বিভিন্ন ৰোগৰ পৰা আৰোগ্য লাভৰ বাবে বিভিন্ন চিকিৎসা পদ্ধতি ব্যৱহাৰ কৰা হয় । তাহানিৰ পৰাই থেৰাপী চিকিৎসা প্ৰচলিত হৈ আহিছে । এই থেৰাপীবোৰৰ ভিতৰত অন্যতম হৈছে মিউজিক থেৰাপী । দেশৰ বিভিন্ন প্ৰান্তৰ লগতে ৰাজ্যত মিউজিক থেৰাপীয়ে লাহে লাহে জনপ্ৰিয়তা লাভ কৰিছে । এই মিউজিক থেৰাপী বা সংগীত চিকিৎসা নো কি তথা এই বিষয়ে সংগীত চিকিৎসক অনুভূতি কাকতি গোস্বামীয়ে ই টি ভি ভাৰতৰ আগত কি ক’লে সবিশেষ পঢ়ক-
মিউজিক থেৰাপী কি ?
মিউজিক থেৰাপী বা সংগীত চিকিৎসা মানে হ'ল সংগীতৰ জৰিয়তে এজন মানুহৰ শৰীৰক মানসিক, আৱেগিক বা জ্ঞান কেন্দ্ৰীক কিছু অসুস্থতা ,বিকাশৰ সমস্যা দূৰ কৰিবলৈ মিউজিক থেৰাপীৰ জৰিয়তে আৰোগ্য লাভ কৰাত সহায় । মিউজিক থেৰাপী বিভিন্ন ধৰণে ব্যৱহাৰ কৰা হয় । শ্ৰৱণৰ জৰিয়তেও মিউজিক থেৰাপী দিব পাৰে বা এজন লোকক গান গাই, গান লিখি , বাদ্য বজাই আদি ধৰণেও মিউজিক থেৰাপী দিয়া হয় ।
বিশেষকৈ ট্ৰেষ্ট,এনজাইটিত ভুগি থকা লোকক সংগীত চিকিৎসা বা থেৰাপী প্ৰদান কৰা হয় বুলিও অনুভূতি কাকতি গোস্বামীয়ে ইটিভি ভাৰতৰ আগত জানিবলৈ দিয়ে । শাৰীৰিক,মানসিক আৱেগিক লোকে মিউজিক থেৰাপীৰ জৰিয়তে উপকৃত হ'ব পাৰে । শাৰীৰিক অসুবিধা বিশেষকৈ নিউৰোলজী সমস্যা , ষ্ট্ৰ’ক, কমাত থকা ৰোগী, পেৰালাইচিচ, মূৰৰ বিষ আদি কৰি সৰু ৰোগৰ পৰা ডাঙৰ বেমাৰলৈকে মিউজিক থেৰাপীৰ জৰিয়তে সুফল লাভ কৰিব পাৰি । ঠিক একেদৰে মানসিক ৰোগৰ সৰুৰ পৰা ডাঙৰলৈ ষ্ট্ৰেচ এনজাইটি, ডিপ্ৰেচন, স্ক্ৰিজ্জ’ফেনিয়া আদিৰ চিকিৎসা কৰা হয় । শিশুকো মিউজিক থেৰাপী দিব পাৰি ।
মিউজিক থেৰাপী ল'বলৈ কোনো ৰোগী হ'ব লাগিব বুলি কথা নাই । শৰীৰত কোনো ৰোগ নাথাকিলেও এগৰাকী ব্যক্তিয়ে মিউজিক থেৰাপী ল’ব পাৰে । খালী মন কৰা উচিত যে যি সংগীত আমি যি সময়ত শুনো সেই সময়ৰ বাবে সঠিক হয় নে নাই ।
শেষত সংগীত চিকিৎসক অনুভূতি কাকতি গোস্বামীয়ে কয় যে তেওঁ ১০ বছৰ ধৰি মিউজিক থেৰাপীৰ লগত জড়িত হৈ আছে । ভাৰতবৰ্ষৰ বিভিন্ন স্থান যেনে অসম , দিল্লী, কলকাতা, ঋষিকেষ, গোকৰ্ণা, মুম্বাইত মিউজিক থেৰাপীৰ কৰ্মশালা কৰি তেওঁ বহুতকে উপকৃত কৰিছে ।
