গুৱাহাটী, 14 এপ্ৰিল : এইবাৰৰ লোকসভা নিৰ্বাচনত কেইবাগৰাকী বিধায়ক অৱতীৰ্ণ হৈছে ৷ এই বিধায়ক সকল জয়ী হ'লে সেই বিধানসভা সমষ্টি সমূহত অনুষ্ঠিত হ'ব উপ-নিৰ্বাচন ৷ সেয়া গতানুগতিক কথা ৷ কিন্তু এইবাৰ পৰিস্থিতি পূৰ্বৰ দৰে নহয় ৷ উপ -নিৰ্বাচন অনুষ্ঠিত হ'লে যথেষ্ট জটিলতাৰ সৃষ্টি হ'ব ৷ আনকি বিধানসভাৰ উপ-নিৰ্বাচনক লৈ দোমোজাত আছে ৰাজ্যৰ নিৰ্বাচন বিভাগ ৷ বিধানসভাৰ আসন খালী হ'লে কিহৰ ভিত্তিত হ'ব উপ-নিৰ্বাচন ৷ ইয়াৰ কাৰণ হৈছে সমষ্টি পুনৰ নিৰ্ধাৰণ ৷
উপ-নিৰ্বাচন হ'ব লাগিলে নতুন সমষ্টিৰ ভিত্তিত হ'ব নে পুৰণি সমষ্টিৰ ভিত্তিত হ'ব সেই লৈ কোনো নিৰ্দেশনা নিৰ্বাচন আয়োগৰ পৰা ৰাজ্যৰ নিৰ্বাচন বিভাগে লাভ কৰা নাই বুলি জানিব পৰা গৈছে ৷ লোকসভাৰ নিৰ্বাচনত প্ৰতিদ্বন্দ্বিতা আগবঢ়োৱা বিধায়ক নিৰ্বাচিত হোৱাৰ পাছত উপ-নিৰ্বাচনক কেন্দ্ৰ কৰি যে এক বিতৰ্কৰ সূচনা হ'ব সেই কথা এক প্ৰকাৰ খাটাং হৈ পৰিছে ৷ বৰ্তমান সময়ত সকলো লোকসভা নিৰ্বাচনক লৈ ব্যস্ত হৈ থকাত বিষয়টো বেছিকৈ চৰ্চালৈ অহা নাই ৷ নিৰ্বাচনী ফলাফল ঘোষণাৰ পাচতে বিষয়টো নিশ্চিতভাৱে চৰ্চালৈ আহিব ৷
উল্লেখ যে বৰ্তমানৰ 8 গৰাকীকৈ বিধায়কে লোকসভাৰ নিৰ্বাচনত প্ৰতিদ্বন্দ্বিতা আগবঢ়াইছে ৷ পুৰণি ঢলাই সমষ্টিৰ বিধায়ক তথা মন্ত্ৰী পৰিমল শুক্লবৈদ্যই শিলচৰ লোকসভা সমষ্টিৰ পৰা প্ৰতিদ্বন্দ্বিতা আগবঢ়াইছে ৷ সেইদৰে বঙাইগাঁৱৰ অগপ বিধায়ক ফণীভূষণ চৌধুৰীয়ে বৰপেটা লোকসভা সমষ্টিৰ পৰা নিৰ্বাচনত অৱতীৰ্ণ হৈছে ৷ সৰভোগৰ চি পি আই এমৰ বিধায়ক মনোৰঞ্জন তালুকদাৰেও বৰপেটা সমষ্টিত প্ৰতিদ্বন্দ্বিতা আগবঢ়াইছে ৷ আনহাতে বিহালীৰ শাসকীয় দলৰ বিধায়ক ৰঞ্জিত দত্তই শোণিতপুৰৰ পৰা প্ৰতিদ্বন্দ্বিতাত নামিছে ৷ ধিঙৰ এ আই ইউ ডি এফৰ বিধায়ক আমিনুল ইছলামে নগাঁৱৰ পৰা অৱতীৰ্ণ হৈছে ৷ কলাইগাঁৱৰ বি পি এফৰ বিধায়ক দুর্গাদাস বড়োৱে দৰং-ওদালগুৰি সমষ্টিৰ পৰা প্ৰতিদ্বন্দ্বিতা আগবঢ়াইছে ৷ চিদলীৰ বিধায়ক জয়ন্ত বসুমতাৰীয়ে কোকৰাঝাৰৰ পৰা লোকসভা নিৰ্বাচনত অৱতীৰ্ণ হৈছে ৷ আনহাতে চামগুৰিৰ কংগ্ৰেছৰ বিধায়ক ৰকিবুল হুছেইনে ধুবুৰী সমষ্টিত প্ৰতিদ্বন্দ্বিতা কৰিছে ৷
