নিউজ ডেস্ক, ৭ মে': মঙলবাৰে উচ্চতম ন্যায়ালয়ে দিল্লীৰ মুখ্যমন্ত্ৰী অৰবিন্দ কেজৰিৱালৰ আবেদনৰ শুনানি গ্ৰহণ কৰে । কেজৰিৱালে গ্ৰেপ্তাৰক প্ৰত্যাহ্বান জনাই দাখিল কৰা আবেদন সন্দৰ্ভত দুয়োপক্ষৰ যুক্তিৰ শুনানি গ্ৰহণ কৰে আদালতে । এই সময়ছোৱাত দেশৰ সৰ্ববৃহৎ আদালতেও নিৰ্বাচনৰ প্ৰতি লক্ষ্য ৰাখি অৰবিন্দ কেজৰিৱালক অন্তৱৰ্তীকালীন সকাহ দিয়াৰ কথা বিবেচনা কৰে । অৱশ্যে এতিয়াও কোনো সিদ্ধান্ত দিয়া নাই আদালতে । এতিয়া ৯ মে’ত হ’ব শুনানি ।
শুনানিৰ সময়ত উচ্চতম ন্যায়ালয়ে প্ৰৱৰ্তন সঞ্চালকালয়ক প্ৰশ্ন কৰে যে দিল্লী আবকাৰী নীতি গোচৰত অপৰাধৰ পৰিমাণ ২-৩ বছৰত কেনেকৈ ১০০ কোটিৰ পৰা ১১০০ কোটি টকালৈ বৃদ্ধি পালে । ইয়াৰ উপৰিও আদালতে প্ৰশ্ন উত্থাপন কৰে যে কেন্দ্ৰীয় সংস্থাটোৱে কিয় ইমান সময় লৈছিল তদন্তত আৰু কিয় পোনপটীয়াকৈ প্ৰশ্ন উত্থাপন কৰা নাছিল ? এই সন্দৰ্ভত ইডিক প্ৰতিনিধিত্ব কৰি অতিৰিক্ত ছলিচিটৰ জেনেৰেল (এ এছ জি) এছ ভি ৰাজুৱে ন্যায়াধীশ সঞ্জীৱ খান্না আৰু দিপাংকৰ দত্তৰ বিচাৰপীঠৰ সন্মুখত কয় যে ডিজিটেল প্ৰমাণ ধ্বংস কৰা হৈছে ।
দিল্লী আবকাৰী নীতিৰ গোচৰত কেজৰিৱালক গ্ৰেপ্তাৰ কৰাৰ আবেদনৰ বিৰোধিতা কৰি উচ্চতম ন্যায়ালয়ত শপতনামা দাখিল কৰিছিল ইডিয়ে । ইয়াত সংস্থাটোৱে দাবী কৰিছিল যে ৩৬ জন লোকে ১৭০ টাতকৈও অধিক মোবাইল ফোন সলনি বা ধ্বংস কৰিছে আৰু গুৰুত্বপূৰ্ণ ডিজিটেল প্ৰমাণ আৰু ধনৰ ট্ৰেইল সক্ৰিয়ভাৱে ধ্বংস কৰা হৈছে ।
উচ্চতম ন্যায়ালয়ৰ উত্তৰত কি কলে এছ ভি ৰাজুৱে ?
ৰাজুৱে যুক্তি দিছিল যে ১০০ কোটি টকাৰ লেনদেন হাৱালাৰ জৰিয়তে কৰা হৈছিল আৰু আন ৰাজ্যত ব্যয় কৰা হৈছিল । ১১০০ টকা অপৰাধৰ উপাৰ্জন বুলি দাবী কৰে ৰাজুৱে । ন্যায়াধীশ খান্নাই প্ৰশ্ন কৰে, ১০০ কোটি টকা অপৰাধৰ উপাৰ্জন আছিল । ২ বা ৩ বছৰত কেনেকৈ ১১০০ কোটি টকা হ'ল ?
