গুৱাহাটী: অসমৰ ৫ টা বিধানসভা সমষ্টিত অহা ১৩ নৱেম্বৰত হ’বলগীয়া উপ-নিৰ্বাচনৰ বাবে সাজু হৈছে শাসকীয় আৰু বিৰোধী উভয় পক্ষ । কংগ্ৰেছ নেতৃত্বাধীন সন্মিলিত মৰ্চা অসমে পাঁচোটা সমষ্টিতে প্ৰাৰ্থী দিবলৈ সাজু হৈছে ।
চামগুৰি, ধলাই, বঙাইগাঁও এই চাৰিটা সমষ্টিত কংগ্ৰেছে প্ৰাৰ্থী দিব । কিন্তু বিহালী সমষ্টিৰ বিৰোধীৰ প্ৰাৰ্থীক লৈ নতুন মোৰ লৈছে । বিজেপিৰ নেতা শেষমুহূৰ্তত হ’বগৈ পাৰে কংগ্ৰেছৰ বিহালীৰ প্ৰাৰ্থী ৷ লগতে চৰ্চা চলিছে বিৰোধীৰ সন্মিলিত মঞ্চৰ পৰাও প্ৰাৰ্থিত্ব দিব পাৰে কংগ্ৰেছে ৷
৪৮ ঘণ্টাৰ ভিতৰত অসমৰ প্ৰাৰ্থী ঘোষণা কৰিব কংগ্ৰেছে
অসমৰ উপ-নিৰ্বাচনক লৈ শুকুৰবাৰে দুপৰীয়া ৰাজীৱ ভৱনত জ্যেষ্ঠ ৰাষ্ট্ৰীয় নেতা জিতেন্দ্ৰ সিঙৰ উপস্থিতিত অনুষ্ঠিত হয় কংগ্ৰেছৰ এক গুৰুত্বপূৰ্ণ বৈঠক । শুকুৰবাৰে বিয়লি বিৰোধীৰ মিত্ৰ দলসমূহৰ এখন গুৰুত্বপূৰ্ণ বৈঠক অনুষ্ঠিত হ’ব ৷ তাৰ পিছতেই হয়তো চূড়ান্ত হ'ব ৫ টা সমষ্টিৰ প্ৰাৰ্থী তালিকা ।
আনহাতে, গুৱাহাটীত উপস্থিত হোৱা এ আই চি চিৰ নেতা তথা অসম কংগ্ৰেছৰ তত্বাৱধায়ক জিতেন্দ্ৰ সিঙে কয়, "আমাৰ দলীয় নেতা-কৰ্মীৰ সৈতে আলোচনাত মিলিত হোৱাৰ উপৰি আজি আবেলি আমাৰ মিত্ৰ দলসমূহৰ সৈতে প্ৰাৰ্থিত্বক লৈ আলোচনাত মিলিত হ’ম ৷ সবিশেষ মই আমাৰ ৰাষ্ট্ৰীয় অধ্যক্ষ মল্লিকাৰ্জুন খাৰ্গেক জনাম ৷ অহা ৪৮ ঘণ্টাৰ ভিতৰত অসমৰ আটাইকেইখন আসনৰ চূড়ান্ত সিদ্ধান্ত গ্ৰহণ কৰা হ’ব ৷"
বিজেপিৰ জয়ন্ত বৰা হ’ব নেকি বিহালীৰ কংগ্ৰেছৰ প্ৰাৰ্থী ?
