গুৱাহাটী, ৩ মাৰ্চ: বিজেপিয়ে শনিবাৰে প্ৰকাশ কৰে লোকসভা নিৰ্বাচনৰ ১৯৫টা সমষ্টিৰ প্ৰথমখন প্ৰাৰ্থী তালিকা । উক্ত তালিকাত স্থান পায় অসমত বিজেপিয়ে প্ৰতিদ্বন্দ্বিতা কৰিবলগীয়া ১১টা সমষ্টিৰ প্ৰাৰ্থীৰ নাম ।
উল্লেখ্য যে অসমত বিজেপিয়ে ১১টা সমষ্টিত নিজৰ প্ৰাৰ্থী দিয়াৰ বিপৰীতে মিত্ৰদল অগপক দুটা আৰু ইউ পি পি এলক এটা সমষ্টি এৰি দিছে । শনিবাৰে দিল্লীত বিজেপিৰ কেন্দ্ৰীয় নেতৃত্বই দেশৰ বিভিন্ন ৰাজ্যৰ লগতে অসমৰ ১১টা সমষ্টিৰ বাবে প্ৰাৰ্থী তালিকা প্ৰকাশ কৰে । কিন্তু উক্ত তালিকা প্ৰকাশৰ পিচতে বিৰোধীয়ে উভতি ধৰে বিজেপি দলক ।
বিশেষকৈ সমষ্টি পুনৰ নিৰ্ধাৰণৰ পিচত লোকসভা সমষ্টিৰ নাম সলনি হোৱা স্বত্বেও বিজেপিয়ে পূৰ্বৰ সমষ্টিৰ নামেৰে প্ৰাৰ্থী তালিকা ঘোষণা কৰে । যাক লৈ বিজেপি দলক কঠোৰ ভাষাৰে সমালোচনা কৰে বিৰোধীয়ে ।
অসমৰ ৰাইজৰ আৰু বিভিন্ন দল-সংগঠনৰ বিৰোধিতাৰ পিচতো বিজেপি চৰকাৰে অসমত সমষ্টি পুনৰ নিৰ্ধাৰণ কৰিলে । কিন্তু বিজেপিৰ প্ৰাৰ্থী তালিকাত সেয়া প্ৰতিফলিত নহ'ল । যাৰ বাবে বিৰোধীয়ে বিজেপিক সমষ্টি পুনৰ নিৰ্ধাৰণৰ কথা পাহৰি যোৱা বুলি সমালোচনা কৰিছে । বিৰোধীৰ সমালোচনাৰ পিচতে বিজেপিৰ নেতৃত্বই আজি প্ৰাৰ্থী তালিকাখন শুধৰণি কৰি প্ৰকাশ কৰে ।
সমষ্টি পুনৰ নিৰ্ধাৰণৰ পিচত হোৱা সমষ্টিৰ নম্বৰ আৰু নামৰ লগতে সংৰক্ষণৰ সাল-সলনি মতে আজিৰ তালিকাখন প্ৰকাশ কৰা হয় । শুধৰণি কৰা অসমৰ প্ৰাৰ্থী তালিকাখন আজি বিজেপি দলে সামাজিক মাধ্যমত আপলোড কৰে । শনিবাৰে প্ৰকাশ কৰা তালিকাখন চালে অনুমান হয় যে বিজেপিয়ে নাজানে অসমৰ কোনটো সমষ্টি কাৰ বাবে সংৰক্ষিত । একেদৰে নাজানে সমষ্টি পুনৰ নিৰ্ধাৰণৰ পিচত সলনি হোৱা সমষ্টিসমূহৰ গাঁথনি, সংৰক্ষণ, নতুন নাম ।
নাজানে কোন সমষ্টি বিলুপ্তি হ'ল আৰু নতুন সমষ্টি গঠন হ'ল । প্ৰাৰ্থী তালিকাত বিজেপিয়ে কৰিমগঞ্জ লোকসভা সমষ্টিত অনুসূচিত জাতিৰ বাবে সংৰক্ষিত বুলি উল্লেখ কৰিছে । আনহাতে শিলচৰ সমষ্টিক সংৰক্ষণমুক্ত হিচাপে দেখুওৱা হৈছে । দৰাচলতে শিলচৰ সমষ্টিহে অনুসূচিত জাতিৰ বাবে সংৰক্ষিত । কৰিমগঞ্জ সমষ্টি মুক্ত । সমষ্টি পুনৰ নিৰ্ধাৰণৰ পিচত হৈছে এই পৰিৱৰ্তন ।
