নেশ্যনেল ডেস্ক,৪ জুন : লোকসভা নিৰ্বাচনৰ ভোটগণনা চলি আছে । ইতিমধ্যে ভোটগণনাৰ শেহতীয়া প্ৰৱণতাই দেশবাসীৰ দৃষ্টি আকৰ্ষণ কৰিছে । তাৰ মাজতে চৰ্চাত আছে কাৰাগাৰত বন্দী হৈ থকা খালিস্তানী নেতা অমৃতপাল সিং । শেহতীয়া প্ৰৱণতা অনুসৰি পাঞ্জাবৰ খাদুৰ চাহিব আসনৰ পৰা অমৃতপাল সিঙে ৫০,৪০৫ টা ভোটত আগবাঢ়ি আছে । সমষ্টিটোত অমৃতপাল সিং নিৰ্দলীয় প্ৰাৰ্থী । আনহাতে কংগ্ৰেছ নেতা কুলবীৰ সিং জিৰা পিছ পৰি আছে । একেদৰে আম আদমি পাৰ্টীৰ প্ৰাৰ্থী ৫১,৩২৮ টা ভোটত পিছ পৰি আছে ।
উল্লেখ্য যে খালিস্তানপন্থী নেতাজনক যোৱা বছৰ এপ্ৰিলত পাঞ্জাব আৰক্ষীয়ে গ্ৰেপ্তাৰ কৰিছিল । এমাহৰো অধিক সময় ধৰি পলায়ন কৰি থকাৰ পিচত আৰক্ষীয়ে তেওঁক গ্ৰেপ্তাৰ কৰিবলৈ সক্ষম হয় ।
খাদুৰ চাহিব আসনখনৰ পৰা ২০১৯ চনত কংগ্ৰেছৰ জছবীৰ সিং গিল জয়ী হৈছিল । কংগ্ৰেছে এইবাৰ কুলদীপ সিং জিৰাক আসনখনৰ বাবে মনোনীত কৰিছে আনহাতে বিজেপিৰ পৰা মনজিৎ সিং মান্নাই প্ৰতিদ্বন্দ্বিতা আগবঢ়াইছে । ললজিৎ সিং ভুল্লাৰে আপক প্ৰতিনিধিত্ব কৰিছে আৰু অকালি দলক বীৰচা সিং ভালতোহাই প্ৰতিনিধিত্ব কৰিছে । পাঞ্জাবৰ ১৩ খন লোকসভা আসনৰ বাবে ভোটদান ১ জুনত লোকসভা নিৰ্বাচনৰ সপ্তম পৰ্যায়ত অনুষ্ঠিত হৈছিল । ইফালে, প্ৰাৰম্ভিক প্ৰৱণতা অনুসৰি কেৰালাৰ ৱায়ানাড় আৰু উত্তৰ প্ৰদেশৰ ৰায়বৰেলীৰ দুয়োখন লোকসভা আসনত কংগ্ৰেছ নেতা ৰাহুল গান্ধী আগবাঢ়ি আছে ।
ইফালে অন্ধ্ৰ প্ৰদেশৰ ১৭৫ টা বিধানসভা সমষ্টি আৰু ওড়িশাৰ ১৪৭ টা বিধানসভা সমষ্টিত অনুষ্ঠিত হোৱা ৰাজ্যিক বিধানসভা নিৰ্বাচনৰ ভোটগণনাও অব্যাহত আছে ।
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024
