নগাঁও, 25 এপ্ৰিল: ভোটগ্ৰহণৰ এটা দিন পূৰ্বে নগাঁৱত সংবাদমেল সম্বোধন কৰি আৰক্ষীৰ বিৰুদ্ধে সোচ্চাৰ হৈ পৰে কংগ্ৰেছ প্ৰাৰ্থী প্ৰদ্যুৎ বৰদলৈ । সংবাদমেল সম্বোধন কৰি কংগ্ৰেছ প্ৰাৰ্থী প্ৰদ্যুৎ বৰদলৈৰ মন্তব্য- ‘‘নগাঁৱত মই ৰাইজৰ আশীৰ্বাদ পাবলৈ সক্ষম হৈছো । মোৰ জনপ্ৰিয়তা দেখি বিজেপি শংকিত হৈছে । যোৱা চাৰিদিনত পীযুষ হাজৰীকাৰ নিৰ্দেশত নগাঁও আৰু মৰিগাঁও আৰক্ষীয়ে অত্যাচাৰ চলাইছে কংগ্ৰেছ কৰ্মীৰ ওপৰত ।”
বুধবাৰে কংগ্ৰেছৰ অন্তিম প্ৰচাৰৰ সময়তো ইটা ভাটাৰ স্বত্বাধিকাৰী তথা মণ্ডল কংগ্ৰেছৰ সভাপতি মজিবুৰ ৰহমানক বেআইনীভাৱে গ্ৰেপ্তাৰ কৰাৰ অভিযোগ উত্থাপন কৰে প্ৰদ্যুৎ বৰদলৈয়ে ৷ আৰক্ষীৰ বিৰুদ্ধে পক্ষপাতমূলক ভূমিকা গ্ৰহণ কৰাৰো অভিযোগ কৰে কংগ্ৰেছ প্ৰাৰ্থী প্ৰদ্যুৎ বৰদলৈয়ে ।
মজিবুৰ ৰহমানৰ ইটাভাটাত কাম কৰা এক দম্পতীৰ লগত থকা শিশু সন্তানক ভয় খুৱাই শিশু শ্ৰমিক সজাই আৰক্ষীয়ে আটক কৰাৰ অভিযোগ কৰে প্ৰদ্যুৎ বৰদলৈয়ে । আৰক্ষীয়ে আটক কৰা মজিবুৰ ৰহমানৰ বিৰুদ্ধে শিশু সৰবৰাহৰ ভুৱা গোচৰ ৰুজু কৰা বুলিও নগাঁও লোকসভা সমষ্টিৰ প্ৰাৰ্থীগৰাকীয়ে অভিযোগ উত্থাপন কৰে । কেৱল এয়াই নহয়, কংগ্ৰেছ প্ৰাৰ্থী প্ৰদ্যুৎ বৰদলৈৰ পৰিয়ালৰ লোকৰ লগতে কংগ্ৰেছী নেতা-কৰ্মীক নগাঁও আৰু মৰিগাঁও আৰক্ষীয়ে অবাইচ গালি-গালাজ কৰাৰো অভিযোগ উত্থাপন কৰে কংগ্ৰেছ প্ৰাৰ্থীগৰাকীয়ে ।
বাচি বাচি কংগ্ৰেছৰ নেতাক আৰক্ষীয়ে হাৰাশাস্তি কৰাৰো অভিযোগ কংগ্ৰেছ প্ৰাৰ্থীগৰাকীৰ । আনকি কংগ্ৰেছৰ পুলিং এজেণ্টসকলকো আৰক্ষীয়ে ভয়-ভাবুকি প্ৰদৰ্শন কৰাৰ গুৰুতৰ অভিযোগ উত্থাপন কৰে বৰদলৈয়ে । এই সন্দৰ্ভত ভাৰতৰ নিৰ্বাচন আয়োগক অভিযোগ দাখিল কৰি নগাঁও আৰু মৰিগাঁও জিলাৰ দুই আৰক্ষী অধীক্ষকক নিৰ্বাচনৰ পূৰ্বেই অপসাৰণৰ বাবে দাবী জনাই প্ৰদ্যুৎ বৰদলৈয়ে ।