- " class="align-text-top noRightClick twitterSection" data="">
লোকসভাৰ নিৰ্বাচনত প্ৰতিদ্বন্দ্বিতা আগবঢ়োৱা প্ৰাৰ্থী সকলৰ মাজৰ পৰা যিসকল নিৰ্বাচিত হ'ব, তেওঁলোকৰ বিধানসভা সমষ্টিত নিৰ্বাচন আয়োগে উপ-নিৰ্বাচন অনুষ্ঠিত কৰিব লাগিব ৷ কাৰণ বিধানসভাৰ কাৰ্যকাল অন্ত পৰিবলৈ এতিয়াও প্ৰায় আঢ়ৈটা বছৰ বাকী আছে ৷ তেনেস্থলত বিধানসভাৰ উপ-নিৰ্বাচন হ'লে পুৰণি সমষ্টি অনুসৰি হ'ব নে নতুন সমষ্টি অনুসৰি হ'ব, এয়া এক ডাঙৰ প্ৰশ্ন ৷ এই প্ৰশ্নৰ উত্তৰ এতিয়া ৰাজ্যিক নিৰ্বাচন বিভাগৰ ওচৰত নাই ৷ ৰাজ্যিক নিৰ্বাচন বিভাগৰ এক উচ্চস্তৰীয় সূত্ৰৰ পৰা জানিব পৰা মতে দেশৰ নিৰ্বাচন আয়োগৰ পৰা সম্ভাব্য উপ-নিৰ্বাচন সন্দৰ্ভত কোনো নিৰ্দেশনা লাভ কৰা নাই ৷
উল্লেখ্য যে বৰ্তমানৰ বিধায়ক সকলে পুৰণি সমষ্টিৰ পৰাহে প্ৰতিনিধিত্ব কৰিছে ৷ লোকসভাৰ নিৰ্বাচন অনুষ্ঠিত হ'ব নতুন বিধানসভাৰ সমষ্টিক লৈ গঠিত হোৱা লোকসভাৰ সমষ্টিৰ ভিত্তিত ৷ তেনেস্থলত সম্ভাব্য উপ-নিৰ্বাচনত বিধায়কজনে পুৰণি সমষ্টিক প্ৰতিনিধিত্ব কৰিব নে নতুনকৈ গঠন হোৱা সমষ্টিক প্ৰতিনিধিত্ব কৰিব, তাক লৈ প্ৰশ্নৰ অৱতাৰণা হৈছে ৷
সমষ্টি পুনৰ নিৰ্ধাৰণৰ পাচত পুৰণি সকলো সমষ্টিৰ সীমাসমূহৰ ব্যাপক সালসলনি হৈছে ৷ পুৰণি কোনো সমষ্টিত থকা বহু এলেকা পুনৰ গঠিত আন সমষ্টিত অন্তৰ্ভূক্ত হৈছে ৷ যাৰ ফলত নতুনকৈ গঠন কৰা বিধানসভা সমষ্টিৰ ভিত্তিত উপ-নিৰ্বাচন অনুষ্ঠিত হ'লে কোনো কোনো এলেকাত দুজনকৈ বিধায়কে প্ৰতিনিধিত্ব কৰিব লাগিব ৷ কাৰণ বৰ্তমান থকা বিধায়ক সকলে পুৰণি সমষ্টিক প্ৰতিনিধিত্ব কৰি আছে ৷ তদুপৰি নতুন সমষ্টিৰ ভিত্তিত বিধানসভাৰ খালী হ'বলগীয়া আসনৰ বাবে উপ-নিৰ্বাচন অনুষ্ঠিত কৰিবলগীয়া হ'লে সমষ্টি সমূহৰ নামো সলনি হ'ব ৷ অৱশ্যে পুৰণি সমষ্টিৰ ভিত্তিত হ'লে বিশেষ কোনো সমস্যাৰ সৃষ্টি নহয় ৷ উপ-নিৰ্বাচন হ'লে কিদৰে কৰা হ'ব সেয়া সময়তহে জানিব পৰা যাব ৷
লগতে পঢ়ক : কি আছে বিজেপিৰ নিৰ্বাচনী ইস্তাহাৰত ? - BJP Manifesto