বিহালী বিধানসভা সমষ্টিক লৈ বিৰোধীৰ সমীকৰণ সলনি হৈছে ৷ কংগ্ৰেছৰ এটা শিবিৰে বিচাৰে কংগ্ৰেছেই প্ৰতিদ্বন্দ্বিতা কৰক বিহালীত । আন এটা শিবিৰে বিচাৰে বিৰোধীৰ মিত্ৰ দলৰ পৰা সদ্ভাৱনা হিচাবে বিহালীৰ প্ৰাৰ্থিত্ব দিয়া হওক । প্ৰদেশ কংগ্ৰেছৰ শীৰ্ষ সূত্ৰৰ তথ্য অনুসৰি, বিহালীত কংগ্ৰেছে নিজাকৈ প্ৰাৰ্থী দিলে ক্ষোভিত বিজেপি নেতাই প্ৰাৰ্থিত্ব পাব পাৰে । তেওঁৰ নাম জয়ন্ত বৰা ।
ইতিপূৰ্বে দুই নেতা প্ৰেমলাল গঞ্জু আৰু দিলীপ বৰুৱাৰ নাম চৰ্চা হৈছিল বিহালীৰ কংগ্ৰেছৰ প্ৰাৰ্থীৰূপে । জয়ন্ত বৰা আছিল বিজেপিৰ বিহালীৰ প্ৰাৰ্থিত্ব প্ৰত্যাশী । সমষ্টিটোৰ প্ৰাক্তন বিধায়ক তথা সাংসদ ৰঞ্জিত দত্তৰ তেওঁ একালত ঘনিষ্ঠ আছিল যদিও বিজেপিৰ প্ৰাৰ্থীৰূপে দিগন্ত ঘাটোৱাৰক প্ৰক্ষেপ কৰাটো প্ৰায় নিশ্চিত হৈ পৰাত ৰঞ্জিত দত্তৰ সৈতে সংঘাত আৰম্ভ হয় জয়ন্ত বৰাৰ ৷
বিগত বিধানসভা নিৰ্বাচনত নিৰ্দলীয়ৰূপে প্ৰতিদ্বন্দ্বিতা কৰি প্ৰায় ২৩,০০০ ভোট লাভ কৰিছিল জয়ন্ত বৰাই । বিধানসভা নিৰ্বাচনত পৰাজয়ৰ পিচত তেওঁ বিজেপিত যোগদান কৰিছিল ৷ এতিয়া এই জয়ন্ত বৰায়েই বিহালীত টিকট লাভ কৰিব পাৰে বুলি চৰ্চা হৈছে কংগ্ৰেছৰ ভিতৰচ’ৰাত ৷ অৱশ্যে এতিয়ালৈকে কংগ্ৰেছত যোগদান কৰা নাই জয়ন্ত বৰাই । প্ৰাৰ্থিত্ব নিশ্চিত হ’লেহে কংগ্ৰেছত যোগদান কৰিব জয়ন্ত বৰাই ।
আনহাতে, যদি বিৰোধীৰ মিত্ৰ দলৰ আহ্বান অনুসৰি বিহালীত মিত্ৰ দলৰ পৰা প্ৰাৰ্থী দিয়ে, তেন্তে আসনখনত চি পি আই এম এলৰ নেতা বিবেক দাসক প্ৰাৰ্থিত্ব দিবলৈ সাজু বিৰোধীৰ সন্মিলীত ঐক্য ৷ অন্তিমবাৰ বিধানসভা নিৰ্বাচনত কংগ্ৰেছ নেতৃত্বাধীন বিৰোধী ঐক্যমঞ্চৰ প্ৰাৰ্থীৰূপে বিবেক দাসে বিহালীত লাভ কৰিছিল প্ৰায় ১৭ হাজাৰ ভোট ।
বিহালীত কংগ্ৰেছে নিজে আসনখনত প্ৰতিদ্বন্দ্বিতা কৰে নে মিত্ৰ দলক আসনখন এৰি দিয়ে এতিয়া সেইটো লক্ষণীয় হ’ব ! যদি নিজে আসনখনত প্ৰতিদ্বন্দ্বিতা কৰে তেন্তে স্থানীয় বিজেপি নেতা জয়ন্ত বৰাক বিহালীত প্ৰাৰ্থিত্ব দিয়ে নে নিদিয়ে সেয়াও লক্ষণীয় হ'ব ।
