নিউজ ডেস্ক, ২ আগষ্ট : ঝাৰখণ্ড বিধানসভা নিৰ্বাচনৰ বিজেপিৰ সহ-প্ৰভাৰী ড৹ হিমন্ত বিশ্ব শৰ্মাই শুকুৰবাৰে জাতি-ভিত্তিক লোকপিয়লৰ সন্দৰ্ভত জামছেদপুৰত এক ডাঙৰ মন্তব্য কৰে ৷ তেওঁ কয় যে জাতিগত লোকপিয়ল বিহাৰত অনুষ্ঠিত কৰা হৈছে আৰু সমগ্ৰ দেশতে অনুষ্ঠিত কৰা হ’ব ।
ড৹ শৰ্মাই কংগ্ৰেছক কটাক্ষ কৰি কয় ৰাহুল গান্ধীয়ে তেওঁৰ জাতিৰ নাম দিব নোৱৰাটো বেলেগ বিষয় ৷ তেওঁ কয় যে যদি ৰাহুলে নিজেই তেওঁৰ জাতিৰ নাম ক’ব নোৱাৰে, তেন্তে জাতিভিত্তিক লোকপিয়ল কেনেদৰে কৰা হ’ব !
জাতি নজনাকৈ জাতি-আধাৰিত লোকপিয়ল কেনেকৈ হ’ব ?
ড৹ শৰ্মাই কয়, ‘‘ তেওঁ কয় যে মোৰ জাতি নুসুধিব, তেন্তে আমি ৰাহুল গান্ধীক সুধিব লাগিব যে জাতিৰ নাম নোকোৱাকৈ, জাতিভিত্তিক লোকপিয়ল কেনেদৰে কৰা হ’ব ? সদনত ৰাহুল গান্ধীয়ে কৈছিল মোৰ জাতি কি কিয় সোধে ? ইয়াৰ অৰ্থ এইটো যে ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদী, অমিত শ্বাহৰ জাতি কি সুধিব পাৰে, কিন্তু কোনেও তেওঁৰ জাতি কি সুধিব নালাগে ৷’’ জাতিৰ কথা নোকোৱাকৈ জাতিভিত্তিক লোকপিয়ল কেনেকৈ হ’ব, সেইটো ফৰ্মূলা ৰাহুল গান্ধীৰ পৰা শিকিব লাগিব বুলি কয় মুখ্যমন্ত্ৰীগৰাকীয়ে ৷
বাংলাদেশী অনুপ্ৰৱেশৰ বাবে হেমন্ত ছোৰেনৰ চৰকাৰক সমালোচনা :
সাংগঠনিক সভাত অংশ ল’বলৈ জামছেদপুৰত উপস্থিত হোৱা অসমৰ মুখ্যমন্ত্ৰীগৰাকীয়ে বাংলাদেশী অনুপ্ৰৱেশ আৰু জনগাঁথনিগত পৰিৱৰ্তন সন্দৰ্ভত হেমন্ত ছোৰেনৰ চৰকাৰক সমালোচনা কৰে ৷ তেওঁ কয়, ‘‘ বাংলাদেশী অনুপ্ৰৱেশকাৰীক উলিয়াই পঠিওৱাৰ দায়িত্ব যদি কেন্দ্ৰক দিয়ে আৰু তেওঁ সহযোগ কৰে তেন্তে আমি সুখী হ’ম ৷ তেনেকুৱা হ’লে মই হেমন্ত ছোৰেনক হিৰ’ বুলি কৈ থৈ যাম ৷ এখন পত্ৰ লিখি আমাক দিয়ক যে ঝাৰখণ্ডৰ পৰা অনুপ্ৰৱেশকাৰীক উলিয়াই পঠিওৱাৰ দায়িত্ব কেন্দ্ৰৰ বুলি ৷ বাকী কি কৰিব লাগে আমি কৰিম ৷’’
সন্তল পৰগণা জিলাত অভূতপূৰ্ব জনসংখ্যা বৃদ্ধি :
