ইণ্টাৰনেশ্যনেল ডেস্ক,৫ ফেব্ৰুৱাৰী : অহা ৮ ফেব্ৰুৱাৰীত পাকিস্তানত সাধাৰণ নিৰ্বাচন অনুষ্ঠিত হ'ব । এইবাৰ নিৰ্বাচনত পাকিস্তান মাৰ্কাজী মুছলিম লীগ নামৰ এটা নতুন দলে প্ৰতিদ্বন্দ্বিতা আগবঢ়াইছে । জানিব পৰা মতে এই দলটো ২০০৮ চনৰ মুম্বাই আক্ৰমণৰ মাষ্টাৰমাইণ্ড হাফিজ ছৈইদৰ দল । যি নিষেধাজ্ঞাৰ পৰা হাত সাৰিবলৈ এক নতুন উপায় হাতত লৈছে । সংবাদ মাধ্যমৰ প্ৰতিবেদনত এই কথা প্ৰকাশ পাইছে ।
বিবিচি উৰ্দুত প্ৰকাশিত এক প্ৰতিবেদন অনুসৰি পাকিস্তানৰ বিভিন্ন চহৰৰ পৰা দলটোৱে মনোনীত কৰা কেইজনমান প্ৰাৰ্থী আছে যি হয় হাফিজ ছৈইদৰ আত্মীয় বা অতীতত নিষিদ্ধ লস্কৰ-ই-তৈবা, জামাত-উদ-দাৱা বা মিলি মুছলিম লীগৰ সৈতে জড়িত আছিল । বৰ্তমান লাহোৰৰ কাৰাগাৰত বন্দী হৈ থকা ছাইদক পাকিস্তানী সন্ত্ৰাসবাদ বিৰোধী আদালতে কেইবাটাও সন্ত্ৰাসবাদী বিত্তীয় গোচৰত মুঠ ৩১ বছৰৰ কাৰাদণ্ড প্ৰদান কৰিছে । ২০০৮ চনৰ ১০ ডিচেম্বৰত ৰাষ্ট্ৰসংঘৰ দ্বাৰা তেওঁক সন্ত্ৰাসবাদী হিচাপে তালিকাভুক্ত কৰা হৈছিল ।
পাকিস্তানে লস্কৰ-ই-তৈবা, জামাত-উদ-দাৱা (জেইউডি) আৰু ইয়াৰ সহযোগী আৰু প্ৰতিষ্ঠানসমূহক নিষিদ্ধ সংগঠনৰ তালিকাত ৰাখিছে । জেইউডিত আছে খৈৰ নাছ ইণ্টাৰনেচনেল ট্ৰাষ্ট, ফালাহ ইনছানিয়াত ফাউণ্ডেচন, আল-আনফল ট্ৰাষ্ট, খামতাব খালিক ইনষ্টিটিউচন, আল-দাৱাত আল-আৰ্শাদ, আল-হামাদ ট্ৰাষ্ট, আল-মদিনা ফাউণ্ডেচন আৰু মু আজ বিন জাবাল এডুকেশ্যনেল ট্ৰাষ্ট । শনিবাৰে প্ৰকাশিত বাতৰিটোত পাকিস্তানৰ ধৰ্মীয় দলসমূহক অনুসৰণ কৰা বিশ্লেষকসকলৰ উদ্ধৃতিৰে দাবী কৰা হৈছে যে পাকিস্তান মাৰ্কাজী মুছলিম লীগ হৈছে ছৈইদ নেতৃত্বাধীন জেইউডিৰ নতুন ৰাজনৈতিক মুখ ।
অৱশ্যে, দলৰ এগৰাকী মুখপাত্ৰই ছৈইদৰ সংগঠনবোৰৰ সৈতে ইয়াৰ সম্পৰ্কৰ কথা অস্বীকাৰ কৰিছে । ছৈইদৰ পুত্ৰ হাফিজ তালহা ছৈইদে পাকিস্তান মাৰ্কাজী মুছলিম লীগ দলৰ হৈ প্ৰতিদ্বন্দ্বিতা আগবঢ়াইছে আৰু লাহোৰ সমষ্টিৰ নম্বৰ এনএ-১২২ৰ পৰা নেচনেল এচেম্বলীৰ বাবে মনোনয়ন দাখিল কৰিছে । পাকিস্তান মুছলিম লীগ-নৱাজ নেতা তথা প্ৰাক্তন ফেডাৰেল মন্ত্ৰী খাজা চাদ ৰফিকে একেটা সমষ্টিৰ পৰা প্ৰতিদ্বন্দ্বিতা আগবঢ়াইছে ।
একেদৰে, ছৈইদৰ জোৱাই হাফিজ নেক গুজ্জৰে পিপি-১৬২ৰ বাবে পাকিস্তান মাৰ্কাজী মুছলিম লীগৰ পৰা প্ৰতিদ্বন্দ্বিতা কৰিছে । উল্লেখ্য যে জামাত-উদ-দাৱা (জেইউডি)ৰ সৈতে জড়িত কিছুমান লোকে 'মিল্লি মুছলিম লীগ' দলৰ হৈ ২০১৮ চনৰ নিৰ্বাচনত অংশগ্ৰহণ কৰিবলৈ চেষ্টা কৰিছিল, কিন্তু পাকিস্তানৰ নিৰ্বাচন আয়োগে সংগঠনটো নিষিদ্ধ কৰিছিল আৰু চৰকাৰৰ বিৰোধিতাৰ পিচত পঞ্জীয়নৰ বাবে দলটোৰ আবেদন নাকচ কৰিছিল ।
আবেদন প্ৰত্যাখ্যান কৰাৰ পিচত দলৰ একাংশ প্ৰাৰ্থীয়ে 'আল্লাহু আকবৰ' তেহৰিক নামৰ এটা অজ্ঞাত দলৰ পৰা প্ৰতিদ্বন্দ্বিতা কৰিছিল । কিন্তু সকলো প্ৰাৰ্থী পৰাজিত হৈছিল । মিল্লি মুছলিম লীগ পূৰ্বে পাকিস্তানৰ নিষিদ্ধ দলৰ তালিকাত নাছিল, কিন্তু ২০১৮ চনত আমেৰিকাৰ কোষাগাৰ বিভাগে এই দলটোক বিদেশ বিভাগৰ অনুমোদনত নিষিদ্ধ ঘোষণা কৰিছিল আৰু ইয়াৰ সৈতে জড়িত ৭ জন লোকক সন্ত্ৰাসবাদীৰ তালিকাত ৰখা হৈছিল ।
লগতে পঢ়ক :পাকিস্তানত ২৮ টা নমুনাত ধৰা পৰিছে পলিঅ' ভাইৰাছৰ প্ৰকাৰ ১ৰ অৱস্থিতি
