শিলচৰ : উপ-নিৰ্বাচন হ’লেও ইয়াক যথেষ্ট গুৰুত্বসহকাৰে লৈছে বিজেপিয়ে ৷ পূৰ্বতে দখল কৰি থকা আসন কেইখন কোনো কাৰণতে হাতৰ পৰা যাবলৈ দিব খোজা নাই গেৰুৱা বাহিনীয়ে ৷ যাৰ বাবে মন্ত্ৰী-বিধায়ক সমন্বিতে সকলো নামি পৰিছে ভোটযুদ্ধত ৷
ৰাজ্যিক বিজেপিয়ে ভাগে ভাগে মন্ত্ৰী-বিধায়কক দায়িত্ব দিছে প্ৰচাৰৰ বাবে ৷ সেই দায়িত্ব লৈ বিগত দিনকেইটাত কাছাৰ জিলাৰ ধলাই সমষ্টিত ভোটাৰক বিজেপিৰ প্ৰতি আকৃষ্ট কৰাৰ আখৰাত ব্যস্ত হৈ আছে মন্ত্ৰী জয়ন্ত মল্লবৰুৱা ৷
পূৰ্বে বিজেপিৰ জ্যেষ্ঠ নেতা পৰিমল শুক্লবৈদ্যৰ দখলত থকা ধলাই সমষ্টিত এইবাৰ বিজেপিৰ প্ৰাৰ্থী হৈছে নিহাৰ ৰঞ্জন দাস ৷ কাছাৰ জিলাৰ বিজেপিৰ উপসভাপতি অমিয় কান্তি দাস সমষ্টিটোৰ পৰা প্ৰাৰ্থিত্বৰ দাবীদাৰ আছিল যদিও তেওঁক টিকট নিদিলে গেৰুৱা বাহিনীয়ে ৷ ফলত দল এৰি নিৰ্দলীয়ভাৱে নিৰ্বাচন খেলাৰ উদ্দেশ্যে মনোনয়ন দাখিল কৰিছিল অমিয় কান্তি দাসে ৷ কিন্তু মুখ্যমন্ত্ৰীৰ অনুৰোধত আৰু মন্ত্ৰী জয়ন্তৰ বুজনিত অৱশেষত মনোনয়ন প্ৰত্যহাৰ কৰে নেতাগৰাকীয়ে ৷
দলৰ প্ৰতি ক্ষোভিত হৈ অমিয় কান্তি দাসে অভিযোগ কৰিছিল যে বিজেপিয়ে এজন বাংলাদেশী মূলৰ লোকক প্ৰাৰ্থিত্ব প্ৰদান কৰিছে ৷ যিটো মন্তব্যৰ স্বাভাৱিকতেই ধলাইত চাঞ্চল্যৰ সৃষ্টি কৰিছিল ৷ এতিয়া তাৰেই পাৰ্শ্বক্ৰিয়া নোহোৱা কৰাৰ বাবে দিন-ৰাতি একাকাৰ কৰিব লগীয়া হৈছে মন্ত্ৰী জয়ন্তই ৷
উল্লেখ্য যে, ধলাই সমষ্টিত হিন্দু ভোটাৰৰ লগতে যথেষ্ট সংখ্যক সংখ্যালঘু মুছলমান ভোটাৰো আছে ৷ এইসকল ভোটাৰক আকৰ্ষণ কৰাটো জৰুৰী বুলিও বিবেচনা কৰিছে বিজেপিয়ে ৷ গতিকে ধলাইৰ সংখ্যালঘু অধ্যুষিত অঞ্চলত সভা পাতি মন্ত্ৰী জয়ন্তই ব্যাখ্যা কৰিছে কংগ্ৰেছে কি সংখ্যালঘুক কি দিয়া নাছিল আৰু বিজেপিয়ে কি দিছে ৷
- আঁচনি লয়, ভোট নিদিয়ে :
ধলাইৰ ভাগা বজাৰত নিহাৰ ৰঞ্জন দাসৰ হৈ নিৰ্বাচনী প্ৰচাৰ চলাই সংখ্যালঘূ মুছলমান ৰাইজক উদ্দেশ্যি কেবাটাও মন্তব্য কৰে জয়ন্ত মল্লবৰুৱাই ৷ তেওঁ কয় যে সংখ্যালঘু মানুহে চৰকাৰৰ পৰা আঁচনিসমূহ লয়, কিন্তু ভোট নিদিয়ে ৷ বাৰে বাৰে তেওঁলোকে এনেকুৱাই কৰি থাকে ৷
This evening, took part in the third public meeting in support of BJP candidate Nihar Ranjan Das from Dhalai LAC for the upcoming by-elections at Bhanga Bazar.