অসমৰ মুখ্যমন্ত্ৰীগৰাকীয়ে কয়, ‘‘ বাংলাদেশ ভাৰতৰ অসম আৰু পশ্চিম বংগৰ সীমাত আছে ৷ পশ্চিম বংগৰ মুৰ্শিদাবাদ জিলা ঝাৰখণ্ডৰ পাকুৰ জিলাৰ সীমান্তত আছে ৷ যদি আপোনালোকে বিগত 20 বছৰৰ ভোটাৰ তালিকালৈ লক্ষ্য কৰে, তেন্তে দেখিব যে সন্তল পৰগণা আৰু ইয়াৰ কাষৰীয়া জিলাৰ জনসংখ্যা 20 শতাংশৰ পৰা 50-60 শতাংশলৈ বৃদ্ধি হৈছে ।’’
যদি অনুপ্ৰৱেশ বন্ধ কৰা নহয়, পৰিস্থিতি অসমৰ দৰে হ’ব :
ড৹ হিমন্ত বিশ্ব শৰ্মাই কয়, ‘‘ যদি বাংলাদেশী অনুপ্ৰৱেশকাৰীসকলক এতিয়া বাধা দিয়া নহয়, তেন্তে ঝাৰখণ্ডৰ পৰিস্থিতিও অসমৰ দৰে হৈ পৰিব । অসমত ৪০-৪২ শতাংশ হিন্দু আৰু মুছলমানৰ জনসংখ্যাগত পৰিৱৰ্তন হৈছে ৷ ১৯৫১ চনত ১২-১৪ শতাংশ জনগাঁথনিগত পৰিৱৰ্তন হৈছিল । পশ্চিম বংগতো ৩০ শতাংশ জনগাঁথনিগত পৰিৱৰ্তন হৈছে । অসম এক নম্বৰ, পশ্চিম বংগ দ্বিতীয় আৰু ঝাৰখণ্ড অনুপ্ৰৱেশৰ ক্ষেত্ৰত তিনি নম্বৰ ৷ যদি এতিয়া অনুপ্ৰৱেশকাৰীক বাধা দিয়া নহয়, তেন্তে ইয়াতো পৰিস্থিতি অসমৰ দৰে হ’ব ৷’’
অনুপ্ৰৱেশক উপেক্ষা নকৰিবলৈ আহ্বান :
তেওঁ কয়, ‘‘ চৰকাৰ আহিব আৰু যাব, কিন্তু ৰাজ্যখন বচোৱাটো সকলো পক্ষৰ দায়িত্ব ৷’’ ঝাৰখণ্ডৰ মুখ্যমন্ত্ৰী হেমন্ত ছোৰেনক অনুপ্ৰৱেশৰ বিষয়টো উপেক্ষা নকৰিবলৈ আহ্বান জনাই কয়, ‘‘ যদি আপুনি ইয়াক উপেক্ষা কৰে, তেন্তে 30 বছৰৰ পিচত এই লোকসকল ক্ষমতালৈ আহিব আৰু আপুনি বাহিৰত থাকিব লাগিব ৷’’
ড৹ শৰ্মাই কয়, ‘‘ ইয়াত বিজেপিৰ চৰকাৰ হ’লে এই সমস্যা সমাধান কৰিম ৷ আমি অসমৰ বহুতো মাদ্ৰাছা বন্ধ কৰিছো আৰু চণ্ডীগড়ৰ বহু একৰ ভূমি মুক্ত কৰিছো ৷ ইয়াত (ঝাৰখণ্ড) যি ক্ষতি হ’বলগীয়া আছিল হৈ গ’ল, ভৱিষ্যতে যাতে আৰু নহয়, সেয়া সুনিশ্চিত কৰিব লাগে ৷’’
লগতে পঢ়ক : যিমান হিন্দু ৰাজনৈতিক দল হয় সিমানেই ভাল : মুখ্যমন্ত্রী
লগতে পঢ়ক : ঝাৰখণ্ডত আদিবাসী আৰু হিন্দুসকল সুৰক্ষিত নহয় : হিমন্ত বিশ্ব শৰ্মা
লগতে পঢ়ক : ভাৰতত ৰোহিংগীয়াৰ অনুপ্ৰৱেশ এক উদ্বেগৰ বিষয় : মুখ্যমন্ত্ৰী হিমন্ত বিশ্ব শৰ্মা