এই বিষয়ে ৰাজুৱে উত্তৰ দিয়ে যে পাইকাৰী বিক্ৰেতাই এই ক্ষেত্ৰত ৫৯০ কোটি টকা লাভ কৰিছে । ইয়াৰ পিছত ন্যায়াধীশ খান্নাই কয় যে সমগ্ৰ লাভ অপৰাধৰ পৰা পোৱা ধন নহয় আৰু প্ৰায় ৩৩৮ কোটি টকাৰ পাৰ্থক্য আছে ।
তদন্ত মুখ্যমন্ত্ৰীৰ ওপৰত কেন্দ্ৰিভূত হোৱা নাছিল
অতিৰিক্ত ছলিচিটৰ জেনেৰেলে কয় যে যেতিয়া তদন্ত আৰম্ভ হৈছিল তেতিয়া দিল্লীৰ মুখ্যমন্ত্ৰীৰ ওপৰত কেন্দ্ৰিভূত নাছিল আৰু প্ৰথম অৱস্থাত তেওঁৰ সৈতে জড়িত এটাও প্ৰশ্ন কৰা হোৱা নাছিল যদিও তদন্ত আগবাঢ়ি যোৱাৰ লগে লগে কেজৰিৱালৰ ভূমিকা পোহৰলৈ আহিছিল । বিচাৰপীঠে কয় যে দিল্লীৰ আবকাৰী নীতিৰ বিষয়টোৰ তদন্তত ২ বছৰ সময় লাগিছিল আৰু কোনো তদন্তকাৰী সংস্থাই ইয়াক উন্মোচন কৰিবলৈ ২ বছৰ সময় লাগিছিল বুলি কোৱাটো সঠিক নহয় ।
ৰাজুৱে যুক্তি আগবঢ়ায় যে গোৱা নিৰ্বাচনৰ সময়ত কেজৰিৱালে ৰাজ্যখনৰ এখন ৭ তাৰকাযুক্ত হোটেলত থকা বুলি ধৰা পৰিছে আৰু তেওঁৰ খৰচ তেওঁৰ পৰা নগদ ধন লোৱা এজন ব্যক্তিয়ে বহন কৰিছিল । ৰাজুৱে জোৰ দি কয় যে এইটো কোনো ৰাজনৈতিক উদ্দেশ্যপ্ৰণোদিত বিষয় নহয় ।
কিয় পলম হৈছে তদন্তত ?
ন্যায়াধীশ খান্নাই ৰাজুক কয় যে একমাত্ৰ বিষয়টো হ’ল সংস্থাটোৱে কিয় তদন্তত পলম কৰিছে । এই বিষয়ে তেওঁ কিয় প্ৰশ্ন কৰা নাছিল ? তেওঁ প্ৰশ্ন কৰে, "তদন্তত ইমান সময় কিয় লাগিল আৰু প্ৰত্যক্ষ প্ৰশ্ন বা প্ৰাসংগিক প্ৰশ্ন কিয় কৰা নহ’ল ?" ৰাজুৱে কয় যে গোচৰটো বুজিবলৈ সময় লাগে আৰু অভিযুক্তই কেনেধৰণৰ ষড়যন্ত্ৰ ৰচনা কৰিছিল সেই বিষয়ে তদন্তকাৰী বিষয়াজনে জানিব বিচাৰে ।
উচ্চতম ন্যায়ালয়ে আৰু কয় যে অৰবিন্দ কেজৰিৱালৰ অন্তৱৰ্তীকালীন জামিনৰ কথা বিবেচনা কৰিব, কিয়নো তেওঁ দিল্লীৰ নিৰ্বাচিত মুখ্যমন্ত্ৰী আৰু নিৰ্বাচন চৌদিশে চলি আছে । কেৱল এয়াই নহয়, কেজৰিৱাল আন কোনো বিষয়ত জড়িত নহয় ।
একে সময়তে ইডিয়ে কয় যে ইডিৰ চমনৰ কোনো উত্তৰ নিদিয়াকৈ কেজৰিৱালে ৬ মাহ নষ্ট কৰিলে । মেহতাই আৰু কয় যে ২০২৩ চনৰ অক্টোবৰ মাহত প্ৰথমবাৰৰ বাবে কেজৰিৱালক মাতি অনা হৈছিল । কেন্দ্ৰই কয় যে দিল্লীৰ মুখ্যমন্ত্ৰীৰ কোনো বিভাগ নাই আৰু তেওঁ কোনো ফাইলত চহী কৰা নাছিল ।
মুখ্যমন্ত্ৰীৰ বিৰুদ্ধে বিজেপি কৰ্মীৰ প্ৰতিবাদ
ইফালে দিল্লীৰ আই টি অ’ত দিল্লীৰ মুখ্যমন্ত্ৰী অৰবিন্দ কেজৰিৱালৰ বিৰুদ্ধে প্ৰতিবাদ সাব্যস্ত কৰে বিজেপি কৰ্মী আৰু নেতাই । এই বিক্ষোভৰ নেতৃত্বত আছে দিল্লী বিজেপিৰ সভাপতি বীৰেন্দ্ৰ সাচদেৱ ।
ইফালে, দিল্লীৰ এখন আদালতে ধন সৰবৰাহৰ গোচৰত কেজৰিৱালৰ ন্যায়িক জিম্মা ২০ মে’লৈ বৃদ্ধি কৰে । চিবিআই আৰু ইডি বিষয়ৰ বিশেষ ন্যায়াধীশ কাবেৰী বাৱেজাই কেজৰিৱালৰ জিম্মা ম্যাদ বৃদ্ধি কৰে । যোৱা ২১ মাৰ্চত গ্ৰেপ্তাৰ হোৱা কেজৰিৱালক বৰ্তমান তিহাৰ কাৰাগাৰত ন্যায়িক জিম্মাত ৰখা হৈছে ।
