নিউজ ডেস্ক, 5 জুন: লোকসভা নিৰ্বাচনৰ ফলাফল ঘোষণাৰ পিচত এতিয়া চৰকাৰ গঠনৰ বাবে ব্যাপক জল্পনা-কল্পনা চলিছে এনডিএ আৰু ইণ্ডি দুয়োটা মিত্ৰজোঁটৰ ৷ এনডিএই 293 ৰো অধিক আসন লাভ কৰাৰ বিপৰীতে ইণ্ডি মিত্ৰজোঁটে লাভ কৰিছে 232 খন আসন ৷ অৱশ্যেই চৰকাৰ গঠনৰ পথত শক্তিশালী হৈ আছে এন ডি এ ৷ কিন্তু তথাপিও যেন আলোচনা তথা পৰিকল্পনাৰ শেষ নাই ৷
কোনো দলেই যাতে এই মুহূৰ্তত মিত্ৰতা ভংগ কৰিব নোৱাৰে বা ইণ্ডিৰ লগ ল’ব নোৱাৰে তাৰ চিন্তাৰ শেষ নোহোৱা হৈছে বিজেপিৰ ৷ যিমান পাৰি সোনকালে চৰকাৰ গঠন কৰি নৰেন্দ্ৰ মোদীক তৃতীয়বাৰলৈ প্ৰধানমন্ত্ৰীৰ আসনত বহুওৱাৰ প্ৰচেষ্টাত ব্ৰতী হৈছে গেৰুৱা দলটো ৷
ইয়াৰ মাজতে লাভ কৰা খবৰ অনুসৰি এন ডি এই অহা ৭ জুনত বিয়লি ৫ বজাত ৰাষ্ট্ৰপতি দ্ৰৌপদী মুৰ্মূক সাক্ষাৎ কৰি চৰকাৰ গঠনৰ অনুমতি বিচাৰিব ৷ এন চন্দ্ৰবাবু নাইডু আৰু নীতিশ কুমাৰকে ধৰি গুৰুত্বপূৰ্ণ নেতাসকলে মিত্ৰজোঁটক সমৰ্থন দি একেৰাহে তৃতীয়বাৰৰ বাবে চৰকাৰ গঠন কৰাৰ প্ৰতিশ্ৰুতি দিয়াৰ পিচতে এই পদক্ষেপ গ্ৰহণ কৰা হৈছে ।
ইয়াৰ পূৰ্বে দিল্লীত গৃহীত এক প্ৰস্তাৱত এন ডি এৰ নেতাসকলে সৰ্বসন্মতিক্ৰমে মোদীক নেতা হিচাপে নিৰ্বাচিত কৰে ৷ মোদীৰ নেতৃত্বত তেওঁলোকৰ প্ৰস্তাৱ অনুসৰি, মুখ্য লক্ষ্য হৈছে দৰিদ্ৰ, মহিলা আৰু যুৱসকলক সেৱা আগবঢ়োৱা । ই দেশত গুৰুত্বপূৰ্ণ উন্নয়নমূলক পৰিৱৰ্তন অনাৰ কথাও কয় ।
লগতে পঢ়ক: তৃতীয়টো কাৰ্যকালৰ বাবে সাজু নৰেন্দ্ৰ মোদী, 7 জুনত দিল্লীত এন ডি এ ৰ বৈঠক - NDA meeting in New Delhi
ইফালে একনাথ সিন্দে নেতৃত্বাধীন শিৱসেনাই নেশ্যনেল ডেম’ক্ৰেটিক এলায়েন্স (এন ডি এ)ক সমৰ্থন পত্ৰ দিয়ে, মিত্ৰতা এৰি নিদিয়াৰ প্ৰতিশ্ৰুতি দিয়ে সিন্দেই ৷ কাৰণ তেওঁলোকে একেৰাহে তৃতীয়বাৰৰ বাবে কেন্দ্ৰত চৰকাৰ গঠন কৰিবলৈ ওলাইছে ।
আনহাতে ইণ্ডি মিত্ৰজোঁটেও চৰকাৰ গঠনৰ বাবে প্ৰচেষ্টা চলোৱাৰ লগতে মিত্ৰতাত থকা দলৰ নেতাসকলৰ সৈতে আলোচনাত বহিছে ৷ বিহাৰৰ মুখ্যমন্ত্ৰী নীতিশ কুমাৰক কেনেবাকৈ পুনৰ ইণ্ডি মিত্ৰজোঁটলৈ ঘূৰাই আনিব পাৰি নেকি তাৰো চেষ্টা চলাইছে তেওঁলোকে ৷ কিন্তু ইতিমধ্যে এন ডি এক সমৰ্থন জনাই নৰেন্দ্ৰ মোদীকেই পুনৰ প্ৰধানমন্ত্ৰী পাতিবলৈ সাজু হৈছে নীতিশ কুমাৰ ৷
