গুৱাহাটী, 4 আগষ্ট : কংগ্ৰেছ দলত এতিয়া বিভিন্ন ৰাজনৈতিক দলৰ নেতা-কৰ্মীৰ উপৰিও বিভিন্ন সংগঠনৰ নেতা তথা ব্যক্তি বিশেষৰ আগমন অব্যাহত আছে ৷ 9 আগষ্টত কংগ্ৰেছৰ এক বিশাল যোগদান কাৰ্যসূচী আছে, য'ত বিজেপি ত্যাগ কৰা জ্যেষ্ঠ নেতা অশোক শৰ্মা আৰু অৱসৰপ্ৰাপ্ত আই পি এছ বিষয়া ব্ৰজেনজিৎ সিনহাৰ উপৰিও ভালেসংখ্যক নেতাই কংগ্ৰেছ দলত যোগদান কৰিব ৷ যোগদানৰ প্ৰক্ৰিয়া অব্যাহত থকাৰ মাজতে দেওবাৰে কংগ্ৰেছ দলত আম আদমি পাৰ্টীৰ শতাধিক যুৱ নেতা-কৰ্মীয়ে আনুষ্ঠানিকভাৱে যোগদান কৰে ৷ গুৱাহাটীৰ ৰাজীৱ ভৱনত আয়োজন কৰা যোগদান কাৰ্যসূচীত উপস্থিত থাকি প্ৰদেশ কংগ্ৰেছৰ সভাপতি ভূপেন বৰাই সকলোকে দললৈ আদৰণি জনায় ৷
ভাষণ প্ৰসংগত ভূপেন বৰাই কয় - 'অসম চৰকাৰে গ্ৰহণ কৰা অৰ্থনৈতিক নীতি অসমীয়া জাতিটোৰ বাবে অতিকৈ ভয়ংকৰ আৰু চিন্তনীয় ৷ চৰকাৰখনে সম্পদ লীজত দিছে ৷ বিদ্যুতৰ বিল বাৰে বাৰে বৃদ্ধি কৰিবলগীয়া হৈছে ৷ ইফালে চৰকাৰখনে ঋণৰ ওপৰত ঋণ লৈ লৈ এক লাখ কোটিৰ ঘৰ অতিক্ৰম কৰিলে ৷ ৰাজ্যখন ধাৰত পোত গৈ থকাৰ পাচতো চৰকাৰখনে ধাৰ লোৱাৰ চিন্তা কৰি আছে ৷ আনহাতে খৰচ কমাবলৈ নিৰামিষ খাম বুলি কৈ মুখ্যমন্ত্ৰীয়ে ভূমি পূজন লাইভ কৰাৰ কাৰ্যসূচী গ্ৰহণ কৰিছে ৷ এফালে চৰকাৰ চলিব নোৱাৰি ধাৰ লোৱা চৰকাৰখনে সম্পত্তি লীজত দিছে আৰু আনফালে মুখ্যমন্ত্ৰীৰ ভূমি পূজন লাইভ কৰিবৰ বাবে জনসংযোগ বিভাগে সংবাদ মাধ্যমক নিৰ্দেশ দিয়ে ৷ পৰিস্থিতি যিয়েই নহওক কিয় মুখ্যমন্ত্ৰীৰ অনুষ্ঠান লাইভ হ'ব লাগিব ৷ লাগিলে ঔষধৰ দাম বৃদ্ধি কৰিব, বিদ্যুতৰ বিল বৃদ্ধি কৰিব আৰু লাগিলে বাগান বিক্ৰী কৰিব ৷ কিন্তু মুখ্যমন্ত্ৰী য'ত থাকিব সেয়া লাইভ হ'ব লাগিব ৷'
লগতে পঢ়ক : বিজেপিৰ বৰ্ধিত কাৰ্যনিৰ্বাহক সভালৈ নাহিল সৰ্বানন্দ সোণোৱাল - STATE BJPS EXTENDED EXECUTIVE
কংগ্ৰেছ দলত যোগদান কৰা যুৱ নেতা-কৰ্মীসকলক উদ্দেশ্যি ভূপেন বৰাই কয় - 'এটা দল শক্তিশালী তেতিয়া হয় যেতিয়া দলত যুৱ প্ৰজন্মই যোগদান কৰে ৷ আজি সেয়া হৈছে আমাৰ দলত ৷ আজি 100 জন যুৱক-যুৱতীয়ে আমাৰ দলত যোগদান কৰিছে ৷ মৰম দিলে মৰম পায়, গতিকে আমিও নতুনক আদৰি লৈ মৰম দিব লাগিব, তেতিয়া আমি মৰম পাম ৷ যদি কিবা কথা থাকে তেন্তে মোক জনাব ৷' অনুষ্ঠানত প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰৰ লগতে ভালেসংখ্যক নেতা উপস্থিত থাকে ৷ উল্লেখ্য যে আজি বিয়লি বিৰোধী ঐক্য মঞ্চৰ এখন গুৰুত্বপূৰ্ণ বৈঠক অনুষ্ঠিত হ'ব ৷ বৈঠকত 18 টা দলৰ প্ৰতিনিধিয়ে অংশগ্ৰহণ কৰিব ৷
লগতে পঢ়ক : অসম আঞ্চলিক মৰ্চা : গঠন হ'ল চাৰি আঞ্চলিক দলৰ উমৈহতীয়া মঞ্চ - Assam Regional Front