— Jayanta Mallabaruah (@jayanta_malla) November 7, 2024
The meeting was also attended by Hon'ble MP Parimal Shuklabaidya and various office bearers of Bharatiya Janata Party. pic.twitter.com/QE0w2X3xEQ
কাছাৰত যিসকল সংখ্যালঘু মুছলমানে ব্যৱসায়-বাণিজ্য কৰি আছে তেওঁলোকক বিজেপিয়ে কেতিয়াও অসুবিধা দিয়া নাই ৷ কিন্তু বাৰে বাৰে যদি ভোট নিদি কেৱল আঁচনিৰ সুবিধা লয়, তেন্তে বিজেপিৰো এদিন মন বেয়া লাগিব বা ব্যৱসায় বাণিজ্যত বাধা দিবলৈ মন যাব ৷
নিজকে কাছাৰৰ অভিভাৱক মন্ত্ৰী বুলি উল্লেখ কৰি মন্ত্ৰী জয়ন্তই পুনৰ কয় যে যদিহে তেওঁৰ মন বেয়া লাগে, তেন্তে সংখ্যালঘু লোকসকলৰ বেপাৰ-বাণিজ্য বন্ধ কৰি দিবলৈয়ো মন যাব পাৰে ৷ এই বাক্যশাৰীৰ দ্বাৰা বিজেপিৰ নেতাগৰাকীয়ে সংখ্যালঘু মুছলমানক বিজেপি প্ৰাৰ্থীক ভোট দিবলৈ আওপকীয়াকৈ ভাবুকি প্ৰদান কৰা বুলি চৰ্চা হৈছে ৷
- বিজেপিয়ে বহুত কৰিছে সংখ্যালঘু মুছলমানৰ বাবে:
মন্ত্ৰী জয়ন্ত মল্লবৰুৱাই নিজৰ ভাষণত বিজেপি চৰকাৰে সংখ্যালঘু মুছলমানৰ বাবে কৰা কামৰো খতিয়ান দাঙি ধৰে ৷ তেওঁ কয় যে কংগ্ৰেছে সংখ্যালঘু অধ্যুষিত এলেকাত এখনো মহাবিদ্যালয় স্থাপন কৰা নাছিল ৷ কিন্তু বিজেপি চৰকাৰে সমগ্ৰ অসমৰ সংখ্যালঘু অধ্যুষিত এলেকাত 9 খনকৈ মহাবিদ্যালয় স্থাপন কৰিছে ৷ বিজেপিয়ে বিচাৰে সংখ্যালঘু মুছলমান লোকৰ ল’ৰা-ছোৱালীয়েও পঢ়ি-শুনি আগুৱাই যাওক ৷
বৰ্তমান কেন্দ্ৰত চলি আছে নৰেন্দ্ৰ মোদীৰ নেতৃত্বত বিজেপি চৰকাৰ ৷ ৰাজ্যত হিমন্ত বিশ্ব শৰ্মাৰ নেতৃত্বটো বিজেপি চৰকাৰে শাসন চলাই আছে ৷ এইবাৰ শিলচৰ সমষ্টিৰ পৰা বিজেপিৰে সাংসদ হিচাবে পৰিমল শুক্লবৈদ্য নিৰ্বাচিত হৈছে ৷ গতিকে ত্ৰিপল ইঞ্জিন চালিত গতিৰে উন্নয়ন বিচাৰিলে বিজেপি প্ৰাৰ্থীৰ নিহাৰ ৰঞ্জন দাসক ভোট দিয়াৰ বাহিৰে বিকল্প নাই বুলি মন্ত্ৰী জয়ন্ত মল্লবৰুৱাই সংখ্যালঘু ৰাইজক কয় ৷
