শিলচৰ : "ঘৰৰ কোনোবা ল'ৰা-ছোৱালী যদি কিবা কাৰণত অসন্তুষ্ট হয়, তেনেহ'লে অভিভাৱকে ললিপপ দি হ'লেও শান্ত কৰে । অমিয় কান্তিৰ ক্ষেত্ৰত অভিভাৱক মন্ত্ৰী জয়ন্ত মল্লবৰুৱাই এই কামটো কৰিছে ৷" অমিয় কান্তিৰ মনোনয়ন-পত্ৰ প্ৰত্যাহাৰ সন্দৰ্ভত এই মন্তব্য সাংসদ পৰিমল শুক্লবৈদ্যৰ ।
ধলাই উপ-নিৰ্বাচনক কেন্দ্ৰ কৰি কাছাৰ বিজেপিৰ দুই জ্যেষ্ঠ নেতাৰ মাজত চলা শীতল যুঁজে সকলোৰে দৃষ্টি আকৰ্ষণ কৰিছে । সাংসদ পৰিমল শুক্লবৈদ্য আৰু কাছাৰ জিলা বিজেপিৰ উপ-সভাপতি অমিয় কান্তি দাসৰ শীতল যুদ্ধৰ ফলত আকৰ্ষণীয় হৈ পৰিছে ধলাইৰ উপ-নিৰ্বাচন ।
দলীয় টিকট লাভ নকৰাত সাংসদ পৰিমল শুক্লবৈদ্যৰ বিৰুদ্ধে ক্ষোভ প্ৰকাশ কৰি দলত্যাগ কৰি নিৰ্দলীয় প্ৰাৰ্থী হিচাপে ধলাই উপ-নিৰ্বাচনত মনোনয়ন দাখিল কৰিছিল অমিয় কান্তি দাসে । কিন্তু মুখ্যমন্ত্ৰী হিমন্ত বিশ্ব শৰ্মা আৰু অভিভাৱক মন্ত্ৰী জয়ন্ত মল্লবৰুৱাৰ বুজনিত মনোনয়ন প্ৰত্যাহাৰ কৰি পুনৰ দললৈ উভতি আহে অমিয় কান্তি দাস ।
আনহাতে, মুখ্যমন্ত্ৰী আৰু অভিভাৱক মন্ত্ৰীৰ আবেদনত দললৈ উভতি অহা অমিয় কান্তিৰ মনোনয়ন প্ৰত্যাহাৰক লৈ সাংসদ পৰিমল শুক্লবৈদ্যই পুনৰ কটাক্ষ কৰিছে । এই কথাই ইংগিত দিয়ে যে অমিয়কান্তিৰ লগত চলা তেওঁৰ শীতল যুঁজ এতিয়াও অব্যাহত আছে ।
অমিয় কান্তিৰ মনোনয়ন প্ৰত্যাহাৰ সন্দৰ্ভত প্ৰতিক্ৰিয়া প্ৰকাশ কৰি শিলচৰৰ সাংসদ পৰিমল শুক্লবৈদ্যই কয়, "ঘৰৰ কোনো ল'ৰা-ছোৱালী কিবা কাৰণত অসন্তুষ্ট হ'লে, অভিভাৱকৰ দায়িত্ব থাকে তেওঁক বুজনি দিয়া । লাগিলে ললিপপ দি হ'লেও তেওঁক শান্ত কৰাটো অভিভাৱকৰ দায়িত্ব । আৰু অমিয় কান্তিৰ ক্ষেত্ৰত ঠিক একেই কাম কৰিছে অভিভাৱক মন্ত্ৰী জয়ন্তমল্ল বৰুৱাই । যাৰ বাবে জয়ন্ত মল্লবৰুৱাক মই ধন্যবাদ জনাইছো ।"
ইফালে পৰিমল শুক্লবৈদ্যৰ কাৰণেই টিকট লাভ নকৰিলে বুলি অমিয় কান্তিৰ অভিযোগ সন্দৰ্ভত সাংসদগৰাকীয়ে কয়, "বিজেপি নেতৃত্বতক মই তেওঁৰ নাম চুপাৰিশ কৰা নাই । ভাৰতীয় জনতা পাৰ্টীৰ কৰ্মী হিচাপে তেওঁৰ নাম চুপাৰিশ কৰাটো কি বাধ্যতামূলক নেকি ? ধলাইত তেওঁৰ বাহিৰে বিজেপিৰ আন কাৰোবাৰ নাম চুপাৰিশ কৰিব নালাগে বুলি বিজেপিৰ সংবিধানত লিখা আছে নেকি ।"
তেওঁ লগতে কয়, "মোক কোনোৱে তেওঁৰ নাম চুপাৰিশ কৰিবলৈ কোৱা নাই । প্ৰাৰ্থিত্বৰ বাবে ধলাইৰ বিজেপি কৰ্মীসহ ভোটাৰে যিসকলৰ নাম কৈছে মই সেইসকলৰ নাম পাৰ্টীক দিছো । কোনেও মোক অমিয়কান্তি দাসৰ নাম দিব লাগে বুলি কোৱা নাই । যদি ক'লেহেঁতেন তেনেহ'লে মই পাৰ্টীক চুপাৰিশ কৰিলোঁহেঁতেন ।"
