ডিব্ৰুগড়, ২ এপ্ৰিল: লোকসভা নিৰ্বাচনৰ দিন চমু চপাৰ লগে লগে যোৰহাট লোকসভা সমষ্টিত ৰাজনৈতিক পৰিবেশ লক্ষণীয় হৈ উঠিছে । বিজেপি প্ৰাৰ্থী তপন কুমাৰ গগৈক দ্বিতীয়বাৰৰ বাবে জয় কৰাবলৈ মুখ্যমন্ত্ৰী ড৹ হিমন্ত বিশ্ব শৰ্মাৰ পৰা আৰম্ভ কৰি সকলো কেবিনেট মন্ত্ৰী-বিধায়ক ব্যস্ত এতিয়া যোৰহাট লোকসভা সমষ্টিত । কিয়নো তপন কুমাৰ গগৈৰ বিপৰীতে কংগ্ৰেছ প্ৰাৰ্থী গৌৰৱ গগৈয়ে ব্যাপক প্ৰচাৰ অভিযান চলাইছে সমষ্টিটোত ।
আজি চৰাইদেউ জিলাৰ মাহমৰা সমষ্টিত দিনজোৰা কাৰ্যসূচীৰে বিজেপি প্ৰাৰ্থী তপন কুমাৰ গগৈয়ে আৰম্ভ কৰিছে নিৰ্বাচনী প্ৰচাৰ সভা । মাহমৰা সমষ্টিৰ বিভিন্ন প্ৰান্তত ১৩খন প্ৰচাৰ সভাত অংশগ্ৰহণ কৰিব যোৰহাট লোকসভা সমষ্টিৰ বিজেপিৰ মিত্ৰজোঁটৰ প্ৰাৰ্থী তপন কুমাৰ গগৈয়ে । মাহমৰা আৰু জজলিত প্ৰচাৰ চলাই অসম, বিকশিত চৰাইদেউ আৰু বিকশিত মাহমৰাত এই উন্নয়নৰ যাত্ৰা অব্যাহত ৰাখিবলৈ মাহমৰাবাসীক আহ্বান জনায় বিজেপি প্ৰাৰ্থীগৰাকীয়ে । নিৰ্বাচনী প্ৰচাৰ সভাত প্ৰাৰ্থী তপন কুমাৰ গগৈক সংগ দিয়ে মন্ত্ৰী যোগেন মহন আৰু অগপৰ বিষয়ববীয়াই ।
নিৰ্বাচনী প্ৰচাৰ সভাত মাহমৰা অঞ্চলৰ শতাধিক লোকে ভাৰতীয় জনতা পাৰ্টিত যোগদান কৰে । এই সভাত অংশগ্ৰহণ কৰি মন্ত্ৰী যোগেন মহনে কয়, এইবাৰ যোৰহাটত দৰা তপন কুমাৰ গগৈ । আমি দৰাধৰা হৈ আছো । জোৰোণ দিয়া আছে অসম গণ পৰিষদক । গৌৰৱ গগৈ জিকিলে ৰাইজে লগ কৰিবলৈ আমেৰিকালৈ যাব লাগিব । এতিয়াই ৰাইজে সিদ্ধান্ত ল'ব কাষতে পোৱা তপন কুমাৰ গগৈক জিকাব নে কামৰ ফৰৱাৰ্ডিং আনিবলৈ আমেৰিকালৈ যাব ।
লগতে পঢ়ক: ডিফুত বিজেপি প্ৰাৰ্থী অমৰচিং তিছ’ৰ হৈ মুখ্যমন্ত্ৰীৰ বিশাল জনসভা - Lok Sabha Election 2024
