ইণ্টাৰনেশ্যনেল ডেস্ক, ১৩ আগষ্ট: আমেৰিকাৰ ক্ৰেডিট ৰেটিং সংস্থা ফিচ্চে সোমবাৰে ইজৰাইলৰ ৰেটিং স্তৰ হ্ৰাস কৰি সতৰ্ক কৰি দিয়ে যে, গাজাত হামাছৰ বিৰুদ্ধে চলি থকা সংঘৰ্ষ '২০২৫ চনলৈ' চলিব পাৰে । লগতে ই অৰ্থনৈতিক কাৰ্যকলাপৰ ওপৰত গুৰুত্বপূৰ্ণ প্ৰভাৱ পেলাব পাৰে ।
ফিচ্চে ইজৰাইলৰ ৰেটিং 'এ+'ৰ পৰা 'এ'লৈ হ্ৰাস কৰে । এক টোকাত ফিচ্চে কয়, "২০২৫ চনলৈকে গাজাত সংঘৰ্ষ ভালদৰে চলিব পাৰে আৰু ই আন দিশলৈ বিস্তৃত হোৱাৰ আশংকা আছে ।"
"মানৱীয় ক্ষতিৰ উপৰি ইয়াৰ ফলত অতিৰিক্ত সামৰিক ব্যয়, আন্তঃগাঁথনি ধ্বংস আৰু অৰ্থনৈতিক কাৰ্যকলাপ আৰু বিনিয়োগৰ গুৰুত্বপূৰ্ণ অধিক ক্ষতি হ'ব পাৰে, যাৰ ফলত ইজৰাইলৰ ক্ৰেডিট মেট্ৰিক্সৰ অধিক অৱনতি ঘটিব পাৰে ।" প্ৰতিবেদনত কোৱা হৈছে ।
ফিচ্চৰ মতে, যি ৰাজহুৱা বিত্তীয় ক্ষতি হৈছে তাৰ বাবে ইজৰাইলে এই বছৰ ঘাটি বাজেট চলাব বুলি অনুমান কৰা হৈছে । উল্লেখ্য যে আন্তৰ্জাতিক মধ্যস্থতাকাৰীসকলে ইজৰাইল আৰু হামাছক এই সপ্তাহত যুদ্ধবিৰতি আৰু পণবন্দী মুক্তি চুক্তিৰ ওপৰত আলোচনা পুনৰ আৰম্ভ কৰিবলৈ আমন্ত্ৰণ জনাইছে । অৱশ্যে এয়া ইজৰাইলে গ্ৰহণ কৰিছে । ইফালে হামাছে মধ্যস্থতাকাৰীসকলক অধিক আলোচনাৰ পৰিৱৰ্তে আমেৰিকাৰ ৰাষ্ট্ৰপতি জো বাইডেনে পূৰ্বতে উপস্থাপন কৰা যুদ্ধবিৰতি পৰিকল্পনা ৰূপায়ণ কৰিবলৈ আহ্বান জনাইছে ।
আনহাতে, ফিচ্চে কয় যে অহা বছৰলৈ অব্যাহত থাকিবলগা সংঘৰ্ষই ইজৰাইলক সামৰিক বাহিনীৰ ওপৰত অতি উচ্চ ব্যয় অব্যাহত ৰাখিবলৈ বাধ্য কৰিব । ফলত সীমান্ত অঞ্চলত পৰ্যটন, নিৰ্মাণ আৰু উৎপাদনত অধিক ব্যাঘাত ঘটিব । কিয়নো ইজৰাইলে লেবাননৰ হিজবুল্লাৰ সৈতে প্ৰায় দৈনিক সীমান্ত অঞ্চলত গুলীবৰ্ষণ কৰিছে । যাৰ ফলত ইজৰাইলীসকলক উত্তৰ সীমান্ত অঞ্চলৰ পৰা স্থানান্তৰিত কৰিবলৈ বাধ্য কৰোৱা হৈছে ।
