নেশ্যনেল ডেস্ক, 14 মে’: দেশত অব্যাহত আছে লোকসভা নিৰ্বাচনৰ ভোটগ্ৰহণ প্ৰক্ৰিয়া ৷ বৰ্তমানলৈকে চাৰিটাকৈ পৰ্যায়ত নিৰ্বাচন অনুষ্ঠিত হোৱাৰ বিপৰীতে এতিয়াও নিৰ্বাচন অনুষ্ঠিত হ’বলগীয়া আছে তিনিটা পৰ্যায়ত ৷
এই নিৰ্বাচনৰ পৰিপ্ৰেক্ষিতত প্ৰচাৰ কাৰ্যৰ বাবে ব্যাপক ৰূপত ব্যৱহাৰ হৈছে সামাজিক মাধ্যম ৷ প্ৰতিটো ৰাজনৈতিক দলে নিজ দলৰ প্ৰচাৰ কাৰ্য সামাজিক মাধ্যমতো ব্যাপক ৰূপত কৰা দেখা গৈছে ৷
পিছে কিছু আপত্তিজনক পোষ্টেৰে সামাজিক মাধ্যম ভৰি পৰাও দেখা গৈছে ৷ যিয়ে নিৰ্বাচনৰ পূৰ্বে হিংসাত্মক কাৰ্যকলাপ বৃদ্ধিত অৰিহণা যোগোৱাৰ সন্দেহ প্ৰকাশ কৰা হৈছে ৷ যাক লৈ অধিক সজাগ হৈ পৰিছে নিৰ্বাচনী আয়োগ ৷
আয়োগে শেহতীয়াকৈ জাৰি কৰা এক নিৰ্দেশনা অনুসৰি, প্ৰতিগৰাকী ৰাজনৈতিক নেতা বা দলে আয়োগৰ পৰা লাভ কৰা জাননীৰ তিনিঘণ্টাৰ ভিতৰত সামাজিক মাধ্যমৰ পৰা আঁতৰাব লাগিব তেনে কোনো ভুৱা আৰু আপত্তিজনক পোষ্ট ৷
দেশৰ ৰাজধানী চহৰ নতুন দিল্লীস্থিত নিৰ্বাচনী আয়োগৰ মুখ্য কাৰ্যালয়ে জাৰি কৰিছে এই নিৰ্দেশনা ৷ এই নিৰ্দেশ অমান্য কৰাজনৰ বিৰুদ্ধে গ্ৰহণ কৰা হ’ব আইনী ব্যৱস্থা ৷ যিসকলে ইতিমধ্যে এনে ভুৱা আৰু আপত্তিজনক পোষ্ট সামাজিক মাধ্যমত আপলোড কৰিছিল, তেওঁলোকক ততালিকে পোষ্টসমূহ আঁতৰাবলৈ নিৰ্দেশ দিছে নিৰ্বাচনী আয়োগে ৷
নিৰ্বাচনী আয়োগে সদৰী কৰা অনুসৰি, পঞ্চম পৰ্যায়ৰ নিৰ্বাচনলৈ মাজত আছে মাথো কেইটামান দিন ৷ ৰাজনৈতিক দল বা প্ৰাৰ্থীসকলে প্ৰচাৰ কাৰ্যৰ বাবে প্ৰতিটো মাধ্যমকে ব্যৱহাৰ কৰি আছে ৷ এনেক্ষেত্ৰত তেওঁলোকে ভুৱা আৰু আপত্তিজনক পোষ্টসমূহো সামাজিক মাধ্যমত আপলোড কৰিব কুণ্ঠাবোধ কৰা নাই ৷ আয়োগে AI ৰ সহায়ত এই ভুৱা পোষ্ট অথবা ফটোসমূহ প্ৰস্তুত কৰাৰ ক্ষেত্ৰত জাৰি কৰিছে নিষেধাজ্ঞা ৷
আজিকালি ৰাজনৈতিক দলসমূহে প্ৰচাৰ কাৰ্যৰ বাবে ব্যাপক ৰূপত সামাজিক মাধ্যমৰ ব্যৱহাৰ কৰি আহিছে ৷ সামাজিক মাধ্যমৰ প্ৰতিখন মঞ্চতে দৈনিক প্ৰায় শতাধিক নিৰ্বাচন সংক্ৰান্তীয় পোষ্ট আপলোড হৈ আছে ৷ পূৰ্বতেও AI ব্যৱহাৰ কৰি এনে ভুৱা পোষ্ট অথবা ফটোসমূহ প্ৰস্তুত কৰাৰ ঘটনা পোহৰলৈ আহিছে ৷
AI ৰ জৰিয়তে এনে কণ্টেট মুহূৰ্ততে প্ৰস্তুত কৰিব পৰা যায়, যিয়ে অতি কম সময়ৰ ভিতৰতে ভিউৱাৰ্ছৰ সংখ্যা অধিক কৰি তুলিব পাৰে ৷ এই পোষ্টসমূহে নিৰ্বাচনত মাত্ৰাধিক প্ৰভাৱ পেলোৱাও দেখা যায় ৷ সেয়ে নিৰ্বাচনী আয়োগে এইক্ষেত্ৰত কঠোৰ সিদ্ধান্ত গ্ৰহণ কৰি জাৰি কৰিছে এই নিৰ্দেশনা ৷
লগতে পঢ়ক: আজি প্ৰধানমন্ত্ৰী নৰেন্দ্ৰ মোদীয়ে দাখিল কৰিব মনোনয়ন - PM Modi Nomination
