ইণ্টাৰনেশ্যনেল ডেস্ক, ২৪ মাৰ্চ : মানৱ সৰবৰাহকাৰীৰ কৱলত পাকিস্তানৰ নাগৰিক । ইৰাণৰ মাজেৰে ইউৰোপলৈ অনুপ্ৰৱেশৰ চেষ্টা কৰা পাকিস্তানৰ লোকসকলক মানৱ সৰবৰাহকাৰীয়ে লক্ষ্য কৰি লৈছে । সংবাদমাধ্যমৰ খবৰ অনুসৰি লোকসকলে মুক্তিৰ দাবী কৰাৰ সময়ত তেওঁলোকক লুণ্ঠন কৰাৰ লগতে লোকসকলক নিৰ্যাতন চলোৱা হয় ।
জানিব পৰা মতে, ইউৰোপ লৈ যাবলৈ ইচ্ছুক অনুপ্ৰৱেশকাৰীসকলক অপহৰণ কৰিবলৈ আন্তৰ্জাতিক মানৱ সৰবৰাহকাৰীসকলক একাংশ স্থানীয় অনুপ্ৰৱেশকাৰীয়ে সহায় কৰিছে । প্ৰতিবেদন অনুসৰি, ভুক্তভোগীসকলক বন্দী কৰি ৰখা হৈছিল আৰু তেওঁলোকৰ ওপৰত বিভিন্ন ধৰণৰ অত্যাচাৰ চলোৱা হৈছিল । তেওঁলোকৰ মুকলিৰ বাবে ধনৰ দাবীও কৰিছিল চক্ৰটোৱে ।
সংবাদ মাধ্যমৰ খবৰ অনুসৰি যোৱা মাহত এনেধৰণৰ তিনিটা ঘটনা সংঘটিত হৈছিল ৷ য'ত প্ৰায় ১০ জন যুৱকক এই চক্ৰটোৱে অপহৰণ কৰিছিল আৰু বন্দী কৰি ৰাখিছিল । তেওঁলোকৰ ওপৰত বিভিন্ন ধৰণৰ নিৰ্যাতনো চলোৱা হৈছিল । একাংশই ধনৰ বিনিময়ত মুকলি হৈ আহিছিল আৰু একাংশক তেহৰাণত পাকিস্তানী দূতাবাসৰ সহযোগত ইৰাণ আৰক্ষীয়ে মুকলি কৰি দিছিল ।
ফেডাৰেল ইনভেষ্টিগেচন এজেঞ্চিয়ে কোৱা মতে অনুপ্ৰৱেশকাৰীসকলক স্বদেশলৈ ঘূৰাই পঠিওৱাৰ ব্যৱস্থা কৰা হৈছে । যোৱা মাহত, হাফিজাবাদৰ বাসিন্দা মুহম্মদ হুচনাইন, তেওঁৰ সম্পৰ্কীয় ভাতৃ ফৈজল আৰু চুবুৰীয়া আনৱাৰৰ সৈতে ইউৰোপলৈ বুলি পথেৰে ইৰাণৰ মাজেৰে ৰাওনা হৈছিল ।
তেওঁলোকে বৈধ ভিছাত (ভ্ৰমণ) এজেণ্ট মুহম্মদ চাৰৱাৰৰ সৈতে ভ্ৰমণ কৰিছিল । যিয়ে তেওঁলোকক ইৰাণৰ পৰা তুৰস্ক হৈ গ্ৰীচলৈ লৈ যোৱাৰ প্ৰতিশ্ৰুতি দিছিল । তেহৰাণত উপস্থিত হোৱাৰ পিচত এজেণ্ট চাৰৱাৰে তিনিওজনৰ পৰা তেওঁলোকক ইউৰোপলৈ পঠিওৱাৰ বিনিময়ত ২,৫০০ আমেৰিকান ডলাৰ বিচাৰিছিল ।
তিনিওজনে ধনৰ বাবে পাকিস্তানত তেওঁলোকৰ পৰিয়ালৰ সৈতে যোগাযোগ কৰিছিল । কিন্তু পৰিয়ালকেইটাই ধন পৰিশোধ কৰাত ব্যৰ্থ হৈছিল । পিচত চাৰৱাৰে তেওঁলোকক তেহৰাণৰ এটা তিনিমহলীয়া অট্টালিকালৈ লৈ গৈছিল আৰু তাত বন্দী কৰি ৰাখিছিল ।
ভুক্তভোগী এজনে জনোৱা মতে তাত তেওঁলোকৰ ওপৰত শাৰীৰিক অত্যাচাৰ চলোৱা হৈছিল আৰু তাৰ দৃশ্যগ্ৰহণ কৰিছিল । ভিডিঅ'বোৰ পাকিস্তানত থকা তেওঁলোকৰ পৰিয়াললৈ প্ৰেৰণ কৰি চক্ৰটোৱে ধন দাবী কৰিছিল ।
লগতে পঢ়ক : মস্কোৰ সন্ত্ৰাসবাদী আক্ৰমণৰ আঁৰত ইউক্ৰেইন জড়িত থকাৰ দাবী পুটিনৰ: ১৪৩ জনৰ মৃত্যু - OPEN FIRE IN MOSCOW
