আমাৰ শৰীৰৰ বাবে ওমেগা থ্ৰী ফেটি এচিড অন্যতম এক প্ৰয়োজনীয় পুষ্টিকৰ উপাদান, যিটো শৰীৰৰ সামগ্ৰিক স্বাস্থ্যৰ বাবে অতি উপকাৰী আৰু গুৰুত্বপূৰ্ণ ৷ মূলতঃ হৃদযন্ত্ৰৰ স্বাস্থ্যৰ বাবেও ই অতি উপকাৰী ৷ সেয়ে দৈনিক খাদ্য তালিকাত আমি ইয়াক অন্তৰ্ভুক্ত কৰাৰ চেষ্টা কৰিব লাগে, যাতে আপুনি ইয়াৰ বহুতো সুবিধা লাভ কৰিব পাৰে ৷ জানো আহক কিয় ওমেগা থ্ৰী ফেটি এচিড আমাৰ স্বাস্থ্যৰ বাবে অতি গুৰুত্বপূৰ্ণ-
- হৃদযন্ত্ৰৰ স্বাস্থ্য
ওমেগা থ্ৰী বিশেষকৈ ইপিএ আৰু ডিএইচএ যি মেকেৰেল আৰু ছালমনৰ দৰে মাছত প্ৰচুৰ পৰিমাণে পোৱা যায় যিয়ে হৃদযন্ত্ৰৰ স্বাস্থ্য উন্নত কৰাত সহায় কৰে ৷ এইবোৰে ট্ৰাইগ্লিচাৰাইডৰ মাত্ৰা হ্ৰাস কৰে, শৰীৰত প্ৰদাহ ৰোধ কৰে আৰু সুষম ৰক্তচাপ বজাই ৰখাত সহায় কৰে ৷
- মগজুৰ কাৰ্যক্ষমতা
DHA হৈছে এক প্ৰকাৰৰ ওমেগা থ্ৰী যি মগজুৰ কলাৰ এক অতি গুৰুত্বপূৰ্ণ অংশ ৷ ওমেগা থ্ৰী সেৱনে জ্ঞানমূলক কাৰ্য উন্নত কৰে, স্মৃতিশক্তি তীক্ষ্ণ কৰে আৰু বয়সৰ লগে লগে জ্ঞানশক্তিৰ অৱনতি হ্ৰাস কৰে ৷
- গাঁঠিৰ স্বাস্থ্য
ওমেগা থ্ৰীৰ প্ৰদাহ নিবাৰণকাৰী গুণে গাঁঠিৰ স্বাস্থ্যৰ যথেষ্ট উপকাৰ কৰে ৷ বাতবিষৰ দৰে অৱস্থাত ইহঁতে গাঁঠিৰ গতি আৰু নমনীয়তাত সহায় কৰে আৰু বিষৰ পৰা সকাহ দিয়ে ৷
- মেজাজ আৰু মানসিক স্বাস্থ্য
কিছু গৱেষণাৰ মতে, ওমেগা থ্ৰী ফেটি এচিড সেৱনে উদ্বেগ আৰু হতাশাৰ দৰে মেজাজৰ বিকাৰ নিৰাময়ত সহায় কৰে ৷ এইবোৰে নিউৰ’ট্ৰান্সমিটাৰৰ কাৰ্যত সহায় কৰে আৰু মেজাজৰ ভাৰসাম্য ৰক্ষা কৰে ৷
- চকুৰ স্বাস্থ্য
চকুৰ ৰেটিনাতো DHA পোৱা যায় ৷ ওমেগা থ্ৰী সেৱনে দৃষ্টিশক্তি বৃদ্ধি কৰে আৰু বয়সৰ লগত জড়িত মেকুলাৰ ডিজেনেৰেচন হ্ৰাস কৰে ৷
- ছালৰ স্বাস্থ্য
ওমেগা থ্ৰীয়ে আৰ্দ্ৰতা ধৰি ৰখাত সহায় কৰে, প্ৰদাহ কমায় আৰু ছালৰ লগত জড়িত একজিমা আৰু চ’ৰিয়াচিছ আদি ৰোগত উপকাৰী ৷ এইদৰে ছালৰ সুস্বাস্থ্যৰ বাবে ওমেগা থ্ৰী ফেটি এচিড অতি গুৰুত্বপূৰ্ণ ৷
- গৰ্ভাৱস্থা
গৰ্ভাৱস্থাত ভ্ৰুণৰ মগজু আৰু চকুৰ বিকাশৰ বাবে ওমেগা থ্ৰী ফেটি এচিড অতি গুৰুত্বপূৰ্ণ বুলি বিবেচিত হয় ৷ এই কাৰণেই গৰ্ভৱতী মহিলাক প্ৰায়ে Omega Three চাপ্লিমেণ্ট দিয়া হয় ৷
https://ods.od.nih.gov/factsheets/Omega3FattyAcids-Consumer/