ইপিনে এ আই ইউ ডি এফৰ সভাপতি বদৰুদ্দিন আজমলে বিজেপিৰ হেলিকপ্টাৰ ব্যৱহাৰ কৰা বুলি অভিযোগ উত্থাপন কৰা প্ৰদ্যুৎ বৰদলৈৰ বিৰুদ্ধে বৃহস্পতিবাৰে নগাঁও সদৰ আৰক্ষী থানাত এজাহাৰ দাখিল কৰা সন্দৰ্ভতো প্ৰতিক্ৰিয়া ব্যক্ত কৰে প্ৰদ্যুৎ বৰলদৈয়ে ।
AIUDF আৰু বদৰুদ্দিন আজমলে হিমন্ত বিশ্ব শৰ্মাই দিয়া হেলিকপ্টাৰত উঠি প্ৰচাৰ চলোৱা বুলি উত্থাপন কৰা অভিযোগ সত্য বুলি পুনৰ এবাৰ দাবী কৰি আমিনুল ইছলামক উভতি ধৰে প্ৰদ্যুৎ বৰলদৈয়ে । বিজেপিৰ হেলিকপ্টাৰ এ আই ইউ ডি এফে ব্যৱহাৰ কৰাৰ সকলো তথ্য থকা বুলিও দাবী কৰি আমিনুল ইছলামে এজাহাৰ দাখিল কৰা কাৰ্যক স্বাগতম জনায় প্ৰদ্যুৎ বৰলদৈয়ে ।
আনহাতে বিজেপি প্ৰাৰ্থী সুৰেশ বৰায়ো এক সংবাদ মেল সম্বোধন কৰি বিজেপিৰ বিৰুদ্ধে অপপ্ৰচাৰ তথা ষড়যন্ত্ৰ কৰি বিভিন্ন ভিডিঅ’ প্ৰচাৰ কৰাৰ আশংকা প্ৰকাশ কৰা সন্দৰ্ভতো মন্তব্য কৰে প্ৰদ্যুৎ বৰদলৈয়ে । কংগ্ৰেছে কোনো ভুৱা ভিডিঅ’ প্ৰচাৰ নকৰে বুলি উল্লেখ কৰি সকলো সত্য ভিডিঅ’হে কংগ্ৰেছে প্ৰচাৰ কৰে বুলি মন্তব্য কৰে প্ৰদ্যুৎ বৰলদৈয়ে ৷
উল্লেখযোগ্য যে, ভোটগ্ৰহণৰ এটা দিন পূৰ্বে তুমুল বাক-বিতণ্ডাত লিপ্ত হয় নগাঁও লোকসভা সমষ্টিৰ তিনি প্ৰাৰ্থী সুৰেশ বৰা, আমিনুল ইছলাম আৰু প্ৰদ্যুৎ বৰদলৈ । প্ৰথমে বিজেপি প্ৰাৰ্থী সুৰেশ বৰাই এখন সংবাদমেল সম্বোধন কৰি কংগ্ৰেছৰ বিৰুদ্ধে সাম্প্ৰদায়িক বিষবাষ্প বিয়পোৱাৰ আশংকা প্ৰকাশ কৰাৰ কিছু সময় পিচতেই এ আই ইউ ডি এফৰ প্ৰাৰ্থী আমিনুল ইছলাম নগাঁও সদৰ আৰক্ষী থানাত উপস্থিত হৈ কংগ্ৰেছ প্ৰাৰ্থী প্ৰদ্যুৎ বৰদলৈৰ বিৰুদ্ধে আৰক্ষী থানাত এজাহাৰ দাখিল কৰে ।
এ আই ইউ ডি এফে বিজেপিৰ হেলিকপ্টাৰ লৈ প্ৰচাৰ চলোৱা বুলি প্ৰদ্যুৎ বৰদলৈয়ে কৰা অভিযোগ মিছা বুলি মন্তব্য কৰে আমিনুল ইছলামে । পৰৱৰ্তী সময়ত আমিনুল ইছলামক সকলো তথ্য থকা বুলি প্ৰত্যাহ্বান জনাই প্ৰদ্যুৎ বৰদলৈয়ে ।
লগতে পঢ়ক: ভাল দিনৰ নামত বিজেপিয়ে সকলোকে ভেড়া সজালে: দেৱব্ৰত শইকীয়া
