষ দে’ পুৰকায়স্থই ৷ প্ৰদেশ কংগ্ৰেছৰ সভাপতি ভূপেন বৰালৈ নিজৰ পদত্যাগ পত্ৰ প্ৰেৰণ কৰে বিধায়কজনে ৷ পত্ৰখনত কংগ্ৰেছ দলৰ প্ৰাথমিক সদস্য ৰূপে দলটোতে থাকিব বুলি উল্লেখ কৰে বিধায়ক কমলাক্ষই ৷ ইয়াৰ পিছতে মুখ্যমন্ত্ৰী হিমন্ত বিশ্ব শৰ্মাক সাক্ষাৎ কৰে বিধায়কজনে ৷
লগতে পঢ়ক : মুখ্যমন্ত্ৰীৰ শৰণত 2 কংগ্ৰেছী বিধায়ক ! কাৰ্যকৰী সভাপতিৰ পদ এৰিলে কমলাক্ষই
