তিনিচুকীয়া, ২৯ ফেব্ৰুৱাৰী : সমাগত লোকসভা নিৰ্বাচন ৷ শাসক-বিৰোধী দলসমূহে আৰম্ভ কৰিছে নিৰ্বাচনী কুচকাৱাজ ৷ এই লোকসভা নিৰ্বাচনৰ প্ৰাকক্ষণতে বিজেপি চৰকাৰৰ বিৰুদ্ধে সৰৱ হৈ পৰিছে তিনিচুকীয়া আটছা জিলা সমিতি ৷ বৃহস্পতিবাৰে ৰাজ্য চৰকাৰৰ বিৰুদ্ধে এখনি সংবাদমেল সম্বোধন কৰি আটছাৰ নেতৃত্বই ক্ষোভ উজাৰে ৷
আগন্তুক লোকসভা নিৰ্বাচনৰ বাবে বিজেপি প্ৰাৰ্থী ঘোষণা কৰাৰ প্ৰাকক্ষণত তিনিচুকীয়াত আটছা জিলা সমিতিয়ে সংবাদমেলৰ জৰিয়তে শাসকীয় চৰকাৰলৈ হুংকাৰ প্ৰদান কৰে ৷ ডিব্ৰুগড় লোকসভা সমষ্টিৰ সাংসদ তথা কেন্দ্ৰীয় মন্ত্ৰী ৰামেশ্বৰ তেলীক চাহ বাগিচা অঞ্চলত বয়কট ঘোষণা কৰিছে আটছাই৷ ডিব্ৰুগড় লোকসভা সমষ্টিত ৰামেশ্বৰ তেলীক দলীয় টিকট প্ৰদান নকৰিবলৈ বিজেপি চৰকাৰক আহ্বান জনাইছে অসম চাহ জনজাতি ছাত্ৰ সন্থা তিনিচুকীয়া জিলা সমিতিয়ে ৷
ৰামেশ্বৰ তেলীক অকৰ্মন্য এলেহুৱা সাংসদ ঘোষণা কৰি ৰামেশ্বৰ তেলীক টিকট প্ৰদান কৰিলে আটছাৰ কঠোৰ প্ৰতিবাদৰ সন্মুখীন হ’ব বুলি বিজেপি চৰকাৰক হুংকাৰ প্ৰদান কৰে আটছাৰ নেতৃত্বই৷ আনহাতে, দুটাকৈ কাৰ্যকাল সংসদত থাকিও জনগোষ্ঠীটোৰ কাৰণে বিশেষ পদক্ষেপ গ্ৰহণ কৰিব পৰা নাই বুলি ৰামেশ্বৰ তেলীক সমালোচনা কৰে আটছাই ৷ তিনিচুকীয়া প্ৰেছ ক্লাৱত এক সংবাদমেল সম্বোধন কৰি এই মন্তব্য কৰে আটছা তিনিচুকীয়া জিলা সমিতিৰ সভাপতি জগত নায়কে৷ প্ৰাপ্ত খবৰ অনুসৰি আটছাৰ সকলো সভা সমিতিত এসময়ৰ আটছাৰ নেতা ৰামেশ্বৰ তেলীক নিষিদ্ধ কৰা হৈছে ৷
আজিৰ সংবাদমেলত আটছা তিনিচুকীয়া জিলা সমিতিৰ সভাপতি জগত নায়ক, সম্পাদক অনুজ তাঁতী, কেন্দ্ৰীয় নেতা যতীন বৰাইককে আদি কৰি কেইবাগৰাকীও নেতা উপস্থিত থাকে ৷
লগতে পঢ়ক : ৰামেশ্বৰ তেলীক টিকট দিলে বাগিচাত বিজেপিৰ প্ৰৱেশ নিষিদ্ধ কৰিব আছাই
