ইণ্টাৰনেশ্যনেল ডেস্ক, 14 জুন : কুৱেইটত সংঘটিত এক ভয়ংকৰ অগ্নিকাণ্ডত প্ৰাণ হেৰুওৱা 45 গৰাকী ভাৰতীয়ৰ নশ্বৰদেহ কঢ়িয়াই অনা ভাৰতীয় বায়ুসেনাৰ বিশেষ বিমানখন কিছু সময় পিছতে কোচিত উপস্থিত হোৱাৰ সম্ভাৱনা আছে ৷
শুকুৰবাৰে পুৱা ভাৰতীয় দূতাবাসৰ কাৰ্যালয়ে সামাজিক মাধ্যম এক্সৰ জৰিয়তে এই কথা প্ৰকাশ কৰিছে ৷ ভাৰতৰ বৈদেশিক পৰিক্ৰমা বিভাগৰ ৰাজ্যিক মন্ত্ৰী কীৰ্তিবৰ্ধন সিং উক্ত বিমানখনত থকা বুলি জানিব পৰা গৈছে ৷
লগতে পঢ়ক: অগ্নিকাণ্ডত কমেও ৪৯ জন লোকৰ মৃত্যু; প্ৰধানমন্ত্ৰী মোদীৰ শোক প্ৰকাশ - Fire Incident
বুধবাৰে সংঘটিত অগ্নিকাণ্ডটোত মৃত্যু হোৱা 45 জন ভাৰতীয়ৰ ভিতৰত 23 গৰাকীয়ে কেৰালাৰ বাসিন্দা আছিল । ইতিমধ্যে ভাৰত চৰকাৰে ইয়াৰ বাবে যাৱতীয় সকলো ব্যৱস্থা সম্পূৰ্ণ কৰি তুলিছে ৷ কোচি আন্তৰাষ্ট্ৰীয় বিমানবন্দৰত আৰক্ষী বাহিনী মজুত ৰখাৰ লগতে এম্বুলেন্সৰো ব্যৱস্থা কৰা হৈছে ৷
কেৰেলাৰ এৰ্নাকুলাম মণ্ডলৰ আৰক্ষীৰ উপ মহাপৰিদৰ্শক পুট্টা বিমালাদিত্যই এই সন্দৰ্ভত কয় যে, "আমি প্ৰয়োজনীয় সকলো ব্যৱস্থা কৰিছো ৷ লগতে মৃত লোকসকলৰ পৰিয়ালৰ সৈতে যোগাযোগ কৰিছো ৷ বিমানখন কোচিত উপস্থিত হোৱাৰ পিছতে মৃতদেহসমূহ নিজ নিজ ঘৰলৈ পঠিওৱাৰ ব্যৱস্থা কৰা হ’ব ৷ এই মৃতদেহসমূহৰ 23 টা কেৰালাৰ, 7 টা তামিলনাডুৰ আৰু এটা কৰ্ণাটকৰ ৷ প্ৰত্যেকটো মৃতদেহৰ বাবে সুকীয়া বাহনৰ ব্যৱস্থা কৰা হৈছে" ৷