একেদৰে মঙলদৈ লোকসভা সমষ্টি বুলি এতিয়া অসমত কোনো সমষ্টি নাই । সমষ্টি পুনৰ নিৰ্ধাৰণৰ পিচত মঙলদৈ লোকসভা সমষ্টিৰ নাম হ'ল দৰং-ওদালগুৰি সমষ্টি । সেইদৰে তেজপুৰ লোকসভা সমষ্টিৰ নাম সলনি কৰি কৰা হ'ল শোণিতপুৰ লোকসভা সমষ্টি । কিন্তু বিজেপিয়ে ঘোষণা কৰা প্ৰাৰ্থী তালিকাত মঙলদৈ লোকসভা সমষ্টিত দিলীপ শইকীয়া আৰু তেজপুৰ লোকসভা সমষ্টিত ৰঞ্জিৎ দত্তৰ নাম ঘোষণা কৰিছিল ।
সেইদৰে সম্পূৰ্ণৰূপে বিলুপ্ত হৈছে কলিয়াবৰ লোকসভা সমষ্টি । নতুনকৈ গঠন কৰা হৈছে কাজিৰঙা লোকসভা সমষ্টি । বিজেপিৰ প্ৰাৰ্থী তালিকাত নাই কাজিৰঙা লোকসভা সমষ্টিৰ প্ৰাৰ্থীৰ নাম । আছে কলিয়াবৰ লোকসভা সমষ্টিৰ প্ৰাৰ্থী হিচাপে কামাখ্যা প্ৰসাদ তাছাৰ নাম । সমষ্টি পুনৰ নিৰ্ধাৰণে সলনি কৰা অসমৰ সমষ্টিৰ সন্দৰ্ভত বিজেপিয়ে শনিবাৰে প্ৰাৰ্থী তালিকা ঘোষণা কৰাৰ সময়ত দিলে অজ্ঞতাৰ পৰিচয় ।
কিন্তু দৃষ্টিকটুভাৱে বিষয়টো ধৰা পৰাত আৰু বিৰোধীয়ে সমালোচনা কৰাত বিজেপিয়ে আজি নিজৰ ভুলৰ সংশোধন ঘটায় । শুদ্ধকৈ আজি পুনৰ তালিকাখন সামাজিক মাধ্যমত আপলোড কৰে বিজেপিয়ে ।
উল্লেখ্য যে বিজেপিয়ে ঘোষণা কৰা প্ৰাৰ্থী তালিকা অনুসৰি ডিব্ৰুগড় সমষ্টিত বৰ্তমানৰ সাংসদ ৰামেশ্বৰ তেলীৰ বিপৰীতে কেন্দ্ৰীয় মন্ত্ৰী সৰ্বানন্দ সোণোৱালক প্ৰাৰ্থিত্ব প্ৰদান কৰা হয় । আনহাতে সাংসদ প্ৰদান বৰুৱা আৰু তপন গগৈক তেওঁলোকৰ বৰ্তমানৰ সমষ্টি লখিমপুৰ আৰু যোৰহাট সমষ্টিতে প্ৰাৰ্থিত্ব প্ৰদান কৰা হয় ।
ইফালে ডিফু সমষ্টিত বৰ্তমানৰ সাংসদ হৰেনছিং বে'ৰ স্থানত অমৰ সিং টিচ'ক প্ৰাৰ্থিত্ব প্ৰদান কৰা হয় । সেইদৰে পূৰ্বৰ মঙলদৈ আৰু এতিয়াৰ দৰং-ওদালগুৰি সমষ্টিত প্ৰাৰ্থিত্ব প্ৰদান কৰা হয় সাংসদ দিলীপ শইকীয়াক ।
আনহাতে গুৱাহাটী লোকসভা সমষ্টিত বিজেপিয়ে কুইন ওজাৰ স্থানত প্ৰাৰ্থিত্ব প্ৰদান কৰে বিজুলী কলিতা মেধিক । শিলচৰ লোকসভা সমষ্টিত পৰিবহণ মন্ত্ৰী পৰিমল শুক্লবৈদ্যক প্ৰাৰ্থিত্ব প্ৰদান কৰাৰ বিপৰীতে কৰিমগঞ্জ লোকসভা সমষ্টিত কৃপানাথ মাল্লাকে প্ৰাৰ্থিত্ব দিয়া হৈছে । নগাওঁ লোকসভা সমষ্টিত কংগ্ৰেছ ত্যাগ কৰি বিজেপিত যোগদান কৰা সুৰেশ বৰাক প্ৰাৰ্থিত্ব প্ৰদান কৰাৰ বিপৰীতে তেজপুৰ লোকসভা সমষ্টিত বিহালীৰ বিধায়ক, বিজেপিৰ জ্যেষ্ঠ নেতা ৰঞ্জিৎ দত্তক প্ৰাৰ্থিত্ব প্ৰদান কৰা হৈছে ।
সেইদৰে নৱ গঠিত কাজিৰঙা সমষ্টিত প্ৰাৰ্থিত্ব প্ৰদান কৰা হয় সাংসদ কামাখ্যা প্ৰসাদ তাছাক ।
লগতে পঢ়ক: কংগ্ৰেছৰ প্ৰাৰ্থী তালিকা ঘোষণাত পলম হোৱাৰ কথা স্বীকাৰ দেৱব্ৰত শইকীয়াৰ
